ନାରାୟଣପାଟଣା, ୩।୧୨: ଦକ୍ଷିଣ ପଶ୍ଚିମ ବଙ୍ଗୋପ ସାଗରରେ ସକ୍ରିୟ ଗଭୀର ଅବପାତ । ପ୍ରଭାବରେ ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ସମ୍ଭାବନାକୁ ନେଇ ପାଣିପାଗ ବିଭାଗର ସୂଚନା ପରେ ଚାଷୀକୂଳ ଆତଙ୍କିତ ହୋଇ ଉଠିଛନ୍ତି । ବର୍ତ୍ତମାନ ଧାନ ଅମଳ ସମୟ ହୋଇଥିବାରୁ ଫସଲକୁ କିପରି ସୁରକ୍ଷିତ ରଖିବେ ସେନେଇ କୋରାପୁଟ ଜିଲ୍ଲାର ଆନ୍ଧ୍ର ସୀମାନ୍ତ ନାରାୟଣପାଟଣା ଅଞ୍ଚଳରେ ନିୟନ୍ତ୍ରିତ ବଜାର କମିଟି ଓ କୃଷି ବିଭାଗ ଦ୍ୱାରା ବିଶେଷ କରି ଚାଷୀମାନଙ୍କ ଉଦ୍ଦେଶ୍ୟରେ ମାଇକ୍ ଯୋଗେ ପ୍ରଚାର କରି ସଚେତନ କରାଯାଉଛି । 

ଶତାଧିକ ଏକରରେ ଧାନକଟା ହୋଇ କ୍ଷେତରେ ପଡ଼ିଥିବା ସହ କଟା ପାଇଁ ମଧ୍ୟ ପ୍ରସ୍ତୁତ ହୋଇରହିଛି । ଆସନ୍ତା ୫ ତାରିଖରେ ବର୍ଷା ହେବା ସହ ପ୍ରାୟ ୫୦ରୁ ୬୦କିମି ବେଗରେ ପବନ ବହିବା ନେଇ କୋରାପୁଟ ଜିଲ୍ଲା ଜରୁରୀକାଳୀନ ବିଭାଗର ସେକ୍ସନ ଅଫିସର ସୂଚନା ଦେଇଛନ୍ତି । ପ୍ରଶାସନ ତରଫରୁ ମାଇକ ଯୋଗେ ପ୍ରଚାର କରି ଚାଷୀମାନଙ୍କୁ ସତର୍କ କରାଯାଉଥିବା ସେ କହିଛନ୍ତି ।