ଯଯାତିନଗର, ୧୦।୪: କୋରେଇ ବିଜେପି ରାଜନୀତିରେ ରୋଚକ ପରିସ୍ଥିତି ସୃଷ୍ଟି ହୋଇଛି । ବିଜେପି ଏହି ଆସନରେ ବିଜେଡି ଛାଡ଼ି ବିଜେପିରେ ଯୋଗ ଦେଇଥିବା ଆକାଶ ଦାସ ନାୟକଙ୍କୁ ଦଳୀୟ ଟିକେଟ୍‌ ଦେଇଛି । କୋରେଇରେ ବିଜେପି ଦଳୀୟ ଟିକେଟ୍‌ ଆଶାୟୀ ଥିବା ବିଶ୍ୱଜିତ ନାୟକ ଓ ଆଲେକଜାଣ୍ଡାର ଦାସ ଏ ପର୍ଯ୍ୟନ୍ତ ଆକାଶଙ୍କୁ ଧରାଛୁଆଁ ଦେଉ ନାହାନ୍ତି । ଆକାଶଙ୍କୁ ବିଜେପି ନେତାଙ୍କ ଅସହଯୋଗ ଏବେ ବି ଜାରି ରହିଛି । ଶେଷରେ ଆକାଶ କୋରେଇର ପୂର୍ବତନ ବିଧାୟିକା ସଂଚିତା ମହାନ୍ତିଙ୍କ ଭରସାରେ ନିର୍ବାଚନ ଲଢ଼ିବାକୁ ଉଦ୍ୟମ କରିଛନ୍ତି । ୨୦୦୦ରୁ ୨୦୧୪ ପର୍ଯ୍ୟନ୍ତ ସଂଚିତା କୋରେଇରୁ ନିର୍ବାଚନ ଲଢ଼ି ୨୦୦୪ରେ ବିଧାୟିକା ହୋଇ ପାରିଥିଲେ । ୨୦୧୪ ନିର୍ବାଚନରେ ସଂଚିତା ମହାନ୍ତି ୧୫ ହଜାର ଭୋଟ୍‌ ପାଇ ୩ୟ ସ୍ଥାନରେ ଥିଲେ । ୨୦୧୯ରେ ସଂଚିତାଙ୍କୁ ବିଜେପି ଟିକେଟ୍‌ ଦେଇନଥିଲା । ସଂଚିତାଙ୍କ ସ୍ଥାନରେ ବିଜେପି ବିଶ୍ୱଜିତଙ୍କୁ ୨୦୧୯ରେ ପ୍ରାର୍ଥୀ କରିଥିଲା । 

ସଂଚିତା ୨୦୧୯ରୁ ନିରବି ଯାଇଥିବା ବେଳେ, ଏବେ ଆକାଶଙ୍କ ମାର୍ଗଦର୍ଶକ ସାଜିବାକୁ କୋରେଇରେ ପହଞ୍ଚିଛନ୍ତି । କୋରେଇ ବିଜେପି ସଂଗଠନ ଓ କର୍ମୀ ଆକାଶଙ୍କ ପାଖକୁ ଏ ଯାବତ୍‌ ଆସି ନାହାନ୍ତି । ଶେଷରେ ସଂଚିତା ହିଁ ଆକାଶଙ୍କ ଆଶାବାଡ଼ି ସାଜିଛନ୍ତି । ୨୦୧୯ରେ ବିଶ୍ୱଜିତ ନାୟକ, ସଂଚିତା ମହାନ୍ତିଙ୍କ ଟିକେଟ୍‌ କାଟି ବିଜେପିରୁ ପ୍ରାର୍ଥୀ ହୋଇଥିଲେ । ୨୦୨୪ରେ ବିଶ୍ୱଜିତଙ୍କ ଟିକେଟ୍‌ କଟିବା ପରେ ସଂଚିତା, ଆକାଶଙ୍କ ସହଯୋଗୀ ସାଜିଛନ୍ତି । ଚଳିତ ମାସ ୮ ତାରିଖରେ ରାଜ୍ୟ ବିଜେପି ସଭାପତି ମନମୋହନ ସାମଲ କୋରେଇର ଦୁଇ ଆଶାୟୀ ବିଜେପି ନେତା ବିଶ୍ୱଜିତ ଓ ଆଲେକଜାଣ୍ଡାରଙ୍କୁ ନେଇ ଆକାଶଙ୍କ ଉପସ୍ଥିତିରେ ମାନଭଂଜନ ବୈଠକ କରିଥିଲେ । ବୈଠକ ଆପାତତଃ ବିଫଳ ହୋଇଛି । ଦୁଇ ଆଶାୟୀଙ୍କ ଉପରୁ ଆଶା ତୁଟାଇବା ପରେ ଆକାଶ ଏବେ ସଂଚିତାଙ୍କ ନେତୃତ୍ୱକୁ ଆଧାର କରି ବିଜେପି କର୍ମୀଙ୍କ ସହଯୋଗ ଲୋଡିବା ପାଇଁ ବାହାରିଛନ୍ତ