ଗୋପ,୧୧/୦୬: ପୁରୀ ଜିଲ୍ଲା ଗୋପ ବ୍ଲକ୍ର ଦୁଇଟି ସ୍ଥାନରୁ ଫେରିଲା ଅଏଲ୍ ଇଣ୍ଡିଆ କମ୍ପାନି । ବର୍ଷ ବର୍ଷ ଧରି କମ୍ପାନି ପକ୍ଷରୁ କାର୍ଯ୍ୟ ଆରମ୍ଭ ହୋଇ ପେଟ୍ରୋଲ୍ ଓ ପ୍ରାକୃତିକ ଗ୍ୟାସ୍ ସନ୍ଧାନ କାର୍ଯ୍ୟ ଚାଲିଥିଲା । ହେଲେ ସନ୍ଧାନ କାର୍ଯ୍ୟ ସମ୍ପୂର୍ଣ୍ଣ ଫେଲ୍ ମାରିବା ପରେ କମ୍ପାନି ସମସ୍ତ ଯନ୍ତ୍ରାଂଶ ସହ ଫେରି ଯାଇଥିବା ଜଣାପଡ଼ିଛି ।
ଅଏଲ୍ ଇଣ୍ଡିଆ କମ୍ପାନି ୨୦୨୦ରେ ଗୋପ ଅଞ୍ଚଳରେ ପେଟ୍ରୋଲ୍ ଗ୍ୟାସ ଥିବା ସୂଚନାପାଇ ଆରମ୍ଭ କରିଥିଲା ସର୍ଭେ କାର୍ଯ୍ୟ । ଏହା କରୁଥିଲା ଆଲ୍ଫା ଜିଓ ଲିମିଟେଡ୍ କମ୍ପାନି । ସାଟେଲାଇଟ୍ ମାଧ୍ୟମରେ ଜଣାପଡ଼ିଥିଲା ଗୋପର କୁଶୁପୁର ଓ ମହଲପଡ଼ା ପଞ୍ଚାୟତର ଚିତ୍ତେରା ନିକଟରେ ରହିଛି ପେଟ୍ରୋଲ୍ ଓ ଗ୍ୟାସ୍ । କମ୍ପାନି ତାର ପ୍ରାଥମିକ କାର୍ଯ୍ୟ ପ୍ରଥମେ ଗୋପର କୁଶୁପୁରଠାରେ ଆରମ୍ଭ କରି ଯେଉଁ ଅଞ୍ଚଳରେ ପେଟ୍ରୋଲ୍ ଓ ଗ୍ୟାସ୍ ସନ୍ଧାନ ପାଇଥିଲା ସେଠାକୁ ଯାଇ ଜମି ଚିହ୍ନଟ କରିଥିଲା । ଗୋପ ଅଞ୍ଚଳର ପ୍ରାୟ ୩୩ ଜଣ ଜମି ମାଲିକଙ୍କୁ ଡାକି ୩ ବର୍ଷ ପାଇଁ ସେମାନଙ୍କଠାରୁ ଜମିଗୁଡ଼ିକ ଲିଜ୍ରେ ନେଇ କୋଟି କୋଟି ଟଙ୍କା ଦେଇଥିଲା । ପରେ ସେହି ସ୍ଥାନରେ ପାଚେରି କରାଯାଇ କାର୍ଯ୍ୟ ଆରମ୍ଭ ହୋଇଥିଲା । କିଛିଦିନ ପରେ ବୋରିଂ ହେଉଥିବା ସ୍ଥାନରେ ବଡ଼ ପଥର ପାହାଡ଼ ପଡ଼ିବାରୁ ରିଗ୍ ମେସିନ୍ ବୋରିଂ କରିପାରି ନଥିଲା । ଫଳରେ ଗୋପରେ ପେଟ୍ରୋଲ୍ ସନ୍ଧାନ କାର୍ଯ୍ୟ ବନ୍ଦ ହୋଇଥିଲା ।
ଏହାପରେ କୁଶୁପୁରଠାରେ କାର୍ଯ୍ୟ ବନ୍ଦ କରି ଚିତ୍ତେରା ଫେରି ଯାଇଥିଲା । ସେଠାରେ ମାଲିକଙ୍କଠାରୁ ଜମି ଅଧିଗ୍ରହଣ କରିଥିଲା । କୁଶୁପୁରଠାରୁ ସମସ୍ତ ଯନ୍ତ୍ରାଂଶ ଉଠାଇ ନେଇ ମହଲପଡ଼ା ଚିତ୍ତେରାଠାରେ କାର୍ଯ୍ୟ ଆରମ୍ଭ କରି ରିଗ୍ ମେସିନ୍ ମାଧ୍ୟମରେ ବୋରିଂ କରାଯାଇ ପେଟ୍ରୋଲ୍ ସନ୍ଧାନ କରାଯାଇଥିଲା ।
