ନୂଆଦିଲ୍ଲୀ ୨୯/୦୩: ସମୟ ସହିତ ଜଳବାୟୁ ପରିବର୍ତ୍ତନ ସଙ୍କଟ ଘନେଇବାରେ ଲାଗିଛି । ବିଶ୍ୱ ଉତ୍ତାପନ ଯୋଗୁ ମେରୁ ଅଞ୍ଚଳ ବରଫ ଦ୍ରୁତ ବେଗରେ ତରଳୁଛି । ଏହା ପୃଥିବୀର ଘୂର୍ଣ୍ଣନ ପ୍ରକ୍ରିୟାକୁ ପ୍ରଭାବିତ କରୁଛି । ପୃଥିବୀର ଘୂର୍ଣ୍ଣନ ପ୍ରକ୍ରିୟା ପ୍ରଭାବିତ ହେଲେ ସମୟ ଉପରେ ବଡ଼ ପ୍ରଭାବ ପଡ଼ିବ । ସମୟରେ କିଛି ସେକେଣ୍ଡ୍ର ପରିବର୍ତ୍ତନ ହୋଇପାରେ ବୋଲି ସଦ୍ୟତମ ଅଧ୍ୟୟନ ଚେତାବନୀ ଦେଇଛି । ଅଧ୍ୟୟନର ତଥ୍ୟ ନେଚର ପତ୍ରିକାରେ ପ୍ରକାଶ ପାଇଛି ।
ବିଶ୍ୱ ତାପନ ମେରୁ ବରଫ ତରଳିବାର ମୁଖ୍ୟ କାରଣ । ଏଥିପାଇଁ ପୃଥିବୀ ଯେଉଁ ବେଗରେ ଘୂରିବା କଥା ତା’ଠୁ କମ୍ ବେଗରେ ଘୂରୁଛି । ଏହି କାରଣ ପାଇଁ ବିଶ୍ୱର ସମୟ ନିର୍ମାତାମାନଙ୍କୁ ଆମ ଘଡ଼ିରୁ କିଛି ସେକେଣ୍ଡ୍ ହ୍ରାସ କରିବା ଲାଗି ବିଚାର କରିବାକୁ ପଡ଼ିପାରେ । ଏହାକୁ ‘ନେଗେଟିଭ୍ ଲିପ୍ ସେକେଣ୍ଡ୍’ କୁହାଯାଏ । ୨୦୨୯ ବେଳକୁ ଆମ ଘଡ଼ିରୁ କିଛି ସେକେଣ୍ଡ୍ କମିପାରେ ବୋଲି ଅଧ୍ୟୟନ ସ୍ପଷ୍ଟ କରିଛି ।
ଏପରି ହେଲେ କମ୍ପ୍ୟୁଟର ନେଟ୍ୱର୍କ ଟାଇମିଂ ପାଇଁ ଅଦୃଶ୍ୟ ସମସ୍ୟା ସୃଷ୍ଟି ହେବ ଏବଂ ପୂର୍ବ ଯୋଜନା ତୁଳନାରେ ୟୁଟିସି(କୋଅର୍ଡିନେଟେଡ୍ ୟୁନିଭର୍ସାଲ ଟାଇମ୍)ରେ ପରିବର୍ତ୍ତନ ଆବଶ୍ୟକ ହେବ ବୋଲି ଅଧ୍ୟୟନର ବିଶେଷଜ୍ଞ କହିଛନ୍ତି । ୟୁଟିସି ହେଉଛି ଘଡ଼ି ଓ ସମୟ ନିୟନ୍ତ୍ରଣ ଲାଗି ପ୍ରୟୋଗ ହେଉଥିବା ବିଶ୍ୱସ୍ତରୀୟ ପ୍ରାରମ୍ଭିକ ସମୟ ମାନକ ।
ଅଧ୍ୟୟନର ଲେଖକ ୟୁନିଭର୍ସିଟି ଅଫ୍ ସାନ୍ ଡିଗୋର ସ୍କ୍ରିପ୍ସ ଇନ୍ଷ୍ଟିଚ୍ୟୁସନ୍ ଅଫ୍ ଓସେନୋଗ୍ରାଫିର ଭୂବିଜ୍ଞାନୀ ଡଙ୍କନ୍ ଆଗ୍ନ୍ୟୁ କହିଛନ୍ତି, ମେରୁ ବରଫ ତରଳିବା ଯୋଗୁ ପୃଥିବୀର ଘନତ୍ୱ କେନ୍ଦ୍ରିତ ହେଉଥିବା ସ୍ଥାନରେ ପରିବର୍ତ୍ତନ ହୁଏ । ଏହି ପରିବର୍ତ୍ତନ ପୃଥିବୀର ଆଙ୍ଗୁଲାର ଭେଲୋସିଟି ବା କୋଣୀୟ ବେଗକୁ ପୂର୍ବାପେକ୍ଷା ଅଧିକ ପ୍ରଭାବିତ କରୁଛି । ଏହି କାରଣରୁ ‘ନେଗେଟିଭ୍ ଲିପ୍ ସେକେଣ୍ଡ୍’ର ଆବଶ୍ୟକତା ହୋଇପାରେ । ଅର୍ଥାତ୍ ପୃଥିବୀର ସମୟରୁ କିଛି ସେକେଣ୍ଡ୍ କମିପାରେ । ଏହି ସମୟ ୨୦୨୬ ବେଳକୁ ଆସିବ ବୋଲି ବୈଜ୍ଞାନିକମାନେ ଆକଳନ କରିଥିଲେ । କିନ୍ତୁ ଆଉ ୩ ବର୍ଷ ପରେ ଏହାକୁ ଆପଣେଇବାକୁ ପଡ଼ିପାରେ ବୋଲି ସେମାନେ ଅନୁମାନ କରିଛନ୍ତି । ଏହା ଦ୍ୱାରା ପୃଥିବୀର ଘୂର୍ଣ୍ଣନକୁ ଅଧିକ ଭଲଭାବେ ଆକଳନ କରିବାରେ ବିଶେଷଜ୍ଞଙ୍କୁ ସମୟ ମିଳିବ ।
ବିଶ୍ୱ ତାପନ ଯୋଗୁ ପୃଥିବୀ ଏବେ ଯେଉଁ ସଙ୍କଟର ସମ୍ମୁଖୀନ ହେଉଛି, ତାହା ପୂର୍ବରୁ ହୋଇନଥିଲା । ମେରୁ ବରଫ ତରଳିବା ପରଠୁ ପୃଥିବୀର ଭୂମଧ୍ୟରେଖା ଚତୁପାଶ୍ୱର୍ର ଭାର ବଢୁଛି, ଯାହା ଗ୍ରହର ଘୂର୍ଣ୍ଣନକୁ ପ୍ରଭାବିତ କରୁଛି ବୋଲି ଡଙ୍କନ୍ କହିଛନ୍ତି ।
