ନୂଆଦିଲ୍ଲୀ,୦୯/ ୦୫: ଏପ୍ରିଲ ମାସରେ ନିରାମିଷ ଥାଳି ପ୍ରସ୍ତୁତ କରିବା ଲାଗି ଖର୍ଚ୍ଚ ୮% ବୃଦ୍ଧି ହୋଇ ୨୭.୪ ଟଙ୍କା ଛୁଇଁଛି । ପିଆଜ, ଆଳୁ, ଟମାଟୋ ଭଳି ଅନ୍ୟ ଆବଶ୍ୟକୀୟ ସାମଗ୍ରୀ ଦର ବୃଦ୍ଧି ଯୋଗୁ ଏଭଳି ହୋଇଛି । ସେହିଭଳି ଘରେ ପ୍ରସ୍ତୁତ ହେଉଥିବା ଆମୀଷ ଥାଳି ପାଇଁ ଖର୍ଚ୍ଚ ୪% ହ୍ରାସ ପାଇ ୫୬.୩ ଟଙ୍କା ରହିଥିବା କ୍ରିସିଲ ମାର୍କେଟ ଇଣ୍ଟେଲିଜେନ୍ସ ଆଣ୍ଡ୍ ଆନାଲିଟିକ୍ସ ରିପୋର୍ଟରୁ ଜଣାପଡିଛି ।
ପିଆଜ, ଟମାଟୋ, ଆଳୁ ଦର ଯଥାକ୍ରମେ ୪୧%, ୪୦% ଏବଂ ୩୮% ମହଙ୍ଗା ହେବା ଯୋଗୁ ନିରାମିଷ ଥାଳି ପ୍ରସ୍ତୁତି ପାଇଁ ଖର୍ଚ୍ଚ ବଢ଼ିଛି । ରବି ଋତୁରେ ପିଆଜ ଅମଳ କମିବା ଏବଂ ପଶ୍ଚିମବଙ୍ଗରେ ଆଳୁ ଚାଷ ପ୍ରଭାବିତ ହେବା ଯୋଗୁ ଦର ବୃଦ୍ଧି ହୋଇଛି । ସେହିଭଳି ଚାଉଳ ଏବଂ ଡାଲି ଦର ଯଥାକ୍ରମେ ୧୪% ଏବଂ ୨୦% ବୃଦ୍ଧି ହେବା ଯୋଗୁ ଏହା ଖାଦ୍ୟ ପ୍ରସ୍ତୁତିକୁ ମହଙ୍ଗା କରିଛି । ସେହିଭଳି ଜିରା, ଲଙ୍କା, ତେଲ ଦର ଅପେକ୍ଷାକୃତ କମିବା ଯୋଗୁ ଏହା ଥାଳି ପ୍ରସ୍ତୁତିରେ ଖର୍ଚ୍ଚକୁ ବେଶି ବଢ଼ାଇନାହିଁ ।
