ନୂଆଦିଲ୍ଲୀ: ମାଲେସିଆରେ ଏକ ବଡ ଧରଣର ଯୌନଶୋଷଣ ଘଟଣାର ପର୍ଦ୍ଧାଫାଶ କରିଛି ପୋଲିସ । ଏଠାରେ ୨୦ଟି ଇସଲାମିକ ଓ୍ବେଲଫେୟାର ହୋମ୍ସ ଉପରେ ପୋଲିସ ଚଢାଉ କରି ୪୦୨ ପିଲାଙ୍କୁ ମୁକ୍ତ କରିଛି । ଏଥିରେ ୧ ରୁ ୧୭ ବର୍ଷ ବୟସର ୨୦୧ ଜଣ ବାଳକ ରହିଥିବା ବେଳେ ୨୦୧ ଜଣ ବାଳିକା ରହିଛନ୍ତି ।
ପୋଲିସର ସୂଚନା ଅନୁଯାୟୀ, ଏଠାରେ ପିଲାମାନଙ୍କୁ ଯୌନ ଶୋଷଣ କରାଯାଉଥିଲା । ଏହି ଓ୍ବେଲଫେୟାର ହୋମ୍ସ ଗୁଡିକ ଗ୍ଲୋବାଲ୍ ଇଖୱାନ୍ ସର୍ଭିସେସ୍ ଏବଂ ବିଜନେସ୍ (ଜିଆଇଏସବି) ନାମକ ଏକ ଇସଲାମିକ୍ ବ୍ୟବସାୟ ଗୋଷ୍ଠୀ ସହିତ ଜଡିତ । ଇନ୍ସପେକ୍ଟର ଜେନେରାଲ ରଜାଉଦ୍ଦିନ ହୁସେନ୍ଙ୍କ ଅନୁଯାୟୀ ଏହି ଘଟଣାରେ ୧୭୧ ଜଣ ସନ୍ଦିଗ୍ଧଙ୍କୁ ଗିରଫ କରାଯାଇଛି । ସେ ଏଠାରେ ପିଲାମାନଙ୍କୁ ଅସଦାଚରଣ କରାଯାଉଥିବା ସୂଚନା ପାଇଥିଲେ ।
ହୁସେନ୍ଙ୍କ ଅନୁଯାୟୀ, ଓ୍ବେଲଫେୟାର ହୋମ୍ସରେ ଥିବା ପିଲାମାନଙ୍କୁ ଅନ୍ୟ ପିଲାମାନଙ୍କ ସହ ଭୁଲ କାମ କରିବାକୁ ମଧ୍ୟ ଚାପ ଦିଆଯାଉଥିଲା । ଗିରଫ ବ୍ୟକ୍ତିଙ୍କ ମଧ୍ୟରେ ଧାର୍ମିକ ଶିକ୍ଷକ ଏବଂ ଅନ୍ୟ ଅନେକ ଅଛନ୍ତି ବୋଲି ସେ କହିଛନ୍ତି । ପିଲା ମାନଙ୍କର ଶିକ୍ଷା ଏବଂ ଯତ୍ନ ପାଇଁ ସେମାନେ ଉତ୍ତରଦାୟୀ ଥିଲେ । ଅନେକ ପିଲାଙ୍କୁ ଗୋଟିଏ କୋଠରୀରେ ରଖାଯାଇଥିଲା।
ତେବେ ଛୋଟ ଛୋଟ ଭୁଲ୍ ପାଇଁ ଛୋଟ ପିଲା ମାନଙ୍କୁ ଗରମ ଚାମଚର ଚେଙ୍କ ଦିଆଯାଉଥିଲା । ଇନ୍ସପେକ୍ଟର ଜେନେରାଲ୍ ହୁସେନ୍ କହିଛନ୍ତି ଯେ ଯେତେବେଳେ ପିଲାମାନେ ଏଠାରେ ଅସୁସ୍ଥ ହୋଇପଡୁଥିଲେ, ସେମାନଙ୍କୁ ଚିକିତ୍ସା ଦିଆଯାଉନଥିଲା। ତାଙ୍କ ଅବସ୍ଥା ଗୁରୁତର ହେବା ପରେ ତାଙ୍କୁ ଡାକ୍ତରଖାନା ନିଆଯାଉଥିଲା । ସେ କହିଛନ୍ତି ଯେ ଏପରି କିଛି ଘଟଣା ଅଛି ଯେଉଁଥିରେ ୫ ବର୍ଷରୁ କମ୍ ବୟସର ପିଲା ଭୁଲ୍ କରିବା ପାଇଁ ସେମାନଙ୍କୁ ଚେଙ୍କ ସହ ଶାରିରୀକ ନିର୍ଯ୍ୟାତନା ଦିଆଯାଉଥିଲା । ଗ୍ଲୋବାଲ ଇଖୱାନ ପିଲାମାନଙ୍କୁ ଶୋଷଣ କରୁଥିଲେ ଏବଂ ଦାନ ଟଙ୍କା ପାଇବା ପାଇଁ ଧାର୍ମିକ ଭାବନା ବ୍ୟବହାର କରିଥିଲେ ।
ଏହାର ୨୦ ଟି ଦେଶରେ ଶାଖା ଅଛି, ଯେଉଁଥିରେ ୫ ହଜାରରୁ ଅଧିକ କର୍ମଚାରୀ କାମ କରନ୍ତି । ଚାଇନା, ବ୍ରିଟେନ, ୟୁଏଇ ସମେତ ୨୦ ଟି ଦେଶରେ ଗ୍ଲୋବାଲ ଇଖୱାନର ଶାଖା ଅଛି । ଏହି ଗୋଷ୍ଠୀ ଜଣେ ଧାର୍ମିକ ନେତାଙ୍କ ଦ୍ୱାରା ପ୍ରତିଷ୍ଠିତ ହୋଇଥିଲା।
