ସାକ୍ଷୀଗୋପାଳ,୨୦/୧୧: ଆସନ୍ତା ୨୧ ତାରିଖରେ ପବିତ୍ର ଅଁଳା ନବମୀ । ସାକ୍ଷୀଗୋପାଳ ମନ୍ଦିରରେ ଶ୍ରୀରାଧାଙ୍କ ପାଦ ଦର୍ଶନର ସୌଭାଗ୍ୟ ଲାଭ କରିବେ ଲକ୍ଷାଧିକ ଶ୍ରଦ୍ଧାଳୁ । ଏହାକୁ ନେଇ ପୁରୀ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ଚାଲିଛି ।
ସାକ୍ଷୀଗୋପାଳ ମନ୍ଦିରରେ ପୂଜା ପାଉଥିବା ଶ୍ରୀରାଧାରାଣୀ ବର୍ଷତମାମ ଉତ୍ତର ଭାରତୀୟ ବେଶଭୂଷାରେ ଶ୍ରଦ୍ଧାଳୁଙ୍କୁ ଦର୍ଶନ ଦେଇଥାନ୍ତି । ଠାକୁରାଣୀଙ୍କ ପଦଯୁଗଳ ପାଦପଦ୍ମ ପିନ୍ଧା ବସନରେ ଆବୃତ୍ତ ହୋଇ ରହିଥାଏ । ବର୍ଷକୁ କେବଳ ଗୋଟିଏ ଦିନ ଅଁଳା ନବମୀରେ ଶ୍ରୀ ରାଧା ଓଡ଼ିଆଣୀ ବେଶରେ ଦର୍ଶନ ଦେଇଥାଆନ୍ତି । ଠାକୁରାଣୀଙ୍କ ଚରଣ ଯୁଗଳ ଦର୍ଶନ କରିବାର ସୁଯୋଗ ମିଳିଥାଏ । ଆସନ୍ତା ୨୦ ତାରିଖ ପୂର୍ବରାତ୍ରରୁ ଦେବନୀତି ସମ୍ପନ୍ନ ପରେ ଶ୍ରୀରାଧାରାଣୀଙ୍କୁ ଓଡ଼ିଆଣି ବେଶରେ ସଜ୍ଜିତ କରାଯିବ । ନାନା ଅଳଙ୍କାରରେ ବିମଣ୍ଡିତ ହୋଇ ଠାକୁରାଣୀ ଶୋଭା ପାଇବେ ।
ସେହିପରି ଶ୍ରୀ ଗୋପାଳଜୀଉ ନଟବର ବେଶରେ ସୁସଜ୍ଜିତ ହୋଇ ଦର୍ଶନ ଦେବେ ।ପ୍ରତିବର୍ଷ ଅଁଳା ନବମୀରେ ଠାକୁର ଦର୍ଶନ ପାଇଁ ସିଂହଦ୍ୱାରଠାରୁ ସାକ୍ଷୀଗୋପାଳ ବଜାର ରେଳଫାଟକ ପର୍ଯ୍ୟନ୍ତ ଲମ୍ବା ୨ କିମି ଦୀର୍ଘ ଧାଡ଼ି ଲାଗିଥାଏ । ଶୃଙ୍ଖଳିତ ଦର୍ଶନ ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ମନ୍ଦିର ସିଂହଦ୍ୱାର ସମ୍ମୁଖରେ ୩ ଥାକିଆ ବାଉଁଶ ବ୍ୟାରିକେଡ୍ ନିର୍ମାଣ ହୋଇଛି । ଭକ୍ତମାନେ ଧାଡିରେ ଆସି ବ୍ୟାରିକେଡ୍ ଦେଇ ଦିଅଁ ଦର୍ଶନ କରିବେ । ଏହାକୁ ବାଦ୍ଦେଲେ ସୁରକ୍ଷା ବ୍ୟବସ୍ଥା ନିମନ୍ତେ ମନ୍ଦିର ପରିସର ଓ ସିଂହଦ୍ୱାର ସମ୍ମୁଖରେ ସିସିଟିଭି କ୍ୟାମେରା ଳଗାଯାଇଛି । ଶ୍ରଦ୍ଧାଳୁଙ୍କ ରହଣି ନିମନ୍ତେ ଅସ୍ଥାୟୀ ଆଶ୍ରୟ ସ୍ଥଳ ନିର୍ମାଣ କରାଯାଇଛି । ଅସ୍ଥାୟୀ ପରିସ୍ରାଗାର ସୁବିଧା କରାଯାଇଛି । ମନ୍ଦିର ଆଖପାଖ ଅଞ୍ଚଳ, ବଜାର ରାସ୍ତାରେ ଆଲୋକ ବ୍ୟବସ୍ଥା ହୋଇଛି । ଜିଲ୍ଲା ପ୍ରଶାସନ ତରଫରୁ ପଞ୍ଚସଖା ମୁକ୍ତାକାଶ ରଙ୍ଗମଞ୍ଚରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହେବ ବୋଲି ସୂଚନା ମିଳିଛି ।