ମ.ରାମପୁର, ୧୨।୫: ପ୍ରଥମ ପର୍ଯ୍ୟାୟ ସାଧାରଣ ନିର୍ବାଚନ । ନିର୍ବାଚନର ଦିନକ ଆଗରୁ ଲାଗିଲା ମାଓ ପୋଷ୍ଟର । କଳାହାଣ୍ଡି ଜିଲ୍ଲା ମ.ରାମପୁର ଥାନା ଅନ୍ତର୍ଗତ ଜାତୀୟ ରାଜପଥ ୫୯ର କେନ୍ଦୁ ଘାଟି ନିକଟ ରାସ୍ତା କଡ଼ରେ ରବିବାର ଏକାଧିକ ସ୍ଥାନରେ ମାଓ ପୋଷ୍ଟର ଲାଗିଛି । ଏଥିରେ କୋଡ଼ିଏ ବର୍ଷର ଶାସନ କାଳରୁ ବିଜେଡି ସରକାର ଓଡ଼ିଶା ଜନତାଙ୍କୁ କ’ଣ ଦେଇଛି ? କୃଷକ ଚାଷୀ ଭାଇ ଭଉଣୀମାନେ ଆତ୍ମହତ୍ୟା କରୁଛନ୍ତି । ଶ୍ରମିକ, ଶିକ୍ଷା, ଅଙ୍ଗନୱାଡ଼ି, ଆଶାକର୍ମୀଙ୍କ ଅସ୍ଥାୟୀ ସମ୍ବିଦା କାଜୁଆଲ ବା ଦୈନିକ ବେତନ ଭୋଗୀଙ୍କ ନିଯୁକ୍ତି ବ୍ୟତୀତ ଆଉ କିଛି ନାହିଁ ବୋଲି କେକେବିଏନ୍ ଡିଭିଜନାଲ କମିଟି, ଭା.କ.ପା(ମାଓବାଦୀ) ତରଫରୁ ଏହି ପୋଷ୍ଟର ଲଗାଯାଇଛି । ତେବେ ଏହି ପୋଷ୍ଟର ମାଧ୍ୟମରେ ମାଓବାଦୀ ନିଜର ଉପସ୍ଥିତି ଜାହିର କରିଥିବା ବେଳେ ଆସନ୍ତା କାଲିର ସାଧାରଣ ନିର୍ବାଚନରେ ମାଓ ପ୍ରଭାବ କ’ଣ ରହିବ ବୋଲି ଆଲୋଚନା ହେଉଛି ।