(ସାକ୍ଷାତକାର : ଚାନ୍ଦିନୀ ମହାପାତ୍ର) ଓଡ଼ିଶାର ଲୋକଗୀତ ‘ଉଠ କଙ୍କାଳ ଛିଡ଼ୁ ଶୃଙ୍ଖଳ....’ । ଏହା ପ୍ରତ୍ୟେକ ଓଡ଼ିଆର ମନରେ ସୃଷ୍ଟିକରେ ଜାତିପ୍ରେମ । ଆଜିର ଯୁବପିଢି ହୁଏତ ଭୁଲିଯାଇଥିବେ ଏହି ଗୀତକୁ । ଏଭଳି ସମୟରେ ଲେକଗୀତକୁ ନୂଆ ରୂପ ଦେଇ ଜନମାନସରେ ପ୍ରଶଂସା ସାଉଁଟି ପାରିଛନ୍ତି ଓଡ଼ିଆ ଝିଅ ବର୍ଣ୍ଣାଳୀ ହୋତା । ସେ ତାକୁ ନୂଆ ସ୍ୱରରେ ଉପସ୍ଥାପନ କରିଛନ୍ତି ଯାହା ଲୋକଙ୍କ ହୃଦୟ ଜିତିବାରେ ସଫଳ ହୋଇପାରିଛି । ଏହି ଆଧାରରେ ସେ ପହଞ୍ଚିଯାଇଛନ୍ତି ଡିଡି ନାସନାଲରେ ପ୍ରଦର୍ଶିତ ‘ଭାରତ କା ଅମୃତ କଲସ’ ରିୟଲିଟି ସୋ’ର ଫାଇନାଲ ରାଉଣ୍ଡ୍ରେ । ଏହି ଅବସରରେ ସେ ‘ପ୍ରମେୟ’କୁ ଦେଇଥିବା ସାକ୍ଷାତକାରର କିଛି ଅଂଶ ।
ଫାଇନାଲ୍ ରାଉଣ୍ଡ୍ ପାଇଁ ଆପଣ କିଭଳି ପ୍ରସ୍ତୁତ ହୋଇଛନ୍ତି ?
ସୋ’ କୃଷ୍ଣଙ୍କ ଗୀତ ‘ହାଏ କୃଷ୍ଣ'ରୁ ଆରମ୍ଭ କରିଥିଲି । ସୋ’ର ଶେଷ ଏପିସୋଡ୍ରେ ଜଗନ୍ନାଥଙ୍କର ‘କୋଠ ଭୋଗଖିଆ’ ଗୀତ ଗାଇବି । ଏଥିସହିତ ‘ନୀଳାଦ୍ରି ଶଙ୍ଖ ମଧ୍ୟେ’ ତଥା ଶରୀର ତତ୍ତ୍ୱ ସଙ୍ଗୀତ ‘ନୂଆ ଘର ଖଣ୍ଡି ଦିନେ ପୁରୁଣା ହେବ’କୁ ନୂତନ ଶୈଳୀରେ ପ୍ରଦର୍ଶନ କରିବାକୁ ପ୍ରସ୍ତୁତି ଜାରି ରଖିଛି ।
ଜାତୀୟ ସ୍ତରରେ ଓଡ଼ିଶାର ଲୋକଗୀତକୁ ପ୍ରଦର୍ଶନ କରିବାର ଅନୁଭୂତି କେମିତି?
ଗୋଟେ ରିୟଲିଟି ସୋ’ କୁ ଯିବା ଅଲଗା କଥା ହେଲେ ନିଜ ରାଜ୍ୟର ସଂସ୍କୃତିକୁ ପ୍ରଦର୍ଶନ କରିବା ହେଉଛି ବଡ଼ ଦାୟିତ୍ୱ । ଲୋକେ ଭଲ ପାଇବା ଦେଲେ ବହୁତ୍ ଭଲ ଲାଗେ ।
ଫାଇନାଲ ରାଉଣ୍ଡ୍ ପାଇଁ ଓଡ଼ିଶାବାସୀ ଆପଣଙ୍କୁ କିପରି ଭଲ ପାଇବା ଦେଇପାରିବେ?
ବିଭିନ୍ନ ସାମାଜିକ ଗଣମାଧ୍ୟମ ତଥା ୟୁଟ୍ୟୁବ ମାଧ୍ୟମରେ ଓଡ଼ିଆଙ୍କ ଭଲ ପାଇବା ମୋ ପାଇଁ ଶକ୍ତି ଯୋଗାଇବ । ଏଥିସହିତ ରାଜ୍ୟ ସରକାରଙ୍କ ତରଫରୁ ମଧ୍ୟ କିଛି ପ୍ରୋତ୍ସାହନ ଆବଶ୍ୟକ ।
ଓଡ଼ିଶାର ଲୋକଗୀତକୁ ଯଥେଷ୍ଟ ପ୍ରୋତ୍ସାହନ ମିଳୁଛି ତ?
ଅନ୍ୟ ରାଜ୍ୟର ଲୋକଗୀତ ଜାତୀୟ ସ୍ତରରେ ବେଶ୍ ଲୋକାଦୃତ । ହେଲେ ଆମ ଲୋକ ଗୀତ କାହିଁକି ସେହି ସ୍ତରକୁ ଯାଇପାରୁନି? ଯେତେବେଳେ କି ଆମର ଲୋକଗୀତ ବେଶ ଉନ୍ନତ । ତେଣୁ ଜାତୀୟ ସ୍ତରରେ କେମିତି ପ୍ରଦର୍ଶନ କରିହେବ ତାହା ଉପରେ ଅନେକ କାମ ହେବା ଦରକାର । ଏଥିପାଇଁ ରାଜ୍ୟ ସରକାରଙ୍କର ପ୍ରୋତ୍ସାହନ ଆବଶ୍ୟକ ରହିଛି ।
ଲୋକଗୀତ ମନୋରଞ୍ଜନର ମାଧ୍ୟମ ହୋଇପାରିବ କି?
ଆମେ ଯଦି ଆମ ଲୋକଗୀତ ସହ ଆଧୁନିକତା ଯୋଡ଼ି ଦେଇପାରିବା ତାହାହେଲେ ଏହା ଲୋକମାନଙ୍କୁ ଅଧିକ ପସନ୍ଦ ଆସିବ । ତେବେ ଏହାର ଅର୍ଥ କେବେ ବି ନୁହେଁ ଯେ, ଗୀତର ସତ୍ୟତାକୁ ହିଁ ମାରିଦିଆଯିବ ।
ଆପଣଙ୍କର ଆଗାମୀ ଲକ୍ଷ୍ୟ କ’ଣ?
ଫାଇନାଲ ରାଉଣ୍ଡ୍ରେ ମୋର ରେଜଲ୍ଟ କ’ଣ ହେବ । ମୁଁ ଏହି ସୋ’ ରେ ନ ଜିତିଲେ ମଧ୍ୟ ଲୋକ ଗୀତକୁ ନେଇ କାମ କରିବା ଜାରି ରଖିବି । ଆମ ଲୋକଗୀତକୁ ନେଇ କାମ କରିବାକୁ ଚାହିଁବି । ଲୋକଗୀତ ହେଉଛି ଲୋକମାନଙ୍କର ଓ ଲୋକମାନଙ୍କ ପାଇଁ । ଯଦି ଲୋକମାନଙ୍କର ସମର୍ଥନ ରହିଲା ତଥା ରାଜ୍ୟ ପକ୍ଷରୁ କିଛି ସାହାଯ୍ୟ ମିଳିଲା ତେବେ ଆମେ ଆମ ଲୋକଗୀତକୁ ଅତି ଉଚ୍ଚ ସ୍ତର ପର୍ଯ୍ୟନ୍ତ ନେଇପାରିବୁ ।
