ନୂଆଦିଲ୍ଲୀ: ଦୁଇ ଦିନିଆ ଭାରତ ଗସ୍ତରେ ଅଛନ୍ତି ଆବୁଧାବି (ୟୁଏଇ)ର କ୍ରାଉନ୍ ପ୍ରିନ୍ସ ଶେଖ ଖାଲିଦ ବିନ୍ ମହମ୍ମଦ ବିନ୍ ଜାଏଦ ଅଲ ନାହୟାନ। ଏହା ତାଙ୍କର ପ୍ରଥମ ଭାରତ ଗସ୍ତ । ଏହି ଅବସରରେ ସେ ପ୍ରଧାନମନ୍ତ୍ରୀ ମୋଦୀଙ୍କୁ ଆଜି (ସୋମବାର) ଭେଟିଛନ୍ତି । ଏହି ସମୟରେ ଉଭୟ ନେତାଙ୍କ ମଧ୍ୟରେ ପରମାଣୁ ଶକ୍ତି, ତୈଳ ଏବଂ ଫୁଡ୍ ପାର୍କ ବିକାଶ କ୍ଷେତ୍ରରେ ଅନେକ ଚୁକ୍ତିନାମା ସ୍ୱାକ୍ଷରିତ ହୋଇଛି ।

ଉଭୟ ନେତା ଏମିରାତ ଆଣବିକ ଶକ୍ତି କମ୍ପାନୀ (ENEC) ଏବଂ ଭାରତୀୟ ଶକ୍ତି ସହଯୋଗ ଲିମିଟେଡ୍ (NPCIL)ର କାର୍ଯ୍ୟ ତଥା ରକ୍ଷଣାବେକ୍ଷଣ କ୍ଷେତ୍ରରେ ଏକ ଚୁକ୍ତିନାମା ସ୍ୱାକ୍ଷର କରିଛନ୍ତି । ଆବୁଧାବି ନ୍ୟାସନାଲ ଅଏଲ କମ୍ପାନୀ (ADNOC) ଏବଂ ଇଣ୍ଡିଆନ ଅଏଲ କର୍ପୋରେସନ ଲିମିଟେଡ୍ ମଧ୍ୟରେ ଦୀର୍ଘକାଳୀନ ଏଲଏନଜି (LNG) ଯୋଗାଣ ପାଇଁ ଚୁକ୍ତିନାମା ସ୍ୱାକ୍ଷରିତ ହୋଇଛି । 

ସେହିଭଳି ଗୁଜୁରାଟ ସରକାର ଏବଂ ଆବୁଧାବି ଡେଭଲପମେଣ୍ଟାଲ ହୋଲଡିଂ କମ୍ପାନୀ PJSC (ADQ) ମଧ୍ୟରେ ଭାରତରେ ଫୁଡ ପାର୍କ ବିକାଶ ଉପରେ ଏକ ଏମଓୟୁ ସ୍ୱାକ୍ଷରିତ ହୋଇଛି । ବୈଠକ ପରେ କ୍ରାଉନ୍ ପ୍ରିନ୍ସ ରାଜଘାଟରେ ମହାତ୍ମା ଗାନ୍ଧୀଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ପ୍ରଧାନମନ୍ତ୍ରୀ ମୋଦୀ ହାଇଦ୍ରାବାଦ ହାଉସରେ କ୍ରାଉନ୍ ପ୍ରିନ୍ସ ଶେଖ ଖାଲିଦ ବିନ୍ ମହମ୍ମଦ ବିନ୍ ଜାଏଦ ଅଲ ନାହୟାନଙ୍କୁ ସ୍ୱାଗତ କରିଥିଲେ ।