ସମ୍ବଲପୁର, ୧୯/୦୯ : ସମ୍ବଲପୁରୀ ଅଭିନେତ୍ରୀ ରୁକସାନା ବାନୁଙ୍କ ମୃତ୍ୟୁ ଘଟଣାରେ ଟ୍ବିଷ୍ଟ୍। ମୃତ୍ୟୁ ପୂର୍ବର ଭିଡିଓ ସୋସିଆଲ ମିଡିଆରେ ପୋଷ୍ଟ କଲେ ରୁକସାନାଙ୍କ ମା। ଝିଅର ମୃତ୍ୟୁ ପାଇଁ ସିଙ୍ଗର ରୁକୁ ସୁନାଙ୍କୁ ଦାୟୀ କଲେ ପରିବାର। ରୁକୁ ସୁନା ତାଙ୍କ ଝିଅକୁ ଦୁଇ ମାସ ଧରି ନିର୍ଯାତନା ଦେଇ ଆସୁଥିବା ରୁକସାନାଙ୍କ ମା ସୋସିଆଲ ମଡିଆରେ କହିଛନ୍ତି। ରୁକସାନାଙ୍କ ସୋସିଆଲ ମିଡିଆ ଇନଷ୍ଟାଗ୍ରାମ ହ୍ୟାଣ୍ଡଲରେ ଭିଡିଓଟି ପୋଷ୍ଟ କରାଯାଇଛି। 

ରୁକସାନାଙ୍କ ମାଙ୍କ ଅଭିଯୋଗ ଅନୁଯାୟୀ, ବରଗଡ଼ରେ ସୁଟ୍ ହୋଇଥିବା 'ସମ୍ବଲପୁରୀଆ ଫୁଲ' ଗୀତରେ ରୁକସାନା ଅଭିନୟ କରିବା ପରେ ବିବାଦ ଆରମ୍ଭ ହୋଇଥିଲା। ଏପରିକି ଏହି ଗୀତରେ ଅଭିନୟ ପରେ ରୁକସାନାଙ୍କୁ ଅନ୍ୟ ସମସ୍ତ ପ୍ରକଡ୍ସକନରୁ ଜାଣିଶୁଣି ବାଦ୍ ଦିଆଯାଇଥିଲା। ସମ୍ବଲପୁରରେ ଆୟୋଜିତ କାର୍ଯ୍ୟକ୍ରମରେ ମନୋଜ ମିଶ୍ରଙ୍କ ସହ ରୁକସାନା ଯୋଗଦେବା ଘଟଣା ପରେ ରୁକୁ ସୁନା ତାଙ୍କୁ ନିର୍ଯାତନା ଦେବା ଆରମ୍ଭ କରିଥିଲେ। ସୁଟିଂ ସେଟରେ ରୁକସାନା ଅସୁସ୍ଥ ହୋଇ ମେଡିକାଲରେ ଭର୍ତ୍ତି ହୋଇଥିଲେ। ସେଠାରେ ଷଡ଼ଯନ୍ତ୍ର ହୋଇଥିବା ସେ ଅଭିଯୋଗ କରିଛନ୍ତି।

ପ୍ରକାଶ ଥାଉକି, ୧୫ ଦିନ ତଳେ ବଲାଙ୍ଗିରରେ ସୁଟିଂ ବେଳେ ରୁକସାନା ବାନୁ ଅସୁସ୍ଥ ହୋଇପଡ଼ିଥିଲେ। ଗତ ଅଗଷ୍ଟ ୨୭ରେ ତାଙ୍କୁ ପ୍ରଥମେ ଭବାନୀପାଟଣା, ବଲାଙ୍ଗୀର ଭୀମଭୋଇ ମେଡିକାଲ କଲେଜ ଓ ପରେ ବରଗଡ଼ର ଏକ ଘରୋଇ ମେଡିକାଲରେ ଚିକିତ୍ସା କରାଯାଉଥିଲା। ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଭୁବନେଶ୍ଵର ଏମ୍ସରେ ଭର୍ତ୍ତି କରାଯାଇଥିଲା। ଗତକାଲି ରାତିରେ ଚିକିତ୍ସାଧିନ ଅବସ୍ଥାରେ ରୁକସାନାଙ୍କର ମୃତ୍ୟୁ ହୋଇଛି। ମୃତ୍ୟୁର କାରଣ ସ୍କ୍ରବ୍ ଟାଇଫସ୍ ବୋଲି କୁହାଯାଉଛି।