ଭୁବନେଶ୍ୱର,୨୯/୦୩: ବିଗୁଲ୍ ବାଜିଲା ହେଲେ ନିର୍ବାଚନ ମୈଦାନରେ ନୁହେଁ ପ୍ରେକ୍ଷାଳୟରେ । ସବୁ ପ୍ରତୀକ୍ଷାର ଅନ୍ତ ଘଟାଇ ବଡ଼ ପରଦାକୁ ଆସିଲା ନୂଆ ଓଡ଼ିଆ ସିନେମା ‘ବିଗୁଲ୍’ । ଫ୍ରାଇଡେ ରିଲିଜ୍ ଅବସରରେ ସାରା ଓଡ଼ିଶାର ୪୨ଟି ପ୍ରେକ୍ଷାଳୟ ସମେତ ବେଙ୍ଗାଲୁରୁର ୨ଟି ପ୍ରେକ୍ଷାଳୟରେ ସିନେମା ରିଲିଜ୍ ହୋଇଥିବା ପ୍ରଯୋଜନା ସଂସ୍ଥା ପକ୍ଷରୁ ପ୍ରକାଶ । ଏହାର କଥାବସ୍ତୁ ଓଡ଼ିଶାର ଦଣ୍ଡନାଚ ଉପରେ ଆଧାରିତ । ଅନ୍ଧବିଶ୍ୱାସ ବିରୋଧରେ ଲୋକଙ୍କୁ ସଚେତନ କରିବା ଊଦ୍ଦେଶ୍ୟରେ ସିନେମା ‘ବିଗୁଲ୍’ ନିର୍ମିତ ହୋଇଛି । ଗାଁର ଜଣେ ଶିକ୍ଷିତା ଯୁବତୀ କିଭଳି ଏହା କରିବାରେ ସକ୍ଷମ ହେଉଛନ୍ତି ତାହା ସିନେମାରେ ଦର୍ଶାଯାଇଛି ।
ନିର୍ଦ୍ଦେଶକ ଅଜୟ ପାଢ଼ୀଙ୍କ ଅନୁସାରେ ‘ବିଗୁଲ୍’ ହେଉଛି ପ୍ରଥମ ଓଡ଼ିଆ ସାଂସ୍କୃତିକ ସିନେମା । ଏଥିରେ ନାୟିକା ସୁପ୍ରିୟା । ତାଙ୍କ ବିପକ୍ଷରେ ‘ଶଙ୍କର’ ଫେମ୍ ନାୟକ ଦେବାନନ୍ଦ ଅଛନ୍ତି । ଏନ୍ଏସ୍ଡି ନିର୍ଦ୍ଦେଶକ ତଥା ବିଶିଷ୍ଟ ଅଭିନେତା ଚିତ୍ତରଞ୍ଜନ ତ୍ରିପାଠୀ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି । ଫିଲ୍ମର ଟିଜର୍କୁ ଦର୍ଶକ ବହୁ ମାତ୍ରାରେ ପସନ୍ଦ କରିଛନ୍ତି । ଟିଜର୍ରେ ଶେଷ ଭାଗରେ ଓଲିଉଡ୍ର ଲୋକପ୍ରିୟ ଅଭିନେତା ଅନୁଭବ ମହାନ୍ତିଙ୍କୁ ଦେଖିବାକୁ ମିଳିଛି ଯାହାକୁ ନେଇ ଦର୍ଶକଙ୍କ ଉତ୍କଣ୍ଠା ଅଧିକ ରହିଛି । ଶୁଣିବାକୁ ମିଳୁଛି ‘ବିଗୁଲ୍-୨’ ଆସିବ । ସେଥିରେ ମୁଖ୍ୟ ଭୂମିକାରେ ଅନୁଭବ ଆସିବେ । ତେବେ ସାଇ ଦରବାର ଫିଲ୍ମସ୍ ବ୍ୟାନରରେ ପ୍ରସ୍ତୁତ ଏହି ସିନେମାର ପ୍ରଯୋଜକ ରହିଛନ୍ତି ଦେବାନନ୍ଦ ବେହେରା । ଅମିତ କୁମାର ଦାସ ସଂଳାପ ରଚନା କରିଥିବା ବେଳେ ସୁରଜ ପୁରୋହିତ ସ୍ୱର ସଂଯୋଜନା କରିଛନ୍ତି । ସତ୍ୟରଞ୍ଜନ ବଳ, ମୋହିତ ଚକ୍ରବର୍ତ୍ତୀ ଓ ଜେମ୍ସ ୱାର୍ଡସ୍ମିଥ୍ ଗୀତ ରଚନା କରିଛନ୍ତି । ଡିଓପିରେ ଯୁଧିଷ୍ଠିର ବେହେରା ଓ ସମ୍ପାଦନାରେ ରଶ୍ମି ରଞ୍ଜନ ଦାଶ କାର୍ଯ୍ୟ କରିଛନ୍ତି । ସେହିପରି ଗତ ଫେବ୍ରୁଆରୀ ୨୩ରେ ମୁକ୍ତିଲାଭ କରିଥିବା ‘ଭୋଟ’ ପୁଣି ଭୁବନେଶ୍ୱର ଓ ରାଉରକେଲାରେ ରିଲିଜ୍ ହେଉଛି ।
