କୋରାପୁଟ,୨୯/୦୩: କୋରାପୁଟ ଜିଲ୍ଲାରେ ଏଯାଏଁ କଂଗ୍ରେସ ଓ ବିଜେପି କୌଣସି ଆସନ ପାଇଁ ବିଧାୟକ ପ୍ରାର୍ଥୀଙ୍କ ନାଁ ଘୋଷଣା କରିନାହାନ୍ତି । ଅନ୍ୟପଟେ ପ୍ରାର୍ଥୀମାନଙ୍କ ନାଁ ଘୋଷଣା କରିବାରେ ଆଗରେ ରହିଛି ବିଜେଡି । ପ୍ରଥମ ପର୍ଯ୍ୟାୟରେ ଦଳ କୋରାପୁଟ ଓ କୋଟପାଡ଼ ଆସନ ପାଇଁ ପ୍ରାର୍ଥୀ ଚୟନ କରିଛି । ଜିଲ୍ଲାର ଅନ୍ୟ ୩ଟି ଆସନ ଲକ୍ଷ୍ମୀପୁର, ଜୟପୁର ଓ ପଟ୍ଟାଙ୍ଗି ପାଇଁ କୌଣସି ପ୍ରାର୍ଥୀଙ୍କ ନାଁ ଘୋଷଣା କରାଯାଇନି । ଏସବୁ ନିର୍ବାଚନମଣ୍ଡଳୀରେ ଦଳ ପକ୍ଷରୁ ମହିଳା ପ୍ରାର୍ଥୀ ଏବଂ ନୂଆ ଚେହେରା ଖୋଜାଯାଉଥିବା କୁହାଯାଇଛି । ଏଥିପାଇଁ ପ୍ରାର୍ଥୀ ଚୟନ ବିଳମ୍ବ ହେଉଛି ।
ପଟ୍ଟାଙ୍ଗି ନିର୍ବାଚନମଣ୍ଡଳୀରେ ବିଧାୟକ ରହିଛନ୍ତି ବିଜେଡିର ପୀତମ ପାଢ଼ୀ । ଏଠାରେ ମହିଳା ପ୍ରାର୍ଥୀ ଭାବେ ସ୍ୱତନ୍ତ୍ର ଉନ୍ନୟନ ପରିଷଦ ଉପାଧ୍ୟକ୍ଷା ଲକ୍ଷ୍ମୀ ହନ୍ତାଳଙ୍କ ନାଁ ଚର୍ଚ୍ଚାକୁ ଆସୁଛି । ସେହିପରି ପ୍ରଫୁଲ୍ଲ ପାଙ୍ଗି, ଅଶୋକ ପାଙ୍ଗି, ଲଇଚନ ଖରାଙ୍କ ନାଁ ମଧ୍ୟ ଆଶାୟୀ ତାଲିକାରେ ରହିଛି । ଲକ୍ଷ୍ମୀପୁର ନିର୍ବାଚନମଣ୍ଡଳୀରେ ବିଜେଡିର ପ୍ରଭୁ ଜାନୀ ରହିଛନ୍ତି ବିଧାୟକ । ଏଠାରେ ମଧ୍ୟ ମହିଳା ପ୍ରାର୍ଥୀ ଭାବେ ଜିଲ୍ଲା ପରିଷଦ ଅଧ୍ୟକ୍ଷା ସସ୍ମିତା ମେଲେକାଙ୍କ ନାଁ ଚର୍ଚ୍ଚାରେ ରହିଛି । ତାଙ୍କ ସହ ପୂର୍ବତନ ବିଧାୟକ କୈଳାସ ଚନ୍ଦ୍ର କୁଲେସିକା, ଶଙ୍କର ସାଉନ୍ତା ଓ କୁମୁଦ ଚନ୍ଦ୍ର ସାଉନ୍ତାଙ୍କ ନାଁ ଆଶାୟୀଙ୍କ ମଧ୍ୟରେ ରହିଛି । ଜୟପୁର ନିର୍ବାଚନମଣ୍ଡଳୀରେ ମହିଳା ପ୍ରାର୍ଥୀ ଭାବେ ଡ. ଇନ୍ଦିରା ନନ୍ଦ, ପୂର୍ବତନ ମନ୍ତ୍ରୀ ରବି ନାରାୟଣ ନନ୍ଦ ଏବଂ ସୁବାସ ରାଉତଙ୍କ ନାଁ ଚର୍ଚ୍ଚାରେ ରହିଛି ।
ପ୍ରକାଶଥାଉ କି, ଗତ ସାଧାରଣ ନିର୍ବାଚନରେ ବିଜେଡି ପକ୍ଷରୁ କେବଳ କୋଟପାଡ଼ ନିର୍ବାଚନମଣ୍ଡଳୀରେ ମହିଳା ପ୍ରାର୍ଥୀ ଭାବେ ପଦ୍ମିନୀ ଦିଆନଙ୍କୁ ଦଳ ଟିକଟ ଦେଇଥିଲା । ସେ ବିଜୟୀ ହୋଇ ମନ୍ତ୍ରୀ ବି ହୋଇଥିଲେ । ଏଥର ତାଙ୍କୁ ଦଳ ଟିକଟ ଦେଇନି । ସ୍ୱତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ ତଥା ପୂର୍ବତନ ବିଧାୟକ ଚନ୍ଦ୍ରଶେଖର ମାଝୀଙ୍କୁ କୋଟପାଡ଼ରେ ପ୍ରାର୍ଥୀ କରିଛି । ବିଜେଡି ମହିଳା ପ୍ରାର୍ଥୀଙ୍କୁ ଗୁରୁତ୍ୱ ଦେଇଆସୁଛି । ଏଥର ମଧ୍ୟ ଜିଲ୍ଲାର ଯେ କୌଣସି ଗୋଟିଏ ଆସନରେ ମହିଳା କାର୍ଡ ଖେଳିବାର ସମ୍ଭାବନା ରହିଛି । ଜୟପୁର କିମ୍ବା ପଟ୍ଟାଙ୍ଗିରେ ଦଳ ମହିଳା ପ୍ରାର୍ଥୀ ଦେବାର ସମ୍ଭାବନା ରହିଛି । ଲକ୍ଷ୍ମୀପୁର ଆସନରେ ଦଳ ପକ୍ଷରୁ ଜଣେ ନୂଆମୁହଁକୁ ସୁଯୋଗ ମିଳିପାରେ ବୋଲି ଆଲୋଚନା ଜୋର୍ ଧରିଛି ।
