ନୂଆଦିଲ୍ଲୀ ୧୧/୦୯: ଆମେରିକାର ପେନ୍ସିଲଭାନିୟା ବାସିନ୍ଦା ୩୨ ବର୍ଷୀୟ ଜାକାରିୟା ସ୍ୱପ୍ ଏକ ଅନନ୍ୟ କୃତିତ୍ୱ ହାସଲ କରିଛନ୍ତି । ଗୋଟିଏ ବର୍ଷରେ ସିନେମା ହଲ୍ରେ ସର୍ବାଧିକ ଫିଲ୍ମ ଦେଖି ସେ ବିଶ୍ୱ ରେକର୍ଡ କରିଛନ୍ତି । ମେ ୨୦୨୨ରୁ ମେ ୨୦୨୩ ମସିହା, ୧୨ ମାସ ଅବଧିରେ ସ୍ୱପ୍ ରିଗଲ ସିନେମାରେ ନିଜର ଗୁରୁତ୍ୱପୂର୍ଣ୍ଣ ସମୟ ବିତାଇଛନ୍ତି । ଏହି ଅବଧିରେ ସେ ମୋଟ୍ ୭୭୭ ଫିଲ୍ମ ଦେଖିଛନ୍ତି । ଏହି ଅନନ୍ୟ କୃତିତ୍ୱ ଲାଗି ସେ ଗିନିଜ୍ ବିଶ୍ୱ ରେକର୍ଡସରେ ସ୍ଥାନ ପାଇଛନ୍ତି । ଏହା ପୂର୍ବରୁ ବର୍ଷକ ମଧ୍ୟରେ ୭୧୫ ଫିଲ୍ମ ଦେଖିଥିବା ଜଣେ ବ୍ୟକ୍ତିଙ୍କ ନାଁରେ ବିଶ୍ୱ ରେକର୍ଡ ଥିଲା ।
ସ୍ୱପ୍ଙ୍କ ଫିଲ୍ମ ମାରାଥନ୍ରେ ବିଭିନ୍ନ ଧରଣର ଫିଲ୍ମ ରହିଛି । ‘ମିନିଅନ୍ସ: ରାଇଜ୍ ଅଫ୍ ଗ୍ରୁ’ ଥିଲା ତାଙ୍କର ପ୍ରଥମ ଆଉ ଶେଷ ଫିଲ୍ମ ଥିଲା ‘ଇଣ୍ଡିଆନା ଜୋନ୍ସ ଆଣ୍ଡ ଦ ଡାଏଲ ଅଫ୍ ଡେଷ୍ଟିନି’ । ଏହି କୃତିତ୍ୱକୁ ସମ୍ମାନ ଦେବା ପାଇଁ ରିଗଲ ସିନେମାଜ୍ ତାଙ୍କୁ ଏକ ପୁରସ୍କାର ପ୍ରଦାନ କରିଛି ଏବଂ ଆମେରିକାନ୍ ଫେଡେରେସନ୍ ଫର୍ ସୁସାଇଡ୍ ପ୍ରିଭେନ୍ସନକୁ ୬ ଲକ୍ଷ ଟଙ୍କା ଦାନ କରିଛି ।
ଗିନିଜ୍ ବିଶ୍ୱ ରେକର୍ଡ ଭାଙ୍ଗିବା ସ୍ୱପ୍ଙ୍କ ପାଇଁ ସହଜ ନ ଥିଲା । ତାଙ୍କୁ କଠୋର ମାର୍ଗଦର୍ଶିକା ପାଳନ କରିବାକୁ ପଡ଼ିଥିଲା । ବିଶ୍ୱ ରେକର୍ଡ ପାଇଁ ଯୋଗ୍ୟତା ହାସଲ କରିବାକୁ ତାଙ୍କୁ ପ୍ରତ୍ୟେକ ଫିଲ୍ମକୁ ଆରମ୍ଭରୁ ଶେଷ ପର୍ଯ୍ୟନ୍ତ ଦେଖିବାକୁ ପଡ଼ିଥିଲା । ଫିଲ୍ମ ଚାଲିବା ସମୟରେ କୌଣସି ପ୍ରକାର ଅନ୍ୟ କାର୍ଯ୍ୟକଳାପ ଉପରେ କଟକଣା ଥିଲା । ଅର୍ଥାତ୍, ଶୋଇବା, ଫୋନ୍ ଯାଞ୍ଚ୍ କରିବା କିମ୍ବା ଖାଇବା ଓ ପାଣି ପିଇବା ମଧ୍ୟ ମନା । ଅଫିସ୍ କାମ ଶେଷ କରି ସେ ଫିଲ୍ମ ଦେଖିବାକୁ ସିନେମା ଘରକୁ ଯାଉଥିଲେ । ସେଠାରେ ଗୋଟିଏ ସନ୍ଧ୍ୟାରେ ୩ଟି ଫିଲ୍ମ ଦେଖୁଥିଲେ ।
