ନୂଆଦିଲ୍ଲୀ ୧୦/୦୬: ପ୍ରଧାନମନ୍ତ୍ରୀ ଭାବେ ନରେନ୍ଦ୍ର ମୋଦି ତୃତୀୟ ପାଳି ଆରମ୍ଭ । ରବିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶପଥ ଗ୍ରହଣ କରିବା ସହ ନିଜ ମନ୍ତ୍ରିମଣ୍ଡଳରେ ୭୧ ଜଣଙ୍କୁ ମନ୍ତ୍ରୀ ଭାବେ ନେଇଛନ୍ତି । ନୂଆ ମନ୍ତ୍ରିମଣ୍ଡଳ ଶପଥ ଗ୍ରହଣ କରୁ କରୁ ସରକାର ଆକ୍ସନ ମୁଡକୁ ଆସିଛନ୍ତି । ସୋମବାର ଅପରାହ୍ନ ୫ଟାରେ ପ୍ରଥମ କ୍ୟାବିନେଟ ବୈଠକ ଡକାଯାଇଛି । ପ୍ରତିଶ୍ରୁତି ମୁତାବକ ୧୦୦ ଦିନର କାର୍ଯ୍ୟଖସଡା ଉପରେ ଏହି ବୈଠକ ଡକାଯାଇଛି। ବୈଠକରେ ପ୍ରଧାନମନ୍ତ୍ରୀ ନୂଆ ମନ୍ତ୍ରୀମାନଙ୍କୁ ଦାୟିତ୍ୱ ଦେବେ । ଏଥିସହ ବିଭାଗ ବଣ୍ଟନ ନେଇ ମଧ୍ୟ ଆଲୋଚନା ହେବାର ସମ୍ଭାବନା ରହିଛି ।
ମୋଦି ସରକାରଙ୍କ ତୃତୀୟ ପାଳି । ତୃତୀୟପାଳିର ପ୍ରଥମ ୧୦୦ ଦିନର ଏଜେଣ୍ଡା ଉପରେ ଏବେ ରହିବ ସମସ୍ତଙ୍କର ନଜର । ସେଥିଲାଗି ଏକ ବ୍ଲୁ ପ୍ରିଣ୍ଟ ମଧ୍ୟ ପ୍ରସ୍ତୁତ କରାଯାଇଛି । ରିପୋର୍ଟ ଅନୁସାରେ, ୧୦୦ ଦିନିଆ ବ୍ଲୁ ପ୍ରିଣ୍ଟରେ ୫୦-୭୦ଟି ଗୁରୁତ୍ୱପୂର୍ଣ୍ଣ ଲକ୍ଷ୍ୟ ଓ ପ୍ରସ୍ତାବକୁ ସ୍ଥାନିତ କରାଯାଇଛି । ପ୍ରାଥମିକତା ଭିତ୍ତିରେ ସେଗୁଡି଼କର କାର୍ଯ୍ୟାନ୍ୱୟନ ହେବ । ଲକ୍ଷ୍ୟଗୁଡ଼ିକୁ ୩ ଭାଗରେ ବିଭକ୍ତ କରାଯାଇଛି । ପ୍ରଥମ ବିଭାଗରେ ଥିବା ଲକ୍ଷ୍ୟକୁ ପ୍ରଧାନମନ୍ତ୍ରୀ ଶପଥ ନେବାର କିଛି ଦିନ ମଧ୍ୟରେ ଘୋଷଣା କରିବେ । ତାହା ସବୁଠାରୁ ଗୁରୁତ୍ୱପୂର୍ଣ୍ଣ ଟାର୍ଗେଟ୍ ହେବ । ଦ୍ୱିତୀୟ ବିଭାଗରେ ଥିବା ଲକ୍ଷ୍ୟଗୁଡ଼ିକୁ କେନ୍ଦ୍ରମନ୍ତ୍ରୀ ଓ ରାଷ୍ଟ୍ରମନ୍ତ୍ରୀମାନେ ନୂଆ ସରକାରର ପ୍ରଥମ କିଛି ଦିନ ମଧ୍ୟରେ ଘୋଷଣା କରିବେ । ତୃତୀୟ ବିଭାଗରେ ଥିବା ଲକ୍ଷ୍ୟଗୁଡି଼କୁ ଆସନ୍ତା ୨-୩ ବର୍ଷ ମଧ୍ୟରେ କାର୍ଯ୍ୟରେ ପରିଣତ କରାଯିବ । ତୃତୀୟ ପାଳିରେ ମୋଦି ସରକାର ଯୁବଶକ୍ତିକୁ ଆଗକୁ ନେବା ଲାଗି ଅନେକ ଯୋଜନା ବି କରିଛନ୍ତି ।
