ନୂଆଦିଲ୍ଲୀ: ପାକିସ୍ତାନ ଅଧିକୃତ କାଶ୍ମୀର (POK)ରେ ଯୁଦ୍ଧ ଭଳି ଭଳି ପରିସ୍ଥିତି ସୃଷ୍ଟି ହୋଇଛି । ସରକାରଙ୍କ ବିରୋଧରେ ବିରୋଧ ପ୍ରଦର୍ଶନ କରୁଥିବା ଲୋକଙ୍କ ଉପରକୁ ଗୁଳିମାଡ କରାଯାଉଥିବା ଖବର ସାମ୍ନାକୁ ଆସୁଛି । ଶୁକ୍ରବାର ଦିନ ପାକିସ୍ତାନର ଅତ୍ୟାଚାର ବିରୋଧରେ ବହୁ ସଂଖ୍ୟାରେ କାଶ୍ମୀରବାସୀ ରାସ୍ତାକୁ ଓହ୍ଲାଇଥିଲେ । ଇଣ୍ଡିଆ ଟୁଡେ ରିପୋର୍ଟ ଅନୁଯାୟୀ, ଏହି ବିରୋଧ ପ୍ରଦର୍ଶନ ମୁଦ୍ରାସ୍ଫୀତି ବୃଦ୍ଧି, ଭାରି ଟିକସ ଏବଂ ବିଦ୍ୟୁତ ଅଭାବ ହେତୁ କରାଯାଉଛି । ଏହି ସମୟରେ ଜନସାଧାରଣ ଏବଂ ସୁରକ୍ଷା କର୍ମୀଙ୍କ ମଧ୍ୟରେ ସଂଘର୍ଷ ହୋଇଛି । ଏଥିରେ ଜଣେ ପୋଲିସ କର୍ମଚାରୀଙ୍କ ମଧ୍ୟ ମୃତ୍ୟୁ ହୋଇଥିବା ସୂଚନା ମିଳିଛି।
ଏଥି ପାଇଁ ପିଓକେର ଲୋକମାନେ ୧୧ ମଇ ଶନିବାର ଦିନ ଏକ ବିଶାଳ ବିରୋଧର ଯୋଜନା କରିଥିଲେ, କିନ୍ତୁ ଗୋଟିଏ ଦିନ ପୂର୍ବରୁ ମୁଜାଫରବାଦରେ ଅତିରିକ୍ତ ପୋଲିସ ଫୋର୍ସ ଡକାଯାଇ ଲୋକଙ୍କୁ ଅଟକାଇବା ଆରମ୍ଭ କରିଯାଇଥିଲା, ଯାହା ପରେ ଲୋକଙ୍କ ମଧ୍ୟରେ ଆକ୍ରୋଶ ବୃଦ୍ଧି ପାଇଥିଲା । ଏତଦ୍ ବ୍ୟତୀତ ଦାଦିଆଲ୍, ମିରପୁର ଏବଂ ପୋଖର ସମାହାନି, ରାୱାଲକୋଟ ସମେତ ଅନ୍ୟାନ୍ୟ ସ୍ଥାନରୁ ସଂଘର୍ଷର ଖବର ଆସିଛି ।
ଖବର ଅନୁଯାୟୀ, ପାକିସ୍ତାନୀ ସୈନ୍ୟବାହିନୀ ଶୁକ୍ରବାର ଦିନ ମିରପୁର ଜିଲ୍ଲାର ୭୦ ରୁ ଅଧିକ ଲୋକଙ୍କୁ ଗିରଫ କରିଛନ୍ତି । ଗିରଫଦାରୀକୁ ବିରୋଧ କରି ସାଧାରଣ ଜନତା ସୁରକ୍ଷା ବାହିନୀ ଉପରେ ପଥର ଫିଙ୍ଗିଥିଲେ ଏବଂ ଅନେକ ସ୍ଥାନରେ ସଂଘର୍ଷ ହୋଇଥିଲା । ରିପୋର୍ଟ ଅନୁଯାୟୀ, ଏହି ଅଞ୍ଚଳରେ ଧାରା ୧୪୪ ଲାଗୁ କରାଯାଇଛି ।