ମାଲକାନଗିରି,୭/୬: ସାପ କାମୁଡାରେ ଅସୁସ୍ଥ ହୋଇ ଚିତ୍ରକୋଣ୍ଡାର ନବ ନିର୍ବାଚିତ ବିଧାୟକ ମଙ୍ଗୁଖିଲ ମାଲକାନଗିରି ଜିଲ୍ଲା ହସ୍ପିଟାଲରେ ଚିକିତ୍ସିତ ହେଉଥିଲେ, ସେ ସୁସ୍ଥ ହୋଇ ଘରକୁ ଯିବା ପୂର୍ବରୁ ଆଜି ଜିଲ୍ଲା ମୁଖ୍ୟ ଚିକିତ୍ସାଳୟରେ ସ୍ୱାସ୍ଥ୍ୟସେବା ବ୍ୟବସ୍ଥା ନେଇ ସମୀକ୍ଷା କରିଛନ୍ତି ଓ ରୋଗୀଙ୍କୁ ଉତ୍ତମ ସେବା ଯୋଗାଇ ଦେବା ନିମନ୍ତେ ଜିଲ୍ଲା ମୁଖ୍ୟ ସ୍ୱାସ୍ଥ୍ୟ ଅଧିକାରୀ ଓ ଡାକ୍ତରଙ୍କୁ ପରାମର୍ଶ ଦେଇଛନ୍ତି ।
ଚିତ୍ରକୋଣ୍ଡା ନବାଗତ ବିଧାୟକ ଚଳିତ ନିର୍ବାଚନରେ ମାଲକାନଗିରି ଜିଲ୍ଲାର ଚିତ୍ରକୋଣ୍ଡାରେ ନିର୍ବାଚିତ ହୋଇଥିବା କଂଗ୍ରେସ ବିଧାୟକ ମଙ୍ଗୁ ଖିଲ ବିଧାୟକ ଭାବେ ଶପଥ ପାଠ କରିବା ପୂର୍ବରୁ ହିଁ ଲୋକଙ୍କ ପାଇଁ କାର୍ଯ୍ୟ ଆରମ୍ଭ କରିଦେଇଛନ୍ତି । ସ୍ୱାସ୍ଥ୍ୟ ଶିକ୍ଷା ଓ ଜନ ସେବାରେ ନିଜକୁ ବ୍ରତୀ ରଖିବାକୁ କହିଥିବା ମଙ୍ଗୁଙ୍କୁ ଗତ ବୁଧବାର ରାତିରେ ସର୍ପଘାତ ହୋଇଥିଲା । ଫଳରେ ସେ ପ୍ରଥମେ କୁଡ଼ୁମୁଲୁଗୁମା ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହୋଇଥିଲେ । ତେବେ ସେ ଆଜି ସୁସ୍ଥ ହେବା ପରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ସ୍ୱାସ୍ଥ୍ୟ ସେବାର ସମୀକ୍ଷା କରିଛନ୍ତି । ରୋଗୀଙ୍କୁ କିପରି ସ୍ୱାସ୍ଥ୍ୟ ସେବା ଯୋଗାଇ ଦିଆଯାଉଛି ସେ ନେଇ ସେ ମେଡ଼ିକାଲ ଅଧିକାରୀ ଓ ଡାକ୍ତରଙ୍କ ସହ ଆଲୋଚନା କରି ରୋଗୀଙ୍କ ସହ ମଧ୍ୟ ଆଲୋଚନା କରିଥିଲେ ।
ଏହାସହ ରୋଗୀଙ୍କୁ ଦିଆଯାଉଥିବା ଖାଦ୍ୟ ପେୟ, ଔଷଧ ଓ ଅନ୍ୟାନ୍ୟ ସୁବିଧାକୁ ମଧ୍ୟ ପରଖିଥିଲେ । ତେବେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଅନେକ ବିଭାଗରେ ଡାକ୍ତରଙ୍କ ସଂଖ୍ୟା କମ ରହିଥିବା ଅନେକ ବିଭାଗରେ କର୍ମଚାରୀ ଅବହେଳା ଥିବା ସେ ପରିଲିଖିତ କରିଥିଲେ । ତେବେ କିପରି ଯଥାଶୀଘ୍ର ଚିକିତ୍ସାଳୟରେ ଆଗାମୀ ଦିନରେ ଏହି ଖାଲି ପଡିଥିବା ପଦବୀ ଗୁଡିକ ପୂରଣ ହେବ ସେନେଇ ସେ ପଦକ୍ଷେପ ନେବେ ଓ ବିଧାନସଭା ରେ ଦାବି ଉପସ୍ଥାପନ କରିବେ ବୋଲି ପ୍ରକାଶ କରିଛନ୍ତି ।
