ରାୟଗଡ଼ା,୦୧/୦୪: ରାୟଗଡ଼ା ନିର୍ବାଚନମଣ୍ଡଳୀରେ ରାଜ୍ୟର ଏକମାତ୍ର ସ୍ୱାଧୀନ ବିଧାୟକ ଭାବେ ୨୦୧୯ରେ ବିଜୟୀ ହୋଇଥିଲେ ମକରନ୍ଦ ମୁଦୁଲି। ବିଜେଡିର ପୂର୍ବତନ ମନ୍ତ୍ରୀ ଲାଲବିହାରୀ ହିମରିକାଙ୍କୁ ପଛରେ ପକାଇ ବାଜିମାତ କରିଥିଲେ । ଏହା ସମସ୍ତଙ୍କୁ ଚକିତ କରିଥିଲା । ବିଧାୟକ ହେବା ପରେ ଦଳରେ ସାମିଲ୍ ହୋଇ ନ ଥିଲେ ମଧ୍ୟ ବିଜେଡି ଶିବିରରେ ତାଙ୍କୁ ଦେଖିବାକୁ ମିଳିଥିଲା ।
ଆଗାମୀ ନିର୍ବାଚନରେ ବିଜେଡି ପକ୍ଷରୁ ବିଧାୟକ ପ୍ରାର୍ଥୀ ହେବା ନେଇ ଦଳୀୟ କର୍ମୀଙ୍କ ମହଲରେ ଚର୍ଚ୍ଚା ଉଠିଥିଲା । ଏବେ ମକରନ୍ଦଙ୍କୁ ପଛରେ ପକାଇ ବିଜେଡିରୁ ପ୍ରାର୍ଥୀ ହୋଇଛନ୍ତି ଅନସୂୟା ମାଝୀ । ଫଳରେ ମକରନ୍ଦଙ୍କୁ ନେଇ ତାଙ୍କ ସମର୍ଥକଙ୍କ ମଧ୍ୟରେ ଉଠିଛି ଅନେକ ପ୍ରଶ୍ନ । ଆଗକୁ ସେ କ’ଣ କରିବେ ତାକୁ ନେଇ ରାଜନୈତିକ ବିଶେଷଜ୍ଞଙ୍କ ମଧ୍ୟରେ ଆଲୋଚନା ଜୋର୍ ଧରିଛି । ପୁଣି ମକରନ୍ଦ ସ୍ୱାଧୀନ ଭାବେ ଲଢ଼ିବେ ନା ନିରବ ରହିବେ ସେନେଇ ସସପେନ୍ସ ଜାରି ରହିଛି । ଏପଟେ ମକରନ୍ଦ ମଧ୍ୟ ନିଜ ସମ୍ପର୍କରେ ମୁହଁ ଖୋଲୁନାହାନ୍ତି । କିଛିଦିନ ତଳେ ସେ ଶଙ୍ଖଭବନ ଯାଇଥିଲେ ।
ଅନ୍ୟପଟେ ଅନସୂୟାଙ୍କୁ ପ୍ରାର୍ଥୀ ଘୋଷଣା ପରେ ଦଳରେ ତାଙ୍କ ପ୍ରାର୍ଥିତ୍ୱକୁ ନେଇ ତୀବ୍ର ବିରୋଧ ଓ ଅସନ୍ତୋଷ ଲାଗି ରହିଛି । ପ୍ରାର୍ଥୀ ପରିବର୍ତ୍ତନ ପାଇଁ ଦାବି କରିଛନ୍ତି ନିର୍ବାଚନମଣ୍ଡଳୀର କର୍ମୀ, ଦଳୀୟ ନେତା ଓ ନିର୍ବାଚିତ ଜନପ୍ରତିନିଧି । ବର୍ତ୍ତମାନ ଅନସୂୟାଙ୍କ ପ୍ରାର୍ଥିତ୍ୱକୁ ନେଇ ଦଳରେ ବିଦ୍ରୋହ ସୃଷ୍ଟି ହୋଇଥିବାରୁ ମକରନ୍ଦ ଏହାର ଲାଭ ଉଠାଇବାକୁ ପୁଣି ଥରେ ସ୍ୱାଧୀନ ଭାବେ ନିର୍ବାଚନ ଲଢ଼ିପାରନ୍ତି ।
ମକରନ୍ଦ କହିଛନ୍ତି, ଲୋକ ଓ ସମର୍ଥକ ଯଦି ଚାହିଁବେ ସେ ପୁନର୍ବାର ସ୍ୱାଧୀନ ପ୍ରାର୍ଥୀ ଭାବେ ଲଢ଼ିବେ । ଏଣେ କଂଗ୍ରେସ ପକ୍ଷରୁ ଆପଲସ୍ୱାମୀ କାଡ୍ରାକା ପୁନର୍ବାର ପ୍ରାର୍ଥୀ ହେବା ନେଇ ବିଶ୍ୱସ୍ତ ସୂତ୍ରରୁ ସୂଚନା ମିଳିଛି । ଗତ ନିର୍ବାଚନରେ ଆପଲସ୍ୱାମୀ ହାରିଥିଲେ । ନିର୍ବାଚନ ହାରିଥିଲେ ମଧ୍ୟ ଦଳର ସମସ୍ତ କାର୍ଯ୍ୟକ୍ରମରେ ସେ ସକ୍ରିୟ ରହିଥିଲେ । ବିଭିନ୍ନ ଅଞ୍ଚଳକୁ ବାରମ୍ବାର ଗସ୍ତ କରୁଥିବା ଦେଖିବାକୁ ମିଳିଥିଲା । ଅପରପକ୍ଷରେ ପୂର୍ବତନ ବିଧାୟକ ପୂର୍ଣ୍ଣଚନ୍ଦ୍ର ମାଝୀ କଂଗ୍ରେସରୁ ଆଉ ଏକ ଦାବିଦାର ରହିଛନ୍ତି । ସେ ମଧ୍ୟ ରାୟଗଡ଼ାରୁ ନିର୍ବାଚନ ଲଢ଼ିବା ପାଇଁ ଲବି ଚଳାଇଛନ୍ତି । ୨୦୧୯ ନିର୍ବାଚନରେ ପୂର୍ଣ୍ଣ ମାଝୀ କଂଗ୍ରେସ ଟିକଟ ପାଇଁ ଦାବି କରିଥିଲେ । ଯଦି ପୂର୍ଣ୍ଣ ନିର୍ବାଚନ ଲଢ଼ନ୍ତି ତେବେ ରାୟଗଡ଼ାରେ ନିର୍ବାଚନ ରୋଚକ ହେବ ।
ସୂଚନାଥାଉ କି, ପୂର୍ଣ୍ଣ ହେଉଛନ୍ତି ବିଜେଡି ପ୍ରାର୍ଥୀ ଅନସୂୟାଙ୍କ ଭାଇ । ଏଭଳି ସ୍ଥିତିରେ ମକରନ୍ଦଙ୍କ ଉପରେ ରହିଛି ସମସ୍ତଙ୍କ ନଜର ।
