ନୂଆଦିଲ୍ଲୀ,୨୮/୫:ପଞ୍ଜାବର ଆମ୍ ଆଦମୀ ପାର୍ଟୀ ମନ୍ତ୍ରୀ ବଲକାର ସିଂହଙ୍କ ଏକ ଆପତ୍ତିଜନକ ଭିଡିଓ ସାମ୍ନାକୁ ଆସିଛି। ଯେଉଁଥିରେ ସେ ଜଣେ ୨୧ ବର୍ଷୀୟ ଯୁବତୀଙ୍କୁ ଚାକିରି ଦେବା ଆଳରେ ଶାରୀରିକ ସଂମ୍ପର୍କ ରଖିବାକୁ କହୁଥିବାର ଦେଖିବାକୁ ମିଳିଛି। ତେବେ ଏହି ଭିଡିଓ ବେଶ ଭାଇରାଲ ହୋଇଥିବା ବେଳେ ସୋମବାର ଏକାଧିକ ବିଜେପି ନେତା ଏହି ଭିଡିଓକୁ ସେୟାର କରିଥିଲେ। ଯାହା ଫଳରେ ଘଟଣାଟି ସାମ୍ନାକୁ ଆସିଛି।
ତେବେ ବିଜେପି ନେତାମାନେ ଅଭିଯୋଗ କରିଛନ୍ତି ଯେ, ମନ୍ତ୍ରୀ ବଲକାର ସିଂହଙ୍କୁ ଯୁବତୀ ଜଣଙ୍କ ଚାକିରି ପାଇଁ ଯୋଗାଯୋଗ କରିଥିଲେ। ଏହାର ଫାଇଦା ଉଠାଇ ସେ ଯୁବତୀଙ୍କୁ ଉଲଗ୍ନ ହେବାକୁ ଭିଡିଓ କଲରେ ବାଧ୍ୟ କରିଥିଲେ। ଏଥିସହ ଯୁବତୀଙ୍କୁ ନିଜର ଗୁପ୍ତାଙ୍ଗ ଦେଖାଇଥିଲେ।ଏହି ଘଟଣାକୁ ନେଇ ବିବାଦ ବଢ଼ିବାରୁ ଜାତୀୟ ମହିଳା କମିଶନ ପଞ୍ଜାବ ପୋଲିସ୍କୁ ଭିଡିଓର ତଦନ୍ତ କରିବାକୁ କହିଛନ୍ତି। ଏଥିସହ ୩ ଦିନ ମଧ୍ୟରେ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି।
ସେପଟେ ମହିଳା କମିଶନ କହିଛନ୍ତି, ଏକ୍ସରେ ପୋଷ୍ଟ ହୋଇଥିବା ପଞ୍ଜାବ ବିଧାୟକ ବଲକାର ସିଂହଙ୍କ ଗୋଟିଏ ଭିଡିଓ ଅତ୍ୟନ୍ତ ଆପତ୍ତିଜନକ। ଯଦି ଅଭିଯୋଗ ସତ୍ୟ, ତା’ହେଲେ ଏହା ଆଇପିସିର ଧାରା ୩୫୪ ଓ ୩୫୪ବିର ସିଧା ଉଲ୍ଲଙ୍ଘନ।ଏହା ଜଣେ ମହିଳାଙ୍କ ଆତ୍ମସମ୍ମାନକୁ ପ୍ରଭାବିତ କରୁଛି। ତେଣୁ ପଞ୍ଜାବ ପୋଲିସ୍ ମୁଖ୍ୟ ଗୌରଭ ଯାଦବ ଏହାକୁ ବେଶ ସତର୍କତାର ସହ ତଦନ୍ତ କରନ୍ତୁ ଓ ଯଦି ଅଭିଯୋଗ ସତ, ତା’ହେଲେ ବଲକର ସିଂହଙ୍କୁ ଗିରଫ କରନ୍ତୁ ବୋଲି କମିଶନ କହିଛନ୍ତି।
