କୋଲକାତା: ଆରଜି କର ମେଡିକାଲ କଲେଜ ଓ ହସ୍ପିଟାଲରେ ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲାକୁ ନେଇ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଜୋରଦାର ଟାର୍ଗେଟ କରିଆସିଛି ବିଜେପି । ଏବେ କେନ୍ଦ୍ରମନ୍ତ୍ରୀ ଗିରିରାଜ ସିଂହ ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କ ତୁଳନା ଉତ୍ତର କୋରିଆର ଏକଛତ୍ରବାଦୀ ଶାସକ କିମ୍‌ ଜଙ୍ଗ ଉନ୍‌ଙ୍କ ସହ କରିଛନ୍ତି । ସେ କହିଛନ୍ତି, ବିଶ୍ବରେ ଜଣେ ଏକଛତ୍ରବାଦୀ ଶାସକ ଥିଲେ । ମମତା ବାନାର୍ଜୀ ବିଶ୍ବର ଦ୍ବିତୀୟ ଏକଛତ୍ରବାଦୀ ଶାସକ ।  

ଗିରିରାଜ ସିଂହ କହିଛନ୍ତି ଯେ, ପଶ୍ଚିମବଙ୍ଗର ଏକଛତ୍ରବାଦୀ ଶାସକ ମମତା ବାନାର୍ଜୀ । ରାଜ୍ୟରେ ଯିଏ ଅପରାଧୀ ସେମାନେ ଟିଏମସିର କାର୍ଯ୍ୟକର୍ତ୍ତା । ମହିଳା ହୋଇ ମଧ୍ୟ ମମତାଙ୍କୁ ଲଜ୍ଜା ନାହିଁ । ଏହା ପୂର୍ବରୁ ଆଜି (ବୁଧବାର) କୋଲକାତା ଦୁଷ୍କର୍ମ ମାମଲାକୁ ନେଇ ପଶ୍ଚିମବଙ୍ଗ ବନ୍ଦ ଡାକରା ଦେଇଥିଲା  ବିଜେପି। ଏହାକୁ ନେଇ ମମତା ବାନାର୍ଜୀ ବିଜେପି ଉପରେ ବର୍ଷିଛନ୍ତି। 

 ମମତା ବାନାର୍ଜୀ କହିଛନ୍ତି, ବେଙ୍ଗଲରେ ନିଆଁ ଲଗାଇବାକୁ ଚେଷ୍ଟା କଲେ ସବୁଠି ନିଆଁ ଲାଗିବ । ସେ ଆହୁରି କହିଛନ୍ତି, ‘କିଛି ଲୋକଙ୍କୁ ଲାଗୁଛି ଏହା ବାଂଲାଦେଶ । ମୋତେ ବାଂଲାଦେଶ ପସନ୍ଦ । ସେଠାକର ଲୋକମାନେ ଆମ ଭାଷା କହୁଛନ୍ତି । ବାଂଲାଦେଶୀ ଏବଂ ବେଙ୍ଗଲୀ ସଂସ୍କୃତି ଏକା ଭଳି । କିନ୍ତୁ ଏହା ମନେ ରଖନ୍ତୁ ବାଂଲାଦେଶ ଏବଂ ଭାରତ ଦୁଇଟି ଅଲଗା ଦେଶ । ମୋଦୀ ବାବୁ ଆପଣ ଯେଉଁଭଳି ଲୋକଙ୍କୁ କହି ନିଆଁ ଲଗାଉଛନ୍ତି । ମନେ ରଖନ୍ତୁ ବେଙ୍ଗଲରେ ନିଆଁ ଲଗାଇଲେ ଆସାମ ଚୁପ୍‌ ବସିବ ନାହିଁ । ପୂର୍ବତ୍ତୋର ରାଜ୍ୟରେ ମଧ୍ୟ ନିଆଁ ଲାଗିବ । ଦିଲ୍ଲୀ ଶାନ୍ତିରେ ବସିବ ନାହିଁ । ଆପଣଙ୍କ ଚୌକି ଟଳମଳ କରିଦେବୁ । ’   ସେପଟେ ପ୍ରଦର୍ଶନ କରୁଥିବା ଡାକ୍ତରଙ୍କୁ କାର୍ଯ୍ୟରେ ଯୋଗ ଦେବାକୁ ମମତା ବାନାର୍ଜୀ ଅପିଲ କରିଥିଲେ।   କିନ୍ତୁ ବୁଧବାର ମୁଖ୍ୟମନ୍ତ୍ରୀଙ୍କ ଅପିଲକୁ ପ୍ରତ୍ୟାଖାନ କରିଛନ୍ତି ଆନ୍ଦୋଳନରତ ଡାକ୍ତର ।