ନୂଆଦିଲ୍ଲୀ ୦୮/୦୯: ଅଲିମ୍ପିକ୍ କାଉନ୍ସିଲ୍ ଅଫ୍ ଏସିଆର (ଓସିଏ)ର ସଭାପତି ହେଲେ ରଣଧୀର ସିଂହ । ୪୪ ତମ ସାଧାରଣ ସଭା ଅନୁଷ୍ଠିତ ହୋଇଥିଲା । ଏହି ସଭାରେ ଓସିଏର ନୂଆ ସଭାପତି ପଦ ପାଇଁ ନିର୍ବାଚନ ଅନୁଷ୍ଠିତ ହୋଇଛି । ଯେଉଁଥିରେ ଭାରତର ପୂର୍ବତନ ସୁଟର ତଥା କ୍ରୀଡ଼ା ପ୍ରଶାସକ ରଣଧୀର ସିଂହ ସଭାପତି ଭାବେରେ ନିର୍ବାଚିତ ହୋଇଛନ୍ତି । ପ୍ରଥମ ଭାରତୀୟ ଭାବେ ସେ ଏହି ପଦ ସମ୍ଭାଳିବେ। ୨୦୨୮ ଯାଏଁ ତାଙ୍କର କାର୍ଯ୍ୟକାଳ ରହିଛି ।
୭୭ ବର୍ଷୀୟ ରଣଧୀର ୧୯୭୮ ଏସୀୟ କ୍ରୀଡ଼ାର ଟ୍ରାପ୍ ଇଭେଣ୍ଟରେ ସ୍ୱର୍ଣ୍ଣ ପଦକ ଜିତିଥିଲେ । ପରେ ସେ ୧୯୮୨ ସଂସ୍କରଣରେ ବ୍ରୋଞ୍ଜ, ୧୯୮୬ରେ ଦଳଗତ ରୌପ୍ୟ ପଦକ ହାସଲ କରିଥିଲେ । ସେହିପରି ୧୯୭୮ ରାଜ୍ୟଗୋଷ୍ଠୀ କ୍ରୀଡ଼ାରେ ପ୍ରତିଦ୍ୱନ୍ଦ୍ୱିତା କରିଥିଲେ । ୧୯୮୭ରେ କ୍ରୀଡ଼ା ପ୍ରଶାସକ ଭାବେ କାର୍ଯ୍ୟ ଆରମ୍ଭ କରିଥିଲେ । ଇଣ୍ଡିଆନ ଅଲିମ୍ପିକ୍ ଆସୋସିଏସନ୍ (ଆଇଓଏ)ର ମହାସଚିବ ଭାବେ ୨୦୧୨ ପର୍ଯ୍ୟନ୍ତ ଦାୟିତ୍ୱ ତୁଲାଇଥିଲେ । ୧୯୯୧ରେ ସେ ଓସିଏର ମହାସଚିବ ପଦ ଗ୍ରହଣ କରିଥିଲେ ଏବଂ ୨୦୧୫ରେ ତାଙ୍କ କାର୍ଯ୍ୟକାଳ ଶେଷ ହୋଇଥିଲା ।
