କିଏଭ୍, ୨୫/୦୩: ମସ୍କୋରେ ଥିବା ଏକ ସିଟି ହଲ୍ରେ ଗତ ୨୨ ତାରିଖ ରାତିରେ ବଡ଼ ଧରଣର ଆତଙ୍କବାଦୀ ଆକ୍ରମଣ ପରେ ରୁଷ୍ ଅଧିକ ଆକ୍ରମଣାତ୍ମକ ହୋଇଛି । ୟୁକ୍ରେନ ରାଜଧାନୀ କିଏଭ୍ ସମେତ ଲଭିଭ ସହରରେ ରବିବାର ଭୋର୍ ସମୟରେ ରୁଷ୍ ଘନଘନ ମିସାଇଲ ମାଡ଼ କରିଛି । ମସ୍କୋ ଆଡ଼ୁ କିଏଭ୍କୁ ଟାର୍ଗେଟ କରାଯାଇ ୫୭ କ୍ଷେପଣାସ୍ତ୍ର, ଡ୍ରୋନ୍ ଛଡ଼ାଯାଇଛି । ରୁଷ୍ର ମିସାଇଲ ପୋଲାଣ୍ଡ ବାୟୁସୀମା ଅତିକ୍ରମ କରିଥିବା ୱାରସ ପକ୍ଷରୁ କୁହାଯାଇଛି । ଆକ୍ରମଣରୁ ବର୍ତ୍ତିବା ପାଇଁ ଲୋକଙ୍କୁ ସୁରକ୍ଷିତ ସ୍ଥାନରୁ ବାହାରକୁ ନ ବାହାରିବା ପାଇଁ ପରାମର୍ଶ ଦିଆଯାଇଥିବା କିଏଭ୍ ମେୟର ଭିତାଲି କ୍ଲିଟ୍ଶ୍ଚୋକ ଟେଲିଗ୍ରାମରେ ପୋଷ୍ଟ କରି କହିଛନ୍ତି । ରୁଷୀୟ ଟିୟୁ-୯୫ଏମ୍ଏସ୍ ଷ୍ଟ୍ରାଟେଜିକ୍ ବମ୍ବରରୁ ମିସାଇଲ ଆକ୍ରମଣ ନେଇ ଆଗୁଆ ସୂଚନା ମିଳିବା ପରେ ୟୁକ୍ରେନରେ ଦେଶବ୍ୟାପୀ ଏୟାର ଆଲର୍ଟ ଜାରି କରାଯାଇଥିଲା ।
ଅନ୍ୟପକ୍ଷରେ ରୁଷ୍ ଆଡ଼ୁ ୟୁକ୍ରେନ୍କୁ ଛଡ଼ାଯାଇଥିବା ଏକ ମିସାଇଲ ପୋଲାଣ୍ଡ ବାୟୁସୀମାରେ ପ୍ରବେଶ କରିବାକୁ ନେଇ ପୋଲାଣ୍ଡ ସମେତ ନାଟୋ ଦେଶଗୁଡ଼ିକରେ ହଇଚଇ ସୃଷ୍ଟି ହୋଇଥିଲା । ପ୍ରାୟ ୩୯ ସେକେଣ୍ଡ ପର୍ଯ୍ୟନ୍ତ ରୁଷୀୟ ମିସାଇଲ ପୋଲାଣ୍ଡ ବାୟୁସୀମା ମଧ୍ୟରେ ରହିଥିଲା । ନିଜ ବାୟୁସୀମାର ସୁରକ୍ଷା ସୁନିଶ୍ଚିତ କରିବା ପାଇଁ ଆବଶ୍ୟକ ପ୍ରକ୍ରିୟା ଆରମ୍ଭ ହୋଇଥିବା ପୋଲାଣ୍ଡ ପକ୍ଷରୁ ଜାରି ଏକ ବୟାନରେ କୁହାଯାଇଛି ।
ରୁଷୀୟ ମିସାଇଲ ପୋଲାଣ୍ଡରେ ପ୍ରବେଶ କରିବା ପରେ ପୋଲାଣ୍ଡ ଏବଂ ଏହାର ସହଯୋଗୀଙ୍କ ଏୟାରକ୍ରାଫ୍ଟକୁ ସକ୍ରିୟ କରାଯାଇଥିଲା ବୋଲି ପୋଲିଶ ଆର୍ମ୍ଡ ଫୋର୍ସେସ୍ ଅପରେସନାଲ କମାଣ୍ଡ(ଆର୍ଏସ୍ଜେଡ୍) ପକ୍ଷରୁ କୁହାଯାଇଛି । ଦୁଇ ବର୍ଷ ଧରି ଚାଲିଥିବା ୟୁକ୍ରେନ୍-ରୁଷ୍ ଯୁଦ୍ଧରେ ୟୁକ୍ରେନ୍ ସୈନ୍ୟ ଏବଂ ସାମରିକ ଉପକରଣ ତଥା ଅସ୍ତ୍ରଶସ୍ତ୍ର ଅଭାବର ସାମ୍ନା କରୁଥିଲେ ବି ରୁଷ୍ ସୀମାରେ ପଶି ପ୍ରତିଆକ୍ରମଣ କରିବାକୁ ପଣ କରିଛି । ରୁଷ୍ ଛାଡ଼ିଥିବା ୨୯ ମିସାଇଲରୁ ୧୮ଟିକୁ ୟୁକ୍ରେନ୍ର ଏୟାର ଡିଫେନ୍ସ ସିଷ୍ଟମ ନଷ୍ଟ କରିଛି । ସେହିପରି ୨୮ ଡ୍ରୋନ୍ ମଧ୍ୟରୁ ୨୫ଟିକୁ ନଷ୍ଟ କରାଯାଇଛି । ତେବେ ଏହି ଆକ୍ରମଣରେ ମୃତାହତଙ୍କ ବାବଦରେ ତଥ୍ୟ ମିଳିନାହିଁ । ରୁଷ୍ ୟୁକ୍ରେନ୍ର ପ୍ରମୁଖ ଭିତ୍ତିଭୂମିକୁ ଟାର୍ଗେଟ କରି ଆକ୍ରମଣ କରୁଛି । ବିଶେଷ କରି ୟୁକ୍ରେନ୍ର ଶକ୍ତି ଭିତ୍ତିଭୂମିକୁ ଦୁର୍ବଳ କରିଦେବାକୁ ରୁଷ୍ ଚେଷ୍ଟା କରୁଛି ।
ପ୍ରକାଶଥାଉ କି, ରୁଷ୍ର ମସ୍କୋରେ ଥିବା ଏକ ସିଟି ହଲ୍ରେ ଗତ ଶୁକ୍ରବାର ବଡ଼ ଧରଣର ଆତଙ୍କବାଦୀ ଆକ୍ରମଣ ହୋଇଥିଲା । ଏଥିରେ ଅନ୍ୟୁନ୍ୟ ୧୩୩ ଜଣଙ୍କ ମୃତ୍ୟୁ ଘଟିଥିଲା।