ଭୁବନେଶ୍ୱର,୧୩/୦୮: ରାଜ୍ୟରେ ଲାଗୁ ହେବ ଜାତୀୟ ଶିକ୍ଷାନୀତି-୨୦୨୦ । ଏନେଇ ସୂଚନା ଦେଇଛନ୍ତି ରାଜ୍ୟ ସରକାର । ପ୍ରାରମ୍ଭିକ ଭାବେ ଉଚ୍ଚଶିକ୍ଷାରେ ଜାତୀୟ ଶିକ୍ଷା ନୀତି ଲାଗୁକରିବାକୁ ଯାଉଛନ୍ତି ରାଜ୍ୟ ସରକାର । ଏଥିପାଇଁ ପାଠ୍ୟକ୍ରମ ମଧ୍ୟ ଏପ୍ରକାର ପ୍ରସ୍ତୁତ ସରିଛି। ନୂଆ କରି ସ୍ନାତକରେ ନାମ ଲେଖାଇଥିବା ପିଲାମାନଙ୍କଠାରୁ ଏହା ଆରମ୍ଭ ହେବ ବୋଲି ସୂଚନା ରହିଛି । ତେବେ ମଙ୍ଗଳବାର ରାଜ୍ୟର ସମସ୍ତ ସରକାରୀ ବିଶ୍ୱବିଦ୍ୟାଳୟର କୁଳପତି, କଲେଜ ଅଧ୍ୟକ୍ଷଙ୍କୁ ନେଇ ଏକ ବୈଠକ ରହିଛି । ଚଳିତ ଶିକ୍ଷାବର୍ଷରୁ ଏହାକୁ ଲାଗୁ କରାଗଲେ କ’ଣ ସୁବିଧା ରହିବ ଓ ଅସୁବିଧା ରହିବ ସେନେଇ ଆଲୋଚନା କରାଯିବ । କୁଳପତିମାନେ ନିଜର ମତ ରଖିବେ । ପରେ ଆଗାମୀ କାର୍ଯ୍ୟକ୍ରମ ପ୍ରସ୍ତୁତ କରାଯିବ ।
ଅନ୍ୟପଟେ ଶିକ୍ଷାବିତ୍ଙ୍କ କହିବା କଥା, ଗତ ୧ ତାରିଖରୁ ନୂତନ କରି ସ୍ନାତକରେ ନାମଲେଖାଇଥିବା ପିଲାମାନଙ୍କ ପାଠପଢ଼ା ଆରମ୍ଭ ହୋଇଛି । ସରକାର ଯଦି ଏନ୍ଇପି ୨୦୨୦ ଲାଗୁ କରନ୍ତି, ସେହି ଅନୁସାରେ ପ୍ରସ୍ତୁତ ସିଲାବସ ପୁଣି ଥରେ ପଢ଼ାଇବାକୁ ପଡ଼ିବ । ତେଣୁ ସରକାର ତୁରନ୍ତ ଏହାକୁ ଲାଗୁ କରନ୍ତୁ କିମ୍ବା ଆସନ୍ତାବର୍ଷକୁ ଲାଗୁ କଲେ ଭଲ ହେବ । ଏବେ ସୁଦ୍ଧା ରାଜ୍ୟ ଉଚ୍ଚଶିକ୍ଷା ପରିଷଦ ପକ୍ଷରୁ ସ୍ନାତକ ପାଇଁ ୪୦ଟି ବିଷୟର ପାଠ୍ୟକ୍ରମ ଏନ୍ଇପି ୨୦୨୦ ଅନୁଯାୟୀ ପ୍ରସ୍ତୁତ ସରିଛି । ଏପରିକି ବିଶ୍ୱବିଦ୍ୟାଳୟ ସିଡିସିରେ ଏନେଇ ଆଲୋଚନା କରାଯାଇଛି ।
ଏନ୍ଇପି ୨୦୨୦ ଲାଗୁ ହେଲେ ଡିଗ୍ରୀ କୋର୍ସ ୩ ବର୍ଷ ବଦଳରେ ୪ ବର୍ଷିଆ ହେବ । ଶିକ୍ଷାର୍ଥୀମାନେ ନିଜ ପସନ୍ଦରେ ଯେ କୌଣସି ବିଷୟକୁ ଚୟନ କରିପାରିବେ । ଅଧାରୁ ପାଠପଢ଼ା ଛାଡ଼ିଲେ ମଧ୍ୟ ପରବର୍ତ୍ତୀ ସମୟରେ ଯୋଗ ଦେଇ ପଢ଼ିପାରିବେ ।
ସ୍ନାତକରେ ଗବେଷଣା କଲେ ୪ ବର୍ଷିଆ ସ୍ନାତକ ଡିଗ୍ରୀ ପାଇପାରିବେ । ଏମ୍ଫିଲ୍ ପାଠ୍ୟକ୍ରମ ଉଠାଇ ଦିଆଯିବ । ଦକ୍ଷତା ବିକାଶକୁ ଗୁରୁତ୍ୱ ଦିଆଯିବ । ଏକକ ପ୍ରବେଶିକା ପରୀକ୍ଷାକୁ ଜାତୀୟ ସଂସ୍ଥା ପରିଚାଳନା କରିବ । ଗବେଷଣାକୁ ପ୍ରାଧାନ୍ୟ ଦିଆଯିବ । ଗୁଣାତ୍ମକ ଶିକ୍ଷା ପାଇଁ ସରକାର ବିକାଶ କରିବେ । ସ୍ଥାନୀୟ ଭାଷାକୁ ଗୁରୁତ୍ୱ ମିଳିବ । ସୂଚନାଯୋଗ୍ୟ, କର୍ଣ୍ଣାଟକ ସରକାର ପ୍ରଥମ କରି ୨୦୨୧ ଅଗଷ୍ଟରେ ଏନ୍ଇପି ୨୦୨୦ ଲାଗୁ କରିଛନ୍ତି । ସେହିପରି ସେହିବର୍ଷ ମଧ୍ୟପ୍ରଦେଶ ସରକାର ମଧ୍ୟ ଲାଗୁ କରିଛନ୍ତି । ଉତ୍ତରପ୍ରଦେଶ, ଆସାମ, ରାଜସ୍ଥାନ ଆଦି ବିଭିନ୍ନ ରାଜ୍ୟରେ ଏନ୍ଇପି ୨୦୨୦ ଲାଗୁ ହୋଇଛି ।
