ନୂଆଦିଲ୍ଲୀ ୦୩/୧୧: ଦେଶ-ବିଦେଶରେ ସୁପର୍ଷ୍ଟାର ରଜନୀକାନ୍ତଙ୍କ ଅଗଣିତ ଫ୍ୟାନ୍ ଅଛନ୍ତି । ଇନ୍ଷ୍ଟାଗ୍ରାମ୍ରେ ନିଜର ଗୋଟିଏ ମାତ୍ର ଫଟୋ ସେ ଶେୟାର କରିଛନ୍ତି, ତଥାପି ଲକ୍ଷାଧିକ ପ୍ରଶଂସକ ତାଙ୍କୁ ଫଲୋ କରୁଛନ୍ତି । ସେହିପରି ଟ୍ୱିଟର୍ରେ ତାଙ୍କ ପ୍ରଶଂସକଙ୍କ ସଂଖ୍ୟା ୬୪ ଲକ୍ଷରୁ ଅଧିକ । ରଜନୀଙ୍କ ପ୍ରଶଂସକଙ୍କ ତାଲିକାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବି ସାମିଲ । ଗତ ଅଗଷ୍ଟ ମାସରେ ରଜନୀଙ୍କ ଫିଲ୍ମ ‘ଜେଲର୍’ ମୁକ୍ତିଲାଭ କରିବା ପୂର୍ବରୁ ଫିଲ୍ମର ସଫଳତା ପାଇଁ ବହୁ ସଂଖ୍ୟକ ପ୍ରଶଂସକ ଥିରୁପାରନକୁନ୍ଦ୍ରମ ଅମ୍ମନ ମନ୍ଦିରରେ ଏକତ୍ର ହୋଇ ପ୍ରାର୍ଥନା କରିଥିଲେ । ଏଥିରୁ ରଜନୀଙ୍କ ପାଇଁ ପ୍ରଶଂସକଙ୍କ ପାଗଳାମି ସ୍ପଷ୍ଟ ବାରିହୁଏ ।
ଏଥର ଥଲାଇଭା ରଜନୀଙ୍କୁ ଭଲପାଇବା ଓ ସମ୍ମାନ ଦେବାକୁ ଯାଇ ପ୍ରଶଂସକମାନେ ଆଉ ପାଦେ ଆଗକୁ ଯାଇଛନ୍ତି । କିଛି ପ୍ରଶଂସକ ମିଳିତ ଭାବେ ତାମିଲନାଡୁର ମଦୁରାଇଠାରେ ଥଲାଇଭାଙ୍କର ଏକ ମନ୍ଦିର ନିର୍ମାଣ କରିଛନ୍ତି । ଏଥିପାଇଁ ଜଣେ ପ୍ରଶଂସକ ନିଜ ଘର ଅଗଣାକୁ ରଜନୀଙ୍କ ମନ୍ଦିର ନିର୍ମାଣ ଲାଗି ଉତ୍ସର୍ଗ କରିଛନ୍ତି । ମନ୍ଦିରରେ ୨୫୦ କିଲୋ ଓଜନର ରଜନୀକାନ୍ତଙ୍କ ମୂର୍ତ୍ତି ସ୍ଥାନ ପାଇଛି । ଏହି ଖବର ପ୍ରସାର ହେବା ପରଠୁ ଇଣ୍ଟର୍ନେଟ୍ରେ ରଜନୀଙ୍କ ମନ୍ଦିରର ଭିଡିଓ ଓ ଫଟୋ ଭାଇରାଲ ହେବାରେ ଲାଗିଛି ।
#WATCH | Tamil Nadu: A fan of actor Rajinikanth built a temple for him and installed a 250 kg idol of Rajinikanth, in Madurai (01/11) pic.twitter.com/pwAahbFdgx
— ANI (@ANI) November 1, 2023
ଜଣେ ପ୍ରଶଂସକ ରଜନୀଙ୍କୁ ମାଳା ପିନ୍ଧାଇବା ପରେ ତାଙ୍କର ଅଭିଷେକ କରୁଥିବା ନଜର ଆସିଛନ୍ତି । ନିକଟରେ ରଜନୀଙ୍କର କିଛି ପ୍ରଶଂସକ ହାତ ଯୋଡ଼ି ଠିଆ ହୋଇଛନ୍ତି । ଜଣେ ପୂଜାରୀ ଉପସ୍ଥିତ ରହି ରଜନୀଙ୍କ ପୂଜା କାର୍ଯ୍ୟ ପରିଚାଳନା କରୁଛନ୍ତି ।‘ଜେଲର୍’, ଶିବାଜୀ ଦ ବସ୍’, ‘ରୋବୋ’ ଓ ‘ରା ୱାନ୍’ ଭଳି ଅନେକ ଫିଲ୍ମ ପାଇଁ ପ୍ରସିଦ୍ଧି ଅର୍ଜନ କରିଥିବା ରଜନୀ ନିଜର ଉଲ୍ଲେଖନୀୟ ଅଭିନୟ ଦକ୍ଷତା ପାଇଁ ପରଦାରେ ଓ ପରଦା ପଛରେ ପ୍ରଶଂସିତ ହୋଇଥାନ୍ତି । ଅପ୍କମିଙ୍ଗ ଫିଲ୍ମ ‘ଥଲାଇଭାର୍ ୧୭୦’ରେ ସେ ନଜର ଆସିବେ । ଫିଲ୍ମର ନିର୍ମାଣ କାର୍ଯ୍ୟ ଚାଲିଛି । ଏଥିରେ ଅମିତାଭ ବଚ୍ଚନ, ଫହାଦ ଫାସିଲ, ରାଣା ଦଗୁବାତି, ମଞ୍ଜୁ ୱାରିଅର ଓ ଦୁର୍ଶନ ବିଜୟନ ପ୍ରମୁଖ ଅଭିନୟ କରିଛନ୍ତି । ଆସନ୍ତା ବର୍ଷ ପୋଙ୍ଗଲ ପର୍ବ ଅବସରରେ ଫିଲ୍ମଟି ମୁକ୍ତିଲାଭ କରିବ ।
