ପ୍ୟାରିସ୍ ୧୦/୦୮: ପ୍ୟାରିସ୍ ଅଲିମ୍ପିକ୍ସରେ ଭାରତୀୟ ପୁରୁଷ ହକି ଦଳ କ୍ରମାନ୍ୱୟରେ ଦୁଇ ଥର ବ୍ରୋଞ୍ଜ ପଦକ ଜିତିବା ଦେଶ ପାଇଁ ଯେତିକି, ଓଡ଼ିଶା ପାଇଁ ମଧ୍ୟ ସେମିତି ଗୌରବର ବିଷୟ । ଜଣେ ଓଡ଼ିଆ ଖେଳାଳି ଅମିତ ରୋହିଦାସ ଏଥର ଦଳରେ ଥିଲେ, ରାଜ୍ୟକୁ ଦ୍ୱିତୀୟ ଅଲିମ୍ପିକ୍ସ ପଦକ ଭେଟି ଦେଇଛନ୍ତି । ଏଥିପାଇଁ ରାଜ୍ୟବାସୀ ବେଶ୍ ଖୁସି ରହିଛନ୍ତି । କିନ୍ତୁ ମୂଳ କଥା ହେଉଛି, ଆଜି ଭାରତୀୟ ହକି ଯେଉଁଠି ପହଞ୍ଚି ପାରିଛି ତା’ ପଛରେ ଓଡ଼ିଶାର ଅବଦାନ ଅତୁଳନୀୟ । ଫଳରେ ଭାରତୀୟ ଦଳ କ୍ରମାନ୍ୱୟରେ ଦୁଇ ଥର ଅଲିମ୍ପିକ୍ସ ପଦକ ଜିତିବାରେ ସଫଳ ହୋଇଛି । ୨୦୧୩ରେ ହକି ଇଣ୍ଡିଆ ଲିଗ୍ (ହିଲ୍)ରେ ଦଳ (କଳିଙ୍ଗ ଲାନସର୍ସ) କିଣି ଓଡ଼ିଶା ପ୍ରତ୍ୟକ୍ଷ ଭାବେ ହକି ସହ ଯୋଡ଼ି ହୋଇଥିଲା । ୨୦୧୪ରେ ଭୁବନେଶ୍ୱରରେ ଆୟୋଜିତ ହୋଇଥିଲା ପ୍ରଥମ ଅନ୍ତର୍ଜାତୀୟ ଟୁର୍ଣ୍ଣାମେଣ୍ଟ ହକି ଚାମ୍ପିଅନ୍ସ ଟ୍ରଫି ।
୨୦୧୮ ଓ ୨୦୨୩ରେ ପୁରୁଷ ହକି ବିଶ୍ୱକପ୍ ଆୟୋଜନ କରିଥିଲା । ୨୦୧୮ ବିଶ୍ୱକପ୍ ପୂର୍ବରୁ ଓଡ଼ିଶା ଭାରତୀୟ ହକିକୁ ପ୍ରୋତ୍ସାହିତ କରିବା ପାଇଁ ବଡ଼ ପଦକ୍ଷେପ ନେଇଥିଲା । ୫ ବର୍ଷ ପାଇଁ ହକି ଇଣ୍ଡିଆର ମୁଖ୍ୟ ପ୍ରାୟୋଜକ ହୋଇଥିଲା । ଟୋକିଓ ଅଲିମ୍ପିକ୍ସରେ ପଦକ ଜିତିବା ପରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭାରତୀୟ ଦଳକୁ ଆର୍ଥିକ ରାଶି ସହ ସମ୍ବର୍ଦ୍ଧିତ କରି ଓଡ଼ିଶା ଆଉ ୧୦ ବର୍ଷ ହକି ଇଣ୍ଡିଆର ପ୍ରାୟୋଜକ ରହିବେ ବୋଲି ଘୋଷଣା କରିଥିଲେ ।
ଗତ ଜୁନ ମାସ ୨୧ ତାରିଖରେ ନୂଆ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ହକି ପାଇଁ ଆଉ ଏକ ବଡ଼ ଘୋଷଣା କରିଥିଲେ । ମୁଖ୍ୟମନ୍ତ୍ରୀ କହିଥିଲେ, ‘ରାଜ୍ୟ ସରକାରଙ୍କ ପକ୍ଷରୁ ୨୦୩୬ରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନର ଶହେ ବର୍ଷ ପୂର୍ତ୍ତି ପାଳନ ହେବାକୁ ଯାଉଛି । ସେଥିପାଇଁ ଭାରତୀୟ ହକି ଦଳର ପ୍ରାୟୋଜକ ଅବଧି ସମୟକୁ ୨୦୩୩ରୁ ଆଉ ତିନି ବର୍ଷ ପାଇଁ ବୃଦ୍ଧି କରାଯିବ । ହକିର ଉନ୍ନତି ପାଇଁ ରାଜ୍ୟ ସରକାରଙ୍କ ପକ୍ଷରୁ ସମସ୍ତ ସହଯୋଗ ଯୋଗାଇ ଦିଆଯିବ ।’
ହକି ଇଣ୍ଡିଆର ମୁଖ୍ୟ ପ୍ରାୟୋଜକ ହେବା ପରେ ଓଡ଼ିଶା ବାର୍ଷିକ ୨୦ କୋଟିରୁ ଊଦ୍ଧ୍ୱର୍ ଟଙ୍କା ପ୍ରଦାନ କରି ଆସୁଛି । ଯେଉଁ ଅର୍ଥରେ ଭାରତୀୟ ଖେଳାଳିଙ୍କୁ ଅତ୍ୟାଧୁନିକ ସୁବିଧା ସୁଯୋଗ, ପ୍ରଶିକ୍ଷଣ ମିଳିପାରିଥିଲା ଏବଂ ଦଳର ପ୍ରଦର୍ଶନରେ ଉନ୍ନତି ଆସିଥିଲା ।
ପ୍ୟାରିସରେ ବ୍ରୋଞ୍ଜ ଜିତିବା ପରେ ମୁଖ୍ୟମନ୍ତ୍ରୀ ଶ୍ରୀ ମାଝୀ ଭାରତୀୟ ଦଳ ଏବଂ ଓଡ଼ିଆ ଖେଳାଳି ଅମିତଙ୍କ ପାଇଁ ପୁରସ୍କାର ରାଶି ଘୋଷଣା କରିଛନ୍ତି । ମୁଖ୍ୟମନ୍ତ୍ରୀ କହିଥିଲେ, ‘ ମୁଁ ରାଜ୍ୟ ସରକାରଙ୍କ ପକ୍ଷରୁ ପ୍ରତ୍ୟେକ ଖେଳାଳିଙ୍କୁ ୧୫ ଲକ୍ଷ ଟଙ୍କା ଏବଂ ପ୍ରତ୍ୟେକ ସପୋର୍ଟ ଷ୍ଟାଫଙ୍କୁ ୧୦ ଲକ୍ଷ ଟଙ୍କା ଲେଖାଏଁ ପୁରସ୍କାର ଦେବାକୁ ଘୋଷଣା କରୁଛି । ଓଡ଼ିଆ ଖେଳାଳି ଅମିତ୍ ରୋହିଦାସଙ୍କୁ ୪ କୋଟି ଟଙ୍କାର ସ୍ୱତନ୍ତ୍ର ପୁରସ୍କାର ମଧ୍ୟ ପ୍ରଦାନ କରାଯିବ ।’
ସବୁଠୁ ବଡ଼ କଥା ଓଡ଼ିଶା ଭାରତୀୟ ହକିର ପୁନରୁଦ୍ଧାର କରିବାରେ ପ୍ରମୁଖ ଭୂମିକା ନେଇଛି । କିନ୍ତୁ ରାଜ୍ୟ ହକି ଧୀରେ ଧୀରେ ଅସ୍ଥିତ୍ୱ ହରାଉଛି । ଭିତ୍ତିଭୂମି ରହିଛି, ଅତ୍ୟାଧୁନିକ ସୁବିଧା ସୁଯୋଗ ମଧ୍ୟ ଯୋଗାଇ ଦିଆଯାଉଛି । କିନ୍ତୁ ଜାତୀୟ ଦଳରେ ଓଡ଼ିଶା ଖେଳାଳିଙ୍କ ପ୍ରତିନିଧିତ୍ୱ ହ୍ରାସ ପାଇଁ ୧ରେ ପହଞ୍ଚିଲାଣି । ଏହି ସଂଖ୍ୟା କେମିତି ଆଗକୁ ବୃଦ୍ଧି ପାଇବ ସେ ଦିଗରେ ନୂଆ ସରକାର ଗଭୀର ଭାବେ ଦୃଷ୍ଟି ଦେବେ ବୋଲି ଆଶା।
