ମୁମ୍ବାଇ: ଜମି ହେରଫେର ମାମଲାରେ ଗିରଫ ହୋଇଥିବା ଏନସିପି ନେତା ଏବଂ ପୂର୍ବତନ ମନ୍ତ୍ରୀ ନଓ୍ବାବ ମଲିକ ଅସୁସ୍ଥ । ଶନିବାର ସକାଳ ପ୍ରାୟ ୧୦ଟା ବେଳେ ତାଙ୍କର ସ୍ବାସ୍ଥ୍ୟବସ୍ଥା ବିଗିଡ଼ିଥିଲା । ଏନେଇ ନଓ୍ବାବ ମଲିକଙ୍କ ଝିଅ ସନା ମଲିକ ସୂଚନା ଦେଇଛନ୍ତି । ସନା ମଲିକଙ୍କ ଅନୁସାରେ ନଓ୍ବାବ ମଲିକଙ୍କୁ କୁର୍ଲାର କ୍ରିଟି କେୟାର ହସ୍ପିଟାଲର ଏମର୍ଜେନ୍ସି ଓ୍ବାର୍ଡରେ ଭର୍ତ୍ତି କରାଯାଇଛି । ନଓ୍ବାବ ମଲିକଙ୍କୁ ଡାକ୍ତରଙ୍କ ଏକ ଟିମ୍ ଚିକିତ୍ସା କରୁଛନ୍ତି । ପରିବାର ଲୋକଙ୍କ ଅନୁସାରେ, ନଓ୍ବାବ ମଲିକଙ୍କୁ ଶ୍ବାସକ୍ରିୟା କରିବାରେ କଷ୍ଟ ଅନୁଭୂତ ହେଉଛି । 

 ନଓ୍ବାବ ମଲିକଙ୍କୁ ୨୩ ଫେବୃଆରୀ ୨୦୨୨ରେ ଇଡି ଗିରଫ କରିଥିଲା । ନଓ୍ବାବ ମଲିକଙ୍କୁ କୁଖ୍ୟାତ ଗ୍ୟାଙ୍ଗଷ୍ଟର ଦାଉଦ ଇବ୍ରାହିମ ସହ ଜଡ଼ିତ ଏକ ମାମଲାରେ ଗିରଫ କରାଯାଇଛି । ଦାଉଦ ସହ ଟଙ୍କା ନେଣଦେଣ ଏବଂ ତା ଭଉଣୀ ସହ ଜମି ଦିଆନିଆ ମାମଲାରେ ଜଡ଼ିତ ଥିଲେ ନଓ୍ବାବ ମଲିକ । ଗିରଫ ହେବା ପରେ ନଓ୍ବାବ ମଲିକ ଅନେକ ଦିନ ଜେଲରେ ଥିଲେ । ନିକଟ ଅତୀତରେ ତାଙ୍କୁ ସ୍ବାସ୍ଥ୍ୟଗତ କାରଣ ଯୋଗୁଁ ଜାମିନ ମିଳିଥିଲା । 

ସେପଟେ ଏନସିପିରେ ବିଦ୍ରୋହ ପରେ ଅଜିତ ପାଓ୍ବାରଙ୍କ ଗୋଷ୍ଠୀରେ ଅଛନ୍ତି ନଓ୍ବାବ ମଲିକ । ବିଧନମଣ୍ଡଳ ଅଧିବେଶନ ଚାଲିଥିବା ବେଳେ ନଓ୍ବାବ ମଲିକ ଶାସକ ଦଳର ବିଧାୟକଙ୍କ ପାଖରେ ବସିଥିଲେ । ଏହକୁ ବିରୋଧ କରି ବିଜେପି ବିଧାୟକ ଏବଂ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍‌ ଅଜିତ ପାଓ୍ବାରଙ୍କୁ ଚିଠି ଲେଖିଥିଲେ । ନଓ୍ବାବ ମଲିକଙ୍କ ଉପରେ ଯେଉଁଭଳି ସବୁ ଅଭିଯୋଗ ରହିଛି ତାଙ୍କୁ ଗୃହକ ଡାକିବା ଉଚିତ ନୁହେଁ ବୋଲି ଫଡନାଭିସ୍‌ କହିଥିଲେ । ସେପଟେ ଏବେ ନିର୍ବାଚନୀ ପ୍ରସ୍ତୁତି ଜୋରଦାର ଚାଲିଥିବା ବେଳେ ସାର୍ବଜନୀନ ସ୍ଥାନରେ ନଓ୍ବାବ ମଲିକଙ୍କୁ ଦେଖିବାକୁ ମିଳୁନାହିଁ । ଅସୁସ୍ଥ ଥିବପା ଯୋଗୁ ନଓ୍ବାବ ମଲିକ ରାଜନୀତିକୁ ନିଜକୁ ଦୂରେଇ ରଖିଛନ୍ତି ।