ଫୁଲବାଣୀ,୧/୫ : ସାଧାରଣ ନିର୍ବାଚନ ପାଇଁ ଆଜି ପ୍ରାର୍ଥୀପତ୍ର ଦାଖଲର ଷଷ୍ଠ ଦିନ। ଆଜି ଫୁଲବାଣୀ ବିଧାନସଭା ଆସନ ପାଇଁ କଂଗ୍ରେସ ପ୍ରାର୍ଥିନୀ ପ୍ରତିଭା କହଁର ନାମାଙ୍କନ ଦାଖଲ କରିଛନ୍ତି। ହଜାର ହଜାର ସମର୍ଥକଙ୍କ ସହିତ ସ୍ଥାନୀୟ ଫୁଲବାଣୀ ସାହି ବରାଳଦେବୀ ମନ୍ଦିରରୁ ବିରାଟ ପଟୁଆରରେ ଆସି ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ପ୍ରାର୍ଥୀପତ୍ର ଦାଖଲ କରିଛନ୍ତି। ରିଟର୍ଣ୍ଣିଂ ଅଫିସର ତଥା ଫୁଲବାଣୀ ଉପଜିଲ୍ଲାପାଳ ଚିତ୍ତରଞ୍ଜନ ମହନ୍ତ ନାମାଙ୍କନ ପତ୍ର ଗ୍ରହଣ କରିଛନ୍ତି।
ଆଜିର ପ୍ରାର୍ଥୀପତ୍ର ଦାଖଲ କାର୍ଯ୍ୟକ୍ରମରେ ଜିଲ୍ଲା କଂଗ୍ରେସ ସଭାପତି ଚନ୍ଦ୍ର ଶେଖର ପରିଡା, ପ୍ରଚାର କମିଟି ଅଧ୍ୟକ୍ଷ ହେମନ୍ତ କର, ପୂର୍ବତନ ସାଂସଦ ରାଧାକାନ୍ତ ଦିଗାଲ, ଶ୍ରମିକ ନେତା ଘନକୁମାର ଶବର, ଜିଲ୍ଲା ସମ୍ପାଦକ ବସନ୍ତ କୁମାର ପାଢୀ, ନନ୍ଦ କିଶୋର ଦାଶ, ରଜତ ମହାନ୍ତିଙ୍କ ସମେତ ବିଭିନ୍ନ ବ୍ଲକ ସଭାପତି, ଦଳୀୟ ପଦାଧିକାରୀ ଓ କର୍ମୀ ଉପସ୍ଥିତ ଥିଲେ। ୧୯୮୫ ପରଠାରୁ କଂଗ୍ରେସ ଦଳ ଫୁଲବାଣୀ ଆସନରେ ସଫଳତାର ସ୍ବାଦ ଚାଖି ନଥିବା ବେଳେ ଏଥରକ ବିଜୟ ବାନା ଉଡାଇବେ ବୋଲି ଦୃଢୋକ୍ତି ପ୍ରକାଶ କରିଛନ୍ତି ଦଳୀୟ ପ୍ରାର୍ଥୀନୀ ପ୍ରତିଭା।