ନୂଆଦିଲ୍ଲୀ, ୧୪।୧୧: ପୃଥିବୀରେ ରହିଛି ଅନେକ ରହସ୍ୟମୟ ସ୍ଥାନ । ପୂର୍ବରୁ ଆମେ ଅନେକ ଏଭଳି ସ୍ଥାନ ବିଷୟରେ କହିଛୁ ଯାହାର ରହସ୍ୟ ପଛର କାରଣ ବୈଜ୍ଞାନିକମାନେ ଏଯାଏ ପାଇନାହାନ୍ତି । ଆଜି ଆମେ ଠିକ୍ ଏହିପରି ଏକ ରହସ୍ୟମୟ ସ୍ଥାନ ବିଷୟରେ କହିବୁ, ଯାହା ବେଶ୍ ଆଶ୍ଚର୍ଯ୍ୟକର । ବିଶ୍ୱରେ ଏକ ଏଭଳି ଗାଁ ଅଛି, ଯେଉଁଠାରେ ଦୀର୍ଘ ୧୨ ବର୍ଷ ଧରି କେବଳ ଝିଅ ହିଁ ଜନ୍ମ ହେଉଛନ୍ତି । ଅର୍ଥାତ୍, ଗତ ୧୨ ବର୍ଷ ଧରି ଏଠାରେ ଜନ୍ମ ହୋଇନାହାନ୍ତି ପୁଅ । ଏହା କେମିତି ସମ୍ଭବ ହୋଇପାରେ । ଅଜବ ଲାଗୁଥିଲେ ବି ଏହା ସତ । ଏହି ରହସ୍ୟ ବିଷୟରେ ଜାଣି ବୈଜ୍ଞାନିକମାନେ ମଧ୍ୟ ଆଶ୍ଚର୍ଯ୍ୟ ହୋଇଛନ୍ତି । ତେବେ ଏ ରହସ୍ୟ ପଛରେ କ’ଣ ରହିଛି କାରଣ ?
ପୋଲାଣ୍ଡରେ ଅବସ୍ଥିତ ଏହି ଗାଁ । ଯାହାର ନାଁ ମିଜେସ୍କ ଆଦ୍ରଜେନସ୍କି । ଏହି ଗାଁର ବିଶେଷତା ହେଉଛି, ଗତ ୧୨ ବର୍ଷ ଧରି ଏଠାରେ କେବଳ ଝିଅ ହିଁ ଜନ୍ମ ହୋଇଆସୁଛନ୍ତି । ୨୦୧୦ ମସିହା ପରଠାରୁ ଗାଁରେ ଜନ୍ମ ହୋଇନାହାନ୍ତି ଗୋଟିଏ ହେଲେ ପୁଅ । ଏହା କେମିତି ସମ୍ଭବ ? ଏହି ଗାଁର ଜନସଂଖ୍ୟା ପାଖାପାଖି ୩୦୦ । ଏଥିରୁ ଅଧିକାଂଶ ମହିଳା ଥିବାବେଳେ ପୁରୁଷଙ୍କ ସଂଖ୍ୟା ଖୁବ୍ କମ୍ । ଗାଁରେ ଏକମାତ୍ର ନାବାଳକ ଥିବା ଜଣାପଡ଼ିଛି । । ଯାହାର ବୟସ ୧୨ ବର୍ଷ । ଗାଁରେ ଅଗ୍ନିଶାମକୋର ୟୁଥ୍ ଭଲ୍ୟୁଣ୍ଟର୍ଙ୍କ ପାଇଁ ଏକ ପ୍ରତିଯୋଗିତାର ଆୟୋଜନ କରାଯାଇଥିଲା । ଗାଁର ପୂରା ଟିମ୍ରେ କେବଳ ଝିଅ ହିଁ ଥିଲେ । ଏହା ପରେ ଲୋକ ନଜରକୁ ଆସିଥିଲା ଏହି ଗାଁ ।
ଏଠାକାର ମେୟର କ୍ରିଷ୍ଟିନା ଜିଡଜିୟାକ୍ଙ୍କ କହିବାନୁସାରେ, ଗାଁର ସ୍ଥିତି ଖୁବ୍ ଅଜବ । ୨୦୧୯ ମସିହାରେ ଗାଁ ଲୋକଙ୍କ ପାଇଁ ମେୟର ଏକ ଆଶ୍ଚର୍ଯ୍ୟକର ଘୋଷଣା କରିଥିଲେ । ଘୋଷଣାରେ ସେ କହିଥିଲେ ଯେ, ଗାଁରେ ଯଦି କୌଣସି ଦମ୍ପତ୍ତିଙ୍କର ପୁଅ ହୁଏ, ତେବେ ସେହି ପରିବାରକୁ ପୁରସ୍କୃତ କରାଯିବ । ତାଙ୍କ ପାଇଁ ପୁରସ୍କାର ରାଶି ମଧ୍ୟ ରଖାଯାଇଥିଲା । ବୈଜ୍ଞାନିକମାନେ ଏଭଳି ଗାଁ ବିଷୟରେ ଜାଣିବାକୁ ପାଇଲେ । ଗାଁକୁ ଆସି ଏହା ପଛରେ ଥିବା ରହସ୍ୟର କାରଣ ସେ ଖୋଜିବାକୁ ଲାଗିଲେ । କିନ୍ତୁ, ପରିଶେଷରେ କୌଣସି ତଥ୍ୟ ମିଳିନଥିଲା । ଗାଁରେ କାହିଁକି କେବଳ ଝିଅ ହିଁ ଜନ୍ମ ନେଉଛନ୍ତି ? ଏହା ପଛରେ କାରଣ ଖୋଜି ପାଇନଥିଲେ । ପୋଲାଣ୍ଡର ରାଜଧାନୀ ବାରସାର ଏକ ବିଶ୍ୱବିଦ୍ୟାଳୟ ଏହି ରହସ୍ୟର ଖୁଲାସା ଉପରେ ରିସର୍ଚ୍ଚ କରିଥିଲେ । କିନ୍ତୁ, ତାଙ୍କୁ ମଧ୍ୟ କୌଣସି ସମାଧାନ ମିଳିନଥିଲା । ଏ ଗାଁ ଆଜି ବି ରହସ୍ୟ ଘେରରେ ।
