ଭୁବନେଶ୍ୱର,୨୫/୦୮: ୱାର୍ଡ ନଂ ୫୩  ଝରଣା (ଉପରସାହି) ବସ୍ତିରେ ଜଣେ ବ୍ୟକ୍ତି  ଭୂମି ଅଧିକାର ପ୍ରମାଣ ପତ୍ର (ଏଲ୍‌ଆରସି)  ପାଇଛନ୍ତି। ସେହି ବସ୍ତିରେ ମାତ୍ର ୨ ହାତ  ଦୂରରେ ଘର ତୋଳିଥିବା ଅନ୍ୟ ଜଣେ ବ୍ୟକ୍ତି  ଏଲ୍‌ଆରସି ପାଇବାରୁ ବଞ୍ଚିତ ହେଲେ । ଘର  ଜମି ରେଲୱେ ଅଧୀନ ଜମିରେ ଥିବାରୁ ତାଙ୍କୁ  ଜମି ଅଧିକାର ପ୍ରମାଣପତ୍ର ମିଳୁନି । ସେ ଏବେ  ଚିନ୍ତାରେ .. ।  

ଭୋଇ ସାହିର ଜଣେ ବ୍ୟକ୍ତିଙ୍କର  ସର୍ଭେରେ ନାଁ ଥିଲା । ତାଙ୍କ ଘର ୩୩୨ ବର୍ଗ  ଫୁଟରୁ ଅଧିକ ରହିଛି । ନିୟମ ଅନୁସାରେ  ସରକାରୀ ଜମି ଦରର ୫ ପ୍ରତିଶତ ଟଙ୍କା  ତାଙ୍କୁ ବିଏମ୍‌ସିରେ ଦାଖଲ କରିବାକୁ ପଡ଼ିବ ।  ହେଲେ ସେ ଟଙ୍କା ଦାଖଲ କରିବାରେ  ଅସମର୍ଥ । ତେଣୁ ତାଙ୍କୁ ପ୍ରମାଣପତ୍ର  ମିଳିନଥିଲା । ଏବେ ସେ ବହୁକଷ୍ଟରେ ଟଙ୍କା  ଯୋଗାଡ଼ କରିଛନ୍ତି । ହେଲେ ସରକାର ବଦଳି  ଗଲା ପରେ ତାଙ୍କର ପ୍ରମାଣପତ୍ର ଅନୁମୋଦନ  ହୋଇପାରୁନି । ସେ ଜାଗା ପାଇବେ କି ନାହିଁ  ସନ୍ଦେହରେ । ଏମତି ଶହ ଶହ ବସ୍ତିବାସିନ୍ଦା  ଜାଗା ମିଶନର ପ୍ରମାଣପତ୍ର ଅପେକ୍ଷାରେ  ଅଛନ୍ତି ।  

ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ  ସହାରଞ୍ଚଳରେ ବାସ କରୁଥିବା ଭୂମିହୀନ  ବସ୍ତିବାସିନ୍ଦାଙ୍କୁ ଥଇଥାନ କରିବାକୁ ଜାଗା ମିଶନ  ଯୋଜନା ହୋଇଥିଲା । ଏନେଇ ବିଏମ୍‌ସି  ଅଞ୍ଚଳରେ ପ୍ରାୟ ୪୫୭ ବସ୍ତି ଚିହ୍ନଟ କରାଯାଇ  ଡ୍ରୋନ୍‌ରେ ସର୍ଭେ କରାଯାଇଥିଲା । ଯୋଗ୍ୟ ହିତାଧିକାରୀଙ୍କ ତାଲିକା ପ୍ରକାଶ ପାଇଥିଲା ।  ସେଥିମଧ୍ୟରେ ୬୦ ହଜାର ଲୋକଙ୍କୁ ବର୍ତ୍ତମାନ  ସୁଦ୍ଧା ପ୍ରମାଣପତ୍ର ପ୍ରଦାନ କରାଯାଇଛି । ଏହି ସବୁ ବସ୍ତି ମଧ୍ୟରୁ ଏବେ ୧୦୩  ବସ୍ତିର ଲୋକେ ଜାଗା ମିଶନର ପ୍ରମାଣପତ୍ର  ପାଇବାରୁ ବଞ୍ଚିତ ରହିଛନ୍ତି । 

ଏହି ସବୁ ବସ୍ତି  ଜଙ୍ଗଲଜମି, ରେଲୱେ, ଜଳସମ୍ପଦ, ରାଜସ୍ୱର  ଥିବାରୁ ସେମାନଙ୍କୁ ଜମି ବଣ୍ଟାଯାଇ ପାରିନି ।  ସେଥିମଧ୍ୟରେ ସବୁଠି ସିଂହଭାଗ ରହିଛି ସାଲିଆ  ସାହି । ଏଥିରେ ମୋଟ୍‌ ୩୯ଟି ବସ୍ତି ବଞ୍ଚିତ  ରହିଛନ୍ତି । ଜଙ୍ଗଲ ବିଭାଗ ପକ୍ଷରୁ ଅନୁମୋଦନ  ମିଳୁନଥିବାରୁ ଏଲ୍‌ଆରସି ଦିଆଯାଇ ପାରୁନି । ସେହିପରି କେଳାସାହି , ଭୋଇ ସାହିର କିଛି  ଅଂଶ,କୁକୁଟେଶ୍ୱର ବସ୍ତି ରେଲୱେ ଅଧୀନରେ  ରହିଛି । ସେହପରି ୨୭ଟି ବସ୍ତି ଜଳସମ୍ପଦ  ବିଭାଗ ଅଧୀନରେ ରହିଛି । ଏହି ସବୁ ବସ୍ତି  ଲୋକେ ଏବେ ଆଶା ଆଶଙ୍କାରେ ରହିଛନ୍ତି ।  ସେମାନଙ୍କୁ ଜମି ମିଳିବ ନା ଝୁଲି ରହିବ ।  

ରାଜ୍ୟରେ ବିଜେପି ସରକାର ଶାସନ  ଭାର ନେଇଛି । ସରକାର ବଦଳିବା ପରେ ନୂଆ  ପ୍ରମାଣପତ୍ର ଅନୁମୋଦନ ହେବ କି ନାହିଁ, ସେ ନେଇ ପ୍ରଶ୍ନ ଉଠିଛି । ଏ ସମ୍ପର୍କରେ ବିଏମ୍‌ସି  କମିଶନର କହିଛନ୍ତି, ଜମି ପ୍ରମାଣପତ୍ର  ଦେବାକୁ ଆମେ ବିଭାଗୀୟ ଅଧିକାରୀମାନଙ୍କୁ  ଚିଠି ଲେଖିଛୁ । ସେମାନଙ୍କ ଉତ୍ତରକୁ  ଅପେକ୍ଷା ରହିଛି । ପର୍ଯ୍ୟାୟକ୍ରମେ ବାକି ଥିବା  ବସ୍ତିବାସିନ୍ଦା ମାନେ ପ୍ରମାଣପତ୍ର ପାଇବେ