ମୁମ୍ବାଇ ୦୩/୦୯: ଚଳିତ ବର୍ଷ ଜୁଲାଇରେ ଅଭିନେତ୍ରୀ ନତାଶା ଷ୍ଟାନ୍କୋଭିକ୍ ଓ କ୍ରିକେଟର୍ ହାର୍ଦ୍ଦିକ ପାଣ୍ଡ୍ୟା ବିବାହ ବିଚ୍ଛେଦ ଘୋଷଣା କରିଥିଲେ । ଏହି ସମୟରେ ପୁଅ ଅଗସ୍ତ୍ୟଙ୍କ ସହ ସେ ନିଜ ହୋମ୍ଟାଉନ୍ ସର୍ବିୟା ଚାଲିଯାଇଥିଲେ । ନତାଶା ନିଜ ଇନ୍ଷ୍ଟାଗ୍ରାମ୍ ହ୍ୟାଣ୍ଡେଲ୍ରୁ ପାଣ୍ଡ୍ୟା ସାଙ୍ଗିଆ ଓ ଉଭୟଙ୍କର ଅଧିକାଂଶ ଫଟୋ ହଟାଇବା ପରେ ଉଭୟଙ୍କ ବିଚ୍ଛେଦ ଚର୍ଚ୍ଚା ଜୋର ଧରିଥିଲା । ଏବେ ନିଜ ଇନ୍ଷ୍ଟାଗ୍ରାମ୍ ଷ୍ଟୋରୀରେ କିଛି ଫଟୋ ପୋଷ୍ଟ୍ କରି ଭାରତ ଫେରିବା ବିଷୟରେ ସେ ଘୋଷଣା କରିଛନ୍ତି ।
ବିମାନ ଭିତରେ ନତାଶାଙ୍କ ସେଲ୍ଫି ଦେଖିବାକୁ ମିଳିଛି । ଆଉ ଏକ ଫଟୋରେ ସେ ମୁମ୍ବାଇ ଫେରୁଥିବା ଘୋଷଣା କରି କ୍ୟାପ୍ସନ ଲେଖିଛନ୍ତି ‘ହେଲୋ ମୁମ୍ବାଇ ।’ କିଛି ଦିନ ତଳେ ନତାଶା ଇନ୍ଷ୍ଟାରେ ପ୍ରେମ ବିଷୟରେ ଏକ ଲେଖା ପୋଷ୍ଟ୍ କରିଥିଲେ । ଲେଖିଥିଲେ, ପ୍ରେମ କରୁଣା ଓ ଧୈର୍ଯ୍ୟ । ପ୍ରେମ ଠିକ୍ ଓ ଭୁଲର ହିସାବ ରଖେନାହିଁ । ଅନ୍ୟକୁ କଦାପି ଅସମ୍ମାନ କରେ ନାହିଁ ଏବଂ କଦାପି ବିଫଳ ହୁଏନାହିଁ ।
ତେବେ ଉଭୟଙ୍କ ବିଚ୍ଛେଦ ଖବର ପରେ ହାର୍ଦ୍ଦିକଙ୍କ ଡେଟିଂ ଗୁଜବ ଚର୍ଚ୍ଚାକୁ ଆସିଲା । ବ୍ରିଟିଶ ଗାୟିକା ଜାସ୍ମିନ ୱାଲିଆଙ୍କୁ ସେ ଡେଟ୍ କରୁଥିବା ଉଭୟଙ୍କ ଗ୍ରୀସ୍ ଭ୍ରମଣର ଫଟୋରୁ ଫ୍ୟାନ୍ ଅନୁମାନ କଲେ । ୨୦୨୦ ମସିହାରେ ହାର୍ଦ୍ଦିକ- ନତାଶାଙ୍କ ବିବାହ ହୋଇଥିଲା । ତେବେ ୨୦୨୩ରେ ଉଦୟପୁରରେ ପୁଣି ଥରେ ଉଭୟଙ୍କର ଏକ ଭବ୍ୟ ବିବାହ ଉତ୍ସବ ଅନୁଷ୍ଠିତ ହୋଇଥିଲା । କିନ୍ତୁ ଚଳିତ ବର୍ଷ ଆରମ୍ଭରୁ ଉଭୟଙ୍କ ସମ୍ପର୍କରେ ଫାଟ ସୃଷ୍ଟି ହୋଇଥିଲା । ତା’ପରେ ଉଭୟ ଆପୋସ ବୁଝାମଣାରେ ପରସ୍ପରଠୁ ଅଲଗା ହୋଇଥିଲେ ।
