ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି (ଶୁକ୍ରବାର) ମହାରାଷ୍ଟ୍ର ଗସ୍ତ ସମୟରେ ପାଲଘରର ବାଧବନ ବନ୍ଦରର ଶିଳାନ୍ୟାସ କରିଛନ୍ତି । ଏହି ସମୟରେ ପ୍ରଧାନମନ୍ତ୍ରୀ ମୋଦୀ ପ୍ରାୟ ୧୫୬୦ କୋଟି ଟଙ୍କା ମୂଲ୍ୟର ମତ୍ସ୍ୟପାଳନ ପ୍ରକଳ୍ପର ଉଦଘାଟନ ଏବଂ ଶିଳାନ୍ୟାସ ମଧ୍ୟ କରିଛନ୍ତି । ମହାରାଷ୍ଟ୍ରର ସିନ୍ଧୁଦୁର୍ଗରେ ଛତ୍ରପତି ଶିବାଜୀ ମହାରାଜଙ୍କ ପ୍ରତିମୂର୍ତ୍ତି ଭୁଶୁଡିବା ଘଟଣାରେ ପ୍ରଧାନମନ୍ତ୍ରୀ ପ୍ରତିକ୍ରିୟା ରଖିଛନ୍ତି । 

ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, "ଯେତେବେଳେ ବିଜେପି ମୋତେ ୨୦୧୩ ରେ ପ୍ରଧାନମନ୍ତ୍ରୀ ପ୍ରାର୍ଥୀ ଭାବରେ ନିଶ୍ଚିତ କରିଥିଲା, ସେତେବେଳେ ମୁଁ ରାୟଗଢ ଦୁର୍ଗକୁ ଯାଇ ପ୍ରାର୍ଥନା କରିଥିଲି । ଜଣେ ଭକ୍ତ ତାଙ୍କ ଆରାଧ୍ୟଙ୍କୁ ଯେଉଁଭଳି ଭାବରେ ଆରାଧନା କରିଥାଏ, ସେହି ଭାବନା ନେଇ ଦେଶ ସେବା କରିବାକୁ ଆସିଥିଲି । 

ଏହି ସମୟରେ ପ୍ରଧାନମନ୍ତ୍ରୀ ମୋଦୀ ଛତ୍ରପତି ଶିବାଜୀ ମହାରାଜଙ୍କୁ ମଧ୍ୟ କ୍ଷମା ମାଗିଛନ୍ତି । ସେ କହିଛନ୍ତି, ବିଗତ ଦିନରେ "ସିନ୍ଧୁଦୁର୍ଗରେ ଯାହା ଘଟିଲା, ତାହା ମୋ ପାଇଁ, ମୋର ସମସ୍ତ ସାଥିଙ୍କ ପାଇଁ ଅତ୍ୟନ୍ତ ଦୁଃଖଦ । ଆମ ପାଇଁ ଛତ୍ରପତି ଶିବାଜୀ ମହାରାଜ କେବଳ ଏକ ନାମ ନୁହଁନ୍ତି, ସେ କେବଳ ଜଣେ ରାଜା କି ମହାରାଜା ନୁହଁନ୍ତି, ଆମ ପାଇଁ ଛତ୍ରପତି ଶିବାଜୀ ମହାରାଜ ଜଣେ ଆରାଧ୍ୟ ଦେବତା । ଆଜି ମୁଁ ମୁଣ୍ଡ ନୁଆଁଇ ଛତ୍ରପତି ଶିବାଜୀ ମହାରାଜଙ୍କୁ ଚରଣରେ ମସ୍ତକ ରଖି କ୍ଷମା ପ୍ରାର୍ଥନା କରୁଛି । 

ପାଲଘରର ଲୋକଙ୍କୁ ସମ୍ବୋଧିତ କରିବା ବେଳେ ପ୍ରଧାନମନ୍ତ୍ରୀ ମୋଦୀ ସାବରକରଙ୍କ ବିଷୟରେ ମଧ୍ୟ କହିଛନ୍ତି । ସେ କହିଛନ୍ତି, "ଆମର ସଂସ୍କାର ଅଲଗା ଅଟେ । ଆମେ ସେହି ଲୋକ ନୁହଁ, ଯେଉଁମାନେ ଭାରତ ମାତାର ସାହସୀ ପୁତ୍ର ବୀର ସାବରକରଙ୍କୁ ଦୁର୍ବ୍ୟବହାର କରନ୍ତି ଏବଂ ଦେଶପ୍ରେମୀଙ୍କ ଭାବନାକୁ ଭାଙ୍ଗି ଦିଅନ୍ତି । ବୀର୍ ସାବରକରଙ୍କୁ ଦୁର୍ବ୍ୟବହାର କରିବା ପରେ ମଧ୍ୟ କ୍ଷମା ମାଗିବାକୁ ପ୍ରସ୍ତୁତ ନୁହଁ । ମହାରାଷ୍ଟ୍ର ଜନସାଧାରଣ ଏହିପରି ସଂସ୍କାର ଜାଣିବା ଉଚିତ୍ ଯେ, ଏଠାକୁ ଆସି ମୁଁ ଛତ୍ରପତି ଶିବାଜୀ ମହାରାଜଙ୍କୁ କ୍ଷମା ମାଗିବା କାମ ଆରମ୍ଭ କରିଛି’।