ନୂଆଦିଲ୍ଲୀ: ଦେଶରେ ରାଜପଥ ନେଟୱାର୍କକୁ ମଜବୁତ କରିବା ପାଇଁ କେନ୍ଦ୍ର ସରକାର ଆସନ୍ତା ବର୍ଷରେ ୭୪ ଟି ନୂଆ ଟନେଲ ନିର୍ମାଣ କରିବାକୁ ନିଷ୍ପତ୍ତି ନେଇଛନ୍ତି । ଏହି ପ୍ରକଳ୍ପ ଗୁଡିକର ଆନୁମାନିକ ଖର୍ଚ୍ଚ ପ୍ରାୟ ୧ ଲକ୍ଷ କୋଟି ଟଙ୍କା। ସରକାରଙ୍କ ପକ୍ଷରୁ ପୂର୍ବରୁ ୧୫ ହଜାର କୋଟି ଟଙ୍କା ଖର୍ଚ୍ଚରେ ୪୯ କିଲୋମିଟର ଲମ୍ବା ୩୫ ଟି ଟନେଲ ନିର୍ମାଣ ହୋଇସାରିଛି ।  ବର୍ତ୍ତମାନ ସରକାର ୨୭୩ କିଲୋମିଟର ନୂତନ ଟନେଲ ନିର୍ମାଣ ପାଇଁ ପ୍ରସ୍ତୁତ ହେଉଛନ୍ତି ।

କେନ୍ଦ୍ର ସଡକ ପରିବହନ ଏବଂ ରାଜପଥ ମନ୍ତ୍ରୀ ନିତିନ ଗଡକରୀ କହିଛନ୍ତି ଯେ, ଗତ କିଛି ବର୍ଷ ମଧ୍ୟରେ ଦେଶରେ ଟନେଲର ନେଟୱାର୍କ ବହୁତ ଶକ୍ତିଶାଳୀ ହୋଇଛି । ବର୍ତ୍ତମାନ ୪୦ ହଜାର କୋଟି ଟଙ୍କା ବ୍ୟୟରେ ୧୩୪ କିଲୋମିଟର ଲମ୍ବର ପ୍ରାୟ ୬୯ ଟି ଟନେଲ ନିର୍ମାଣ କରାଯାଉଛି । ରାଷ୍ଟ୍ରୀୟ ରାଜଧାନୀରେ FICCI ର ଟନେଲିଂ ଇଣ୍ଡିଆ ସମ୍ମିଳନୀରେ ମନ୍ତ୍ରୀ କହିଛନ୍ତି ଯେ ଭାରତକୁ ୫ ଟ୍ରିଲିୟନ ଡଲାର ଅର୍ଥନୀତି କରିବା ଦିଗରେ ସରକାର କାର୍ଯ୍ୟ କରୁଛନ୍ତି।

କେନ୍ଦ୍ର ମନ୍ତ୍ରୀ କହିଛନ୍ତି ଯେ, ରାସ୍ତାରେ ନାଗରିକଙ୍କ ସୁରକ୍ଷା ହେଉଛି ପ୍ରଥମ ପ୍ରାଥମିକତା। ବର୍ଷା, ଭୂସ୍ଖଳନ ଏବଂ ବନ୍ୟା ପରିସ୍ଥିତିରୁ ରାସ୍ତାକୁ ରକ୍ଷା କରିବା ପାଇଁ ବ୍ୟୟବହୁଳ ସ୍ଥାୟୀ ସମାଧାନ ଆବଶ୍ୟକ । ରାଜପଥ ନେଟୱାର୍କକୁ ନିରନ୍ତର ମଜବୁତ କରିବା ସରକାରଙ୍କ ଧ୍ୟାନ । ମାର୍ଚ୍ଚରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରଣନୀତିଗତ ଭାବରେ ଗୁରୁତ୍ୱପୂର୍ଣ୍ଣ ଅରୁଣାଚଳ ପ୍ରଦେଶରେ ସେଲା ଟନେଲର ଉଦଘାଟନ କରିଥିଲେ। ଏହି ପ୍ରକଳ୍ପର ମୂଲ୍ୟ ୮୨୫ କୋଟି ଟଙ୍କା ଥିଲା । ଏହା ହେଉଛି ବିଶ୍ବର ଦୀର୍ଘତମ ଦୁଇ-ଲେନ ଟନେଲ ଯାହାକି ୧୩ ହଜାର ଫୁଟ ଉଚ୍ଚରେ ନିର୍ମିତ । ସେହିଭଳି ଅକ୍ଟୋବର ୨୦୨୦ ରେ ଅଟଳ ଟନେଲର ଉଦଘାଟନ କରିଥିଲେ । ଏହି ଟନେଲ ନିର୍ମାଣ ପାଇଁ ୧୦ ବର୍ଷ ସମୟ ଲାଗିଥିଲା । ଏଥିପାଇଁ ୩୨ ଶହ କୋଟି ଟଙ୍କା ଖର୍ଚ୍ଚ ହୋଇଥିଲା ।