କୋଲକାତା: ଡାକ୍ତର ଦୁଷ୍କର୍ମ ଓ ହତ୍ୟା ମାମଲାକୁ ନେଇ ପଶ୍ଚିମବଙ୍ଗରେ ଆନ୍ଦୋଳନ ତୀବ୍ର ହେବାରେ ଲାଗିଛି । ଏବେ ପୀଡ଼ିତାଙ୍କ ମା’ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ପାଲଟା ଜବାବ ଦେଇଛନ୍ତି । ଏହା ପୂର୍ବରୁ ପୀଡ଼ିତାଙ୍କ ପରିବାର ନ୍ୟାୟ ଚାହୁଁନାହାନ୍ତି ବୋଲି କହିଥିଲେ ମମତା ବାନାର୍ଜୀ । ପୀଡ଼ିତାଙ୍କ ମା’ କହିଛନ୍ତି ଯେ, ‘ମୁଖ୍ୟମନ୍ତ୍ରୀ କହୁଛନ୍ତି ପରିବାର ନ୍ୟାୟ ଚାହୁଁନି । ମମତାଙ୍କର ନିଜର ପୁଅ କିମ୍ବା ଝିଅ ନାହାନ୍ତି । ତେଣୁ ସେ ପିଲା ହରାଇବାର ଦୁଃଖକୁ ବୁଝିପାରିବେ ନାହିଁ । ତାଙ୍କର ମନ୍ତବ୍ୟ ଆମକୁ ବ୍ୟଥିତ କରିଛି ।’ 

ପୀଡ଼ିତାଙ୍କ ମା ଆହୁରି କହିଛନ୍ତି, ‘ଗୁରୁବାର ମମତା ବାନାର୍ଜୀ ଯାହା କହିଛନ୍ତି ତାହା ପସନ୍ଦ ଆସିଲାନି ।  ପୁରା ଦୁନିଆ ମୋ ଝିଅ ସହ ରହିଛି । ସେମାନେ ନ୍ୟାୟ ପାଇଁ ବିରୋଧ ପ୍ରଦର୍ଶନ କରୁଛନ୍ତି । କିନ୍ତୁ ସେ (ମମତା) କହୁଛନ୍ତି ଯେ ଆମକୁ ନ୍ୟାୟ ଦରକାର ନାହିଁ । ପ୍ରଦର୍ଶନକାରୀଙ୍କୁ ଅପିଲ କରୁଛି, ନ୍ୟାୟ ନମିଳିବା ଯାଏଁ ପ୍ରଦର୍ଶନ ଜାରି ରଖନ୍ତୁ ।’ 

ସେପଟେ ଡାକ୍ତର ଦୁଷ୍କର୍ମ ଓ ହତ୍ୟା ମାମଲାକୁ ନେଇ ଗୋଟିଏ ପରେ ଗୋଟିଏ ବିସ୍ଫୋରକ ଖୁଲାସା ହେଉଛି । ନିକଟରେ ଏକ ଅଡିଓ କ୍ଲିପ୍‌ ଭାଇରାଲ ହେଉଛି । କୋଲକାତା ପୋଲିସ ପୀଡ଼ିତାଙ୍କ ପରିବାରକୁ କହିଥିଲା ଯେ, ତାଙ୍କ ଝିଅ ଆତ୍ମହତ୍ୟା କରିଛନ୍ତି । କିନ୍ତୁ କୋଲକାତା ପୋଲିସ ଏହି ଅଭିଯୋଗକୁ ଖଣ୍ଡନ କରିଛି । କୋଲକାତା ଡିସିପି ଇନ୍ଦିରା ମୁଖାର୍ଜୀ କହିଛନ୍ତି, ଟିଭିରେ କେତେକ ଅଡିଓ କ୍ଲିପ୍‌ ଶୁଣିଛୁ, କୋଲକାତା ପୋଲିସ ଏଭଳି କୌଣସି ସୂଚନା ଦେଇନଥିଲା । ଡାକ୍ତର ଆତ୍ମହତ୍ୟା କରିଥିବା କଥା ଆମେ କେବେ ବି କହିନାହୁଁ ।