ନୂଆଦିଲ୍ଲୀ,୧୮।୩: ବିହାରରେ ଏନ୍ଡିଏର ଆସନ ବୁଝାମଣା ହୋଇସାରିଛି। ସୋମବାର ସନ୍ଧ୍ୟାରେ ଦିଲ୍ଲୀରେ ଏନ୍ଡିଏ ପକ୍ଷରୁ ସାମ୍ବାଦିକ ସମ୍ମିଳନୀ କରାଯାଇଛି। ବିହାର ବିଜେପି ପ୍ରଭାରୀ ବିନୋଦ ତାଓ୍ବଡେ ଏନ୍ଡିଏରେ ସିଟ୍ ସେୟାରିଂ ଘୋଷଣା କରିଦେଇଛି। ବିଜେପି ୧୭ଟି ଆସନରୁ ଲଡିବ, ସେଭଳି ନୀତୀଶ କୁମାରଙ୍କ ଜେଡିୟୁ ୧୬ଟି ଆସନରେ ଲଢିବ। ବାକି ଆସନରେ ଚିରାଗ ପାସଓ୍ବାନଙ୍କ ଲୋକ ଜନଶକ୍ତି ପାର୍ଟି(ରାମବିଳାଶ)କୁ ୫ଟି ଆସନ, ଜିତନରାମ ମାନଝିଙ୍କ ହିନ୍ଦୁସ୍ତାନୀ ଆଓ୍ବାମ ମୋର୍ଚ୍ଚା( ହମ୍)କୁ ଗୋଟିଏ ଆସନ ଓ ଉପେନ୍ଦ୍ର କୁଶଓ୍ବାହଙ୍କ ଆରଏଲଏମ୍କୁ ଗୋଟିଏ ଆସନ ମିଳିଛି।
ସବୁଠାରୁ ବଡ଼ କଥା ଏହା ଯେ, ପଶୁପତି ପାରସ୍ଙ୍କ ପାର୍ଟିର ନଓ୍ବାଦ ଆସନରୁ ଏଥର ବିଜେପି ଲଢିବ। ଦିଲ୍ଲୀରେ ବିଜେପି ମୁଖ୍ୟାଳୟରେ ପାର୍ଟିର ବିହାର ପ୍ରଭାରୀ ବିନୋଦ ତାଓ୍ବଡେ ଆସନ ବୁଝାମଣାର ଘୋଷଣା କରିଛନ୍ତି। ଏହି ଅବସରରେ ବିଜେପି ରାଜ୍ୟ ଅଧ୍ୟକ୍ଷ ସମ୍ରାଟ ଚୌଧୁରୀ, ଜେଡିୟୁ ନେତା ସଞ୍ଜୟ ଝାଙ୍କ ସହିତ ଅନ୍ୟ ଦଳର ନେତା ମଧ୍ୟ ଉପସ୍ଥିତ ଥିଲେ।
ତାଓ୍ବଡେ ୫ ଦଳ ଭିତରେ ବଣ୍ଟା ଯାଇଥିବା ୪୦ଟି ଆସନର ସୂଚୀ ଜାରି କରିଛନ୍ତି, ଯେଉଁଥିରେ ସ୍ପଷ୍ଟ ହୋଇଛି ଯେ, ଲୋକସଭା ନିର୍ବାଚନରେ କେନ୍ଦ୍ରମନ୍ତ୍ରୀ ପଶୁପତି ପାରସଙ୍କ ରାଷ୍ଟ୍ରୀୟ ଲୋକ ଜନଶକ୍ତି ପାର୍ଟି କଟି ଯାଇଛି। ପୁରୁଣା ଏଲଜେପିର କବଜାରେ ଥିବା ନଓ୍ବାଦ ଆସନରୁ ଏଥର ବିଜେପି ଲଢିବ, ଯେଉଁଠୁ ପାରସ୍ କ୍ୟାମ୍ପର ଚନ୍ଦନ ସିଂହ ସାଂସଦ ଅଛନ୍ତି। ଚନ୍ଦନ ଏଲଜେପିର ବରିଷ୍ଠ ନେତା ସୁରଜଭାନ ସିଂହଙ୍କ ଭାଇ।
