ସମ୍ବଲପୁର,୨୨/୦୩: ମାସେ ତଳେ ସମ୍ବଲପୁର ବିଜେଡି ଉଠୁଥିଲା, ପଡୁଥିଲା । ଭୁବନେଶ୍ୱରରୁ ଛାମୁଆ ନେତା ଘନ ଘନ ଗସ୍ତ କରୁଥିଲେ । ସର୍କିଟ୍ ହାଉସ୍ରେ ସ୍ଥାନୀୟ ସଙ୍ଗଠକଙ୍କ ଲମ୍ବା ଲାଇନ୍ ଲାଗୁଥିଲା । ଏଇ କିଛି ଦିନ ହେବ ମେଣ୍ଟ ଚର୍ଚ୍ଚା ବଢ଼ିବା ସହ ସମ୍ବଲପୁର ବିଜେଡିରେ ନିରବତା ଛାଇ ଯାଇଛି । ନା ନେତା ଘରୁ ବାହାରୁଛନ୍ତି, ନା ସେହିଭଳି ପ୍ରଚାର କରୁଛନ୍ତି ।
ବିଜେଡି ୨୦୧୯ରେ ପରାସ୍ତ ହେବା ପରେ ଏଥର ଏହାକୁ ଦଖଲକୁ ନେବାକୁ ପ୍ରୟାସ ଆରମ୍ଭ କରିଥିଲା । ଗୋଷ୍ଠୀ କନ୍ଦଳ ସତ୍ତେ୍ୱ ସବୁ ନେତା ଏକ ହୋଇ ଦଳର ପ୍ରଚାରକୁ ଓହ୍ଲାଇ ସାରିଥିଲେ । ସମ୍ବଲପୁର ବିଧାନସଭା ମଣ୍ଡଳୀ ମହାନଗରରେ ସୀମିତ ଥିବାରୁ ୱାର୍ଡ କମିଟି ପ୍ରସ୍ତୁତ ସରିଥିଲା । ଏଥିପାଇଁ ରୋହିତ ପୂଜାରୀ, ରାସେଶ୍ୱରୀ ପାଣିଗ୍ରାହୀ, ସଞ୍ଜୟ ବାବୁ, ସଞ୍ଜିତ ମହାନ୍ତି, ସିଦ୍ଧାର୍ଥ ଦାସ, ସିଦ୍ଧାର୍ଥ ସାହାଙ୍କୁ ୱାର୍ଡ ସବୁ ଭାଗ କରି ଦିଆଯାଇଥିଲା । ଜୟଙ୍କୁ ଘେରିବାକୁ ସମସ୍ତ ରଣନୀତି ପ୍ରସ୍ତୁତ କରି ଦଳର ନେତା ଆଗେଇ ଚାଲିଥିଲେ । ହେଲେ ଏବେ ସେ ସ୍ଥିତି ନାହିଁ । ନେତା ପୂର୍ବଭଳି ଲୋକଙ୍କ ପାଖକୁ ଯାଉ ନାହାନ୍ତି । ବୈଠକ, ଆଲୋଚନା, ବନ୍ଧୁମିଳନ କାର୍ଯ୍ୟକ୍ରମ କରୁନାହାନ୍ତି । ମଝିରେ ମଝିରେ ବ୍ୟକ୍ତିଗତ ଭାବେ ନିଜ କର୍ମୀଙ୍କୁ କେବଳ ଉତ୍ସାହିତ କରିବାକୁ ଘରେ ବସି ଆଲୋଚନା କରୁଛନ୍ତି । ହେଲେ କର୍ମୀ ଏହାକୁ ନେଇ ଖୁସି ନଥିବା କହିଛନ୍ତି ।
ଦୁଇ ମାସ ତଳେ ବିଜେଡି ଜିଲ୍ଲା ସଭାପତି ରୋହିତ ପୂଜାରୀ ସମ୍ବଲପୁର ଆସନରୁ ଲଢ଼ିବାକୁ ଜୋରଦାର ପ୍ରସାୟ କରୁଥିଲେ । ରାସେଶ୍ୱରୀ ପାଣିଗ୍ରାହୀ, ସିଦ୍ଧାର୍ଥ ଦାସ, ସିଦ୍ଧାର୍ଥ ସାହାଙ୍କ ସମର୍ଥକଙ୍କୁ ନିଜ ପଟକୁ ଆଣିବାକୁ ଚେଷ୍ଟା କରୁଥିଲେ । ସମସ୍ତଙ୍କୁ ବ୍ୟକ୍ତିଗତ ଭାବେ ଫୋନ୍ ବି କରୁଥିଲେ । ହେଲେ ଏବେ ସେ ବି ନିରବ । ସମ୍ବଲପୁରରେ ତାଙ୍କୁ ଦେଖିବାକୁ ମଧ୍ୟ ମିଳୁନି । କେବଳ ରୋହିତ ନୁହନ୍ତି, ପ୍ରାୟ ସମସ୍ତଙ୍କ ସମାନ ଦଶା । ଯଦି ବିଜେପି-ବିଜେଡି ମଧ୍ୟରେ ମେଣ୍ଟ ହୁଏ, ତେବେ ସମ୍ବଲପୁର ଆସନ କାହାକୁ ଯିବ? ବିଜେପିର ବର୍ତ୍ତମାନ ବିଧାୟକ ଥିବା ସହ ଏଭଳି ଗୁରୁତ୍ୱପୂର୍ଣ୍ଣ ସହରକୁ ବିଜେପି କେବେ ହେଲେ ଛାଡିବ ନାହିଁ । ବିଜେଡିର ଜଣେ ବରିଷ୍ଠ ନେତା ନାଁ ଗୋପନ ରଖି କହିଛନ୍ତି, ପୂର୍ବରୁ ଆମେ ସଙ୍ଗଠନ ସଜାଡିବାକୁ ବହୁ ଖର୍ଚ୍ଚ କରିଛୁ । ଏବେ ଯଦି ସମ୍ବଲପୁର ବିଜେପି ହାତକୁ ପଳାଇବ ସେହି ଖର୍ଚ୍ଚ ଯିବା ସହ ୪ ବର୍ଷର ପରିଶ୍ରମ ବି ଯିବ ।
