ନୂଆଦିଲ୍ଲୀ,୨୮/୦୩: ଭାରତୀୟ ମହିଳା ଫୁଟବଲ୍‌ ଦଳର ପ୍ରତିଭାବାନ ଗୋଲ୍‌କିପର ଏଲଙ୍ଗ୍‌ବମ୍‌ ପନ୍ଥୋଇ ଚାନୁ ଦକ୍ଷିଣ ଅଷ୍ଟ୍ରେଲିଆ ମହିଳା ଜାତୀୟ ପ୍ରିମିୟର ଲିଗ୍‌ ଖେଳିବା ପାଇଁ ବୁଧବାର ଅଷ୍ଟ୍ରେଲିଆ ଯାତ୍ରା କରିଛନ୍ତି । ସେ ନିକଟରେ ମେଟ୍ରୋ ୟୁନାଇଟେଡ୍‌  ଡବ୍ଲ୍ୟୁଏଫ୍‌ସି ସହ ଚୁକ୍ତି ସ୍ୱାରକ୍ଷର କରିଥିଲେ । ଚଳିତ  ସିଜନରେ ସେ କ୍ଲବ୍‌  ପକ୍ଷରୁ ମୋଟ ୧୮ଟି  ମ୍ୟାଚ୍‌ ଖେଳିବାର  କାର୍ଯ୍ୟକ୍ରମ ରହିଛି । ଏହାବ୍ୟତୀତ ସେ ଲିଗ୍ କ୍ଲବ୍‌ ଆଡିଲେଡ୍‌ ୟୁନଇଟେଡ୍ ଏଫ୍‌ସି ଦଳ ପ୍ରଶିକ୍ଷଣ ନେବେ ବୋଲି ମେଟ୍ରୋ ୟୁନାଇଟେଡ୍‌ର  ମୁଖ୍ୟ କୋଚ୍‌ ପଲ୍‌ ମୋରିସ୍‌ ପ୍ରକାଶ କରିଛନ୍ତି।

ମୋରିସ୍‌ କହିଛନ୍ତି, ଅଷ୍ଟ୍ରେଲିଆରେ ମହିଳା ଫୁଟବଲ୍‌ରେ ଜଣେ ଦକ୍ଷ ଗୋଲକିପର ମିଳିବା ବହୁତ କଷ୍ଟ । ଚାନୁଙ୍କ ଗୋଲ୍‌ କିପିଙ୍ଗ୍‌ ଦକ୍ଷତା ଆମକୁ ପ୍ରଭାବିତ କରିଥିଲା । ଫଳରେ ଆମେ ତାଙ୍କ ସହ ଚୁକ୍ତି  ସ୍ୱାକ୍ଷର କରିଛୁ । ତାଙ୍କ ଭଳି ଜଣେ ଦକ୍ଷ ଗୋଲ୍‌କିପରଙ୍କୁ ପାଇ ଆମେ ବହୁତ ଉତ୍ସାହିତ ରହିଛୁ । ସେ କ୍ଲବ୍‌ ପକ୍ଷରୁ ସମ୍ପୂର୍ଣ୍ଣ ସିଜନ ଖେଳିବେ ଏବଂ ଆଡିଲେଡ୍‌ ୟୁନାଇଟେଡ୍‌ ଏଫ୍‌ସି ଦଳ ସହ ପ୍ରଶିକ୍ଷଣ ନେବେ ।’