ନୂଆଦିଲ୍ଲୀ ୨୬/୦୩: ବୟସ କେବଳ ଏକ ସଂଖ୍ୟା । ଚଣ୍ଡିଗଡ଼ର ବାସିନ୍ଦା ୮୦ ବର୍ଷୀୟ ତ୍ରିପତ୍ ସିଂହଙ୍କ କ୍ଷେତ୍ରରେ ଏହି କଥା ସତ୍ୟରେ ପରିଣତ ହୋଇଛି । ତ୍ରିପତ୍ଙ୍କ ଫିଟନେସ୍ ମାନିଆ ଏବେ ଚର୍ଚ୍ଚାରେ ରହିଛି । ଯୁବପିଢ଼ିଙ୍କ ଲାଗି ସେ ସାଜିଛନ୍ତି ରୋଲ୍ ମଡେଲ୍ । ତାଙ୍କର ସୋସିଆଲ ମିଡିଆ ପ୍ରୋଫାଇଲ୍ରେ ଅନେକ ଫଲୋଅର ଥିବାବେଳେ ସେମାନଙ୍କ ମଧ୍ୟରେ ସେଲିବ୍ରିଟି ଦମ୍ପତି କ୍ରିକେଟର ବିରାଟ କୋହଲି ଓ ଅଭିନେତ୍ରୀ ଅନୁଷ୍କା ଶର୍ମା ସାମିଲ ।
ତ୍ରିପତ୍ କହିଛନ୍ତି, ମୁଁ ଯୁବାବସ୍ଥାରୁ ସ୍ୱାସ୍ଥ୍ୟ ସଚେତନ ଥିଲି । କିନ୍ତୁ ପରିସ୍ଥିତିରେ ପଡ଼ି ମୋର ବ୍ୟାୟାମ ବନ୍ଦ ହୋଇଯାଇଥିଲା । ପତ୍ନୀ ମଞ୍ଜିତ୍ଙ୍କ ବିୟୋଗ ପରେ ଏହି ସ୍ଥିତି ଆହୁରି ବିଗିଡ଼ି ଗଲା । ମୁଁ ମାନସିକ ଅବସାଦଗ୍ରସ୍ତ ହୋଇପଡ଼ିଥିଲି । ଓଜନ ବି ଅନେକ ବଢ଼ିଯାଇଥିଲା । ଇତିମଧ୍ୟରେ ଜଣେ ଲୋକ ମୋର ବଡ଼ ପେଟକୁ ଦେଖି ଏକ ଖରାପ ମନ୍ତବ୍ୟ ଦେଲେ । ତାହା ମୋତେ ଗଭୀର ଭାବେ ଆଘାତ ପହଞ୍ଚାଇଲା । ସେଇଦିନଠାରୁ ମୁଁ ଓଜନ କମାଇବାକୁ ମନେ ମନେ ଶପଥ ନେଲି । ଧୀରେ ଧୀରେ ବ୍ୟାୟାମର ପରିମାଣ ବଢ଼ାଇ ଚାଲିଲି । ସମୟ ସମୟରେ ଜିମ୍ ମଧ୍ୟ ଗଲି । ଅଧିକାଂଶ ସମୟରେ ମୁଁ ମୋର ବ୍ୟାୟାମର ଭିଡିଓକୁ ସୋସିଆଲ୍ ମିଡିଆରେ ପୋଷ୍ଟ କରିଥାଏ । ପ୍ରାଥମିକ ଭାବେ ମୋର ସୋସିଆଲ୍ ମିଡିଆରେ ବେଶୀ ଫଲୋଅର ନଥିଲେ । କିନ୍ତୁ କ୍ରିକେଟର ବିରାଟ କୋହଲି ମୋ ସଂପର୍କିତ ପୋଷ୍ଟ କରିବା ପରେ ଅଚାନକ ଅନୁଗାମୀମାନଙ୍କ ସଂଖ୍ୟା ବୃଦ୍ଧି ପାଇଲା । ତାଙ୍କ ପତ୍ନୀ ଅନୁଷ୍କା ଶର୍ମା ମଧ୍ୟ ମୋ ସଂପର୍କିତ ଏକ ପୋଷ୍ଟ କରିଥିଲେ । ଏହାପରେ ମୋର ଅନୁଗାମୀଙ୍କ ସଂଖ୍ୟା ଯଥେଷ୍ଟ ବଢ଼ିଯାଇଛି ।
