ମୁମ୍ବାଇ: ମୟାନଗରୀ ମୁମ୍ବାଇରେ ମୋବାଇଲ ଲାଇଟ୍ରେ ପ୍ରସବ ନେଇଛି ମା ଓ ନବଜାତର ଜୀବନ । କେବଳ ଦୁର୍ଗମ ଅଞ୍ଚଳରେ ଯେ ସ୍ବାସ୍ଥ୍ୟବସ୍ଥାର ବିକଳ ଚିତ୍ର ଦେଖିବାକୁ ମିଳେ ତାହା ନୁହେଁ ଦେଶର ଆର୍ଥିକ ରାଜଧାନୀ ମୁମ୍ବାଇରେ ଘଟିଛି ଏଭଳି ଅଭାବନୀୟ ଘଟଣା । ଏହି ଘଟଣା ମେଟ୍ରୋ ସିଟି ମୁମ୍ବାଇରେ ଘଟିଛି । ପରିବାର ଲୋକେ ଡାକ୍ତର ଓ ହସ୍ପିଟାଲ କର୍ତ୍ତୃପକ୍ଷଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ଖୁସରୁଦ୍ଦିଦ ଅନସାରୀ ନାମକ ଦିବ୍ୟାଙ୍ଗ ବ୍ୟକ୍ତିଙ୍କ ପତ୍ନୀ ସାହିଦୁନ ଗର୍ଭବତୀ ଥିଲେ । ପ୍ରସବ ନିମନ୍ତେ ତାଙ୍କୁ ସୁଷମା ସ୍ୱରାଜ ମ୍ୟାଟରନିଟି ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ହସ୍ପିଟାଲର ବିଜୁଳୀ କଟିଯାଇଥିବା ବେଳେ ଦୀର୍ଘ ସମୟ ପର୍ଯ୍ୟନ୍ତ ଜେନେରେଟର ବି ଲଗାଇ ନଥିଲେ ହସ୍ପିଟାଲ କର୍ତ୍ତୃପକ୍ଷ । ଫଳରେ ଉକ୍ତ ସମୟରେ ମୋବାଇଲ ଲାଇଟ୍ରେ ସାହିଦୁନଙ୍କ ଅସ୍ତ୍ରୋପଚାର କରାଯାଇଥିଲା । ଅପରେସନ ଟେବୁଲ ଉପରେ ଶିଶୁଟି ଆଖି ବୁଜି ଦେଇଥିବା ବେଳେ ସାହିଦୁନଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ଅନ୍ୟତ୍ର ନେଇଯିବାକୁ ମେଡିକାଲ କର୍ତ୍ତୃପକ୍ଷ ସୂଚନା ଦେଇଥିଲେ ।
ସେପଟେ ଅନ୍ୟ ହସ୍ପିଟାଲକୁ ନେବା ବାଟରେ ହିଁ ସାହିଦୁନ ଆଖି ବୁଜି ଦେଇଥିଲେ । ମେଡିକାଲ କର୍ତ୍ତୃପକ୍ଷଙ୍କ ଚରମ ଅବହେଳା ଯୋଗୁଁ ଉଭୟ ମା’ ଓ ଶିଶୁଙ୍କ ଜୀବନ ଚାଲି ଯାଇଥିବା ଖୁସରୁଦ୍ଦିଦ ଅନସାରୀଙ୍କ ପରିବାର ଲୋକେ ଅଭିଯୋଗ କରିଛନ୍ତି । ଏହାପରେ ଡାକ୍ତର ତଥା ହସ୍ପିଟାଲ କର୍ତ୍ତୃପକ୍ଷଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ସାଧାରଣରେ ଦାବି ହୋଇଛି ।
ସୂଚନାଯୋଗ୍ୟ, ଏହି ମେଡିକାଲ ଦେଶର ସବୁଠୁ ଧନୀ ମହାନଗର ନିଗମ ବୃହମୁମ୍ବାଇରେ ଅବସ୍ଥିତି । ଏହାର ବାର୍ଷିକ ବଜେଟ୍ ୫୪ ହଜାର କୋଟି ହୋଇଥିବା ବେଳେ ସ୍ବାସ୍ଥ୍ୟ ଭିତ୍ତିଭୂମି ଲାଗି ୬,୨୫୦ କୋଟି ଆବଣ୍ଟିତ ହୋଇଛି । ଏଭଳି ସ୍ଥିତିରେ ମୋବାଇଲ ଲାଇଟ୍ରେ ପ୍ରସବ କେତେଦୂର ଯୁକ୍ତିଯୁକ୍ତ ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
