ନୂଆଦିଲ୍ଲୀ: କର୍ଣ୍ଣାଟକରେ ରାଜ୍ୟସଭା ସାଂସଦ ନାସିର ହୁସେନ୍ଙ୍କ ବିଜୟ ପରେ ବିଧାନସଭା ବାହାରେ ପାକିସ୍ତାନ ଜିନ୍ଦବାଦର ସ୍ଲୋଗାନ ଦିଆଯାଇଥିଲା । ବର୍ତ୍ତମାନ ଏହି ମାମଲାରେ ଫରେନସିକ୍ ରିପୋର୍ଟ ସାମ୍ନାକୁ ଆସିଛି । ଏହି ରିପୋର୍ଟରେ ଦାବି କରାଯାଇଛି ଯେ, କର୍ଣ୍ଣାଟକ ବିଧାନସଭା ବାହାରେ 'ପାକିସ୍ତାନ ଜିନ୍ଦାବାଦ'ର ସ୍ଲୋଗାନ ଦିଆଯାଇଛି । ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେରେ ଫୋରେନସିକ୍ ରିପୋର୍ଟର ଦାବି କରାଯାଇଛି ।
ଇଣ୍ଡିଆ ଟୁଡେ ଏହାର ଖବରରେ ସୂତ୍ରରୁ ପ୍ରକାଶ ଯେ, କଂଗ୍ରେସ ପ୍ରାର୍ଥୀ ରାଜ୍ୟସଭା ବିଜୟ ଉତ୍ସବରେ ପାକିସ୍ତାନ ସମର୍ଥକ ସ୍ଲୋଗାନ ଦିଆଯାଇଛି ବୋଲି ଫରେନସିକ୍ ବିଶେଷଜ୍ଞମାନେ ଏହା ପ୍ରମାଣ କରିଛନ୍ତି । ରାଜ୍ୟ ସରକାରଙ୍କ ନିକଟରେ ଦାଖଲ ହୋଇଥିବା ରିପୋର୍ଟରେ ଉଭୟ ଭିଡିଓ ଏବଂ ଅଡିଓରେ ପାକିସ୍ତାନ ସମର୍ଥକ ସ୍ଲୋଗାନ ଗୁଡ଼ିକ ନିଶ୍ଚିତ ହୋଇଛି ଏବଂ ଏହି ଫୁଟେଜରେ କୌଣସି ଅନୀୟମିତତା ହୋଇନାହିଁ ।
ଏହି ମାମଲାରେ ପଚରାଉଚରା ପାଇଁ ମହମ୍ମଦ ଶାଫିକ୍ ନାସିପୁଡିଙ୍କୁ ହେପାଜତକୁ ନିଆଯାଇଛି ବୋଲି ହାଭେରୀ ପୋଲିସ ଅଧୀକ୍ଷକ ଅନସୁକୁମାର କହିଛନ୍ତି । ହାଭେରୀ ଅଧୀକ୍ଷକ କହିଛନ୍ତି, “ଫେବୃଆରୀ ୨୭ ରେ କର୍ଣ୍ଣାଟକ ବିଧାନସଭାରେ ପାକିସ୍ତାନ ସମର୍ଥକ ସ୍ଲୋଗାନ ଦେବା ନେଇ ବିଧାନସୌଧ ପୋଲିସ ଷ୍ଟେସନରେ ଏକ ମାମଲା ରୁଜୁ ହୋଇଥିଲା। ଏହି ମାମଲାରେ ଜଣେ ସନ୍ଦିଗ୍ଧ ମହମ୍ମଦ ଶାଫିକ୍ ନାସିପୁଡିଙ୍କୁ ବେଙ୍ଗାଲୁରୁ ପୋଲିସ ହେପାଜତକୁ ଆଣିଛି ।
ଫେବୃଆରୀ ୨୭ ସନ୍ଧ୍ୟାରେ ଏହି ଘଟଣା ସାମ୍ନାକୁ ଆସିଥିଲା । କର୍ଣ୍ଣାଟକରେ ରାଜ୍ୟସଭା ନିର୍ବାଚନରେ କଂଗ୍ରେସ ନେତା ସୟଦ ନାସିର ହୁସେନ୍ଙ୍କ ବିଜୟ ଉତ୍ସବ ପାଳନ କରୁଥିବାବେଳେ ହଠାତ୍ ପାକିସ୍ତାନ ଜିନ୍ଦବାଦର ସ୍ଲୋଗାନ ଦିଆଯାଇଥିଲା। ବିଜେପି ନେତାମାନେ ଏହି ସମ୍ପର୍କିତ ଭିଡିଓକୁ ବାହାର କରି ଅନେକ ଉତ୍ତେଜନା ସୃଷ୍ଟି କରିଥିଲେ। ଫେବୃଆରୀ ୨୭ ତାରିଖ ବିଳମ୍ବିତ ରାତିରେ ବିଜେପି ନେତାମାନେ ଏହି ମାମଲାରେ ପୋଲିସ ନିକଟରେ ଅଭିଯୋଗ କରିଥିଲେ ଏବଂ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ ।
