ଭୁବନେଶ୍ବର: ୱାକଫ୍‌ ବିଲ୍‌କୁ ବିରୋଧ କରିବ ବିଜେଡି । ଗୁରୁବାର ଶଙ୍ଖ ଭବନ ଠାରେ ସଂଖ୍ୟାଲଘୁ ଭାଇ, ଭଉଣୀଙ୍କୁ ସମ୍ବୋଧନ କରି ଏହି କଥା ସ୍ପଷ୍ଟ କରିଛନ୍ତି ବିଜେଡି ସଭାପତି ନବୀନ ପଟ୍ଟନାୟକ । ନବୀନ କହିଥିଲେ, ରାଜ୍ୟର ବିଭିନ୍ନ ଅଞ୍ଚଳର ସଂଖ୍ୟାଲଘୁ ଭାଇ, ଭଉଣୀମାନେ ପ୍ରତିଦିନ ମୋତେ ଭେଟୁଛନ୍ତି । ସେମାନଙ୍କ ମନରେ ଅସୁରକ୍ଷିତ ଭାବନା ରହୁଥିବା ବିଷୟରେ ଜଣାଉଛନ୍ତି । ଓଡ଼ିଶା ସଦ୍‌ଭାବନା ଓ ଭାଇଚାରା ପାଇଁ ପ୍ରସିଦ୍ଧ । ଓଡ଼ିଶାର ସାଂସ୍କୃତିକ ବିବିଧତା ଆମର ଗୌରବ ।

ଦେଶର ପ୍ରଗତିରେ ସଂଖ୍ୟାଲଘୁମାନଙ୍କ ଅବଦାନକୁ ସ୍ମରଣ କରି ସେ କହିଥିଲେ, ସମସ୍ତଙ୍କ ସହଯୋଗ ଏକ ସମୃଦ୍ଧ ରାଷ୍ଟ୍ର ଗଠନ ପାଇଁ ଜରୁରି । ସାମ୍ପ୍ରଦାୟିକ ସଦ୍‌ଭାବନାକୁ ଭାରତୀୟ ସଂସ୍କୃତିର ମୂଳାଧାର ବୋଲି ବର୍ଣ୍ଣନା କରି ସମାଜର ଦୁର୍ବଳ ବର୍ଗର କଲ୍ୟାଣ ପାଇଁ ପୂର୍ବରୁ ବିଜେଡି ସରକାର ନେଇଥିବା ବିଭିନ୍ନ ପଦକ୍ଷେପ ଉପରେ ଆଲୋକପାତ କରିଥିଲେ । ଏ ଦେଶ ଆମର, ଏ ମାଟି ଆମର ଭାବନା ନେଇ କାମ କରିବାକୁ ସଂଖ୍ୟାଲଘୁ ଭାଇ, ଭଉଣୀମାନଙ୍କୁ ନବୀନ ଆହ୍ୱାନ ଦେଇଥିଲେ । 

ଶାନ୍ତି ଓ ସଦ୍‌ଭାବନା ହିଁ ପ୍ରଗତିର ଭିତ୍ତି । ଏଥିଯୋଗୁ ହିଁ ଓଡ଼ିଶା ବିଭିନ୍ନ କ୍ଷେତ୍ରରେ ପ୍ରଗତି ହାସଲ କରିପାରିଛି । ତେଣୁ ସାମ୍ପ୍ରଦାୟିକ ସଦ୍‌ଭାବନା ବଜାୟ ରଖିବା ପାଇଁ କାମ କରିବାକୁ ନବୀନ ପରାମର୍ଶ ଦେଇଥିଲେ । କାର୍ଯ୍ୟକ୍ରମରେ ଯୋଗ ଦେଇଥିବା ବୌଦ୍ଧ, ଶିଖ୍‌, ମୁସ୍‌ଲିମ୍‌ ଓ ଖ୍ରୀଷ୍ଟିଆନ୍‌ ଧର୍ମର ପ୍ରତିନିଧିମାନେ ନବୀନଙ୍କୁ ସମ୍ବର୍ଦ୍ଧିତ କରିଥିଲେ । ଅଭିନେତା ତଥା ସାଂସଦ ମୁନ୍ନା ଖାଁ କାର୍ଯ୍ୟକ୍ରମ ପରିଚାଳନା କରିଥିଲେ ।