ଭୁବନେଶ୍ୱର,୫/୦୮: ରଙ୍ଗିଲା ସତ୍ୟଜିତ୍ ସାମଲ ଓରଫ୍ ସତ୍ୟର ମିଛ ପ୍ରେମ କାହାଣୀର ଆଉ ଏକ ଫର୍ଦ୍ଦ ଲେଉଟାଇଛି କମିଶନରେଟ୍ ପୁଲିସ । ଏଥିରେ ପୁଲିସ ତା’ର ସାମାଜିକ ଗଣମାଧ୍ୟମ ଓ ବିବାହ ସୂତ୍ର ଆକାଉଣ୍ଟଗୁଡିକୁ ଗୁରୁତ୍ୱ ଦେଇଛି । ତା’ର ଫୋନ୍କୁ ଯାଞ୍ଚ କରିବା ବେଳେ ସେଥିରୁ ପୁଳା ପୁଳା ଅଶ୍ଲୀଳ ଫଟୋଚିତ୍ର ଓ ଭିଡିଓ ମିଳିଛି । ଏସବୁକୁ ତାଲିକାଭୁକ୍ତ କରି ୧୧ଜଣ ମହିଳାଙ୍କ ସହ ପୁଲିସ ଯୋଗାଯୋଗ କରିଛି । ସେମାନଙ୍କଠାରୁ ସତ୍ୟଜିତ୍ର ମିଛ ପ୍ରେମ କାହାଣୀ ଶୁଣି ପୁଲିସ କାନ ତାବ୍ଦା ହୋଇଯାଇଛି ।
ସତ୍ୟଜିତ୍ ଧରୁଥିବା ୨ଟି ମୋବାଇଲ୍ ଫୋନ୍ରୁ ପ୍ରାୟ ୪୩ଟି ନକଲି ସାମାଜିକ ଗଣମାଧ୍ୟମ ଓ ବିବାହ ସୂତ୍ର ଆକାଉଣ୍ଟର ସୁରାକ୍ ମିଳିଛି । ସେଥିରୁ ଫେସ୍ବୁକ୍ରେ ୧୮ଟି ଆକାଉଣ୍ଟ ଖୋଲିଥିବା ବେଳେ ଇନ୍ଷ୍ଟାଗ୍ରାମ୍ରେ ୮ଟି ଆକାଉଣ୍ଟ ଖୋଲଥିଲା । ଡିଭୋର୍ସ ମାଟ୍ରିମୋନିରେ ୩ଟି ଓ ମାଟ୍ରିମୋନିରେ ୧୦ଟି ଜୀବନସାଥୀ. କମ୍ରେ ୪ଟି ଆକାଉଣ୍ଟ ଖୋଲିଥିଲା ।
ସବୁଥିରେ ସତ୍ୟଜିତ୍ ନିଜର ଭିନ୍ନ ଭିନ୍ନ ପରିଚୟ ଦେଇଥିଲା । କେଉଁଥିରେ ନିଜକୁ ସାଉଦି ଆରବର ରାଜଧାନୀ ରିୟାଦର ବିମାନ ପାଇଲଟ୍ ସଜାଇଥିଲା । କେଉଁ ଆକାଉଣ୍ଟରେ ନିଜକୁ ବ୍ରିଟିଶ୍ ସଂସ୍ଥା ‘କୋଷ୍ଟା କାଫି’ର ବିକ୍ରି ପରିଚାଳକ ବୋଲି ଦର୍ଶାଇଥିଲା । ଏମିତିକି କିଛି ଆକାଉଣ୍ଟରେ ନିଜକୁ କ୍ରାଇମ୍ବ୍ରାଞ୍ଚ, ସିବିଆଇ, ପୁଲିସ ଅଧିକାରୀ ବୋଲି ପରିଚୟ ଦେଇଥିଲା । ଅଧିକାଂଶ ସାମାଜିକ ଗଣମାଧ୍ୟମ ଆକାଉଣ୍ଟରେ ନିଜ ନାଁ ଇନ୍ସପେକ୍ଟର ରାହୁଲ ବୋଲି ଲେଖିବାକୁ ସେ ଭଲ ପାଉଥିଲା ।
ବଡ଼କଥା ହେଲା, ଅଧିକାଂଶ ଯୁବତୀଙ୍କୁ ପ୍ରେମ ଜାଲରେ ଫସାଇ ସେ ଭିଡିଓ ବାର୍ତ୍ତା (କଲ୍) କରୁଥିଲା । ସେମାନଙ୍କୁ ନାନା ଅଶ୍ଲୀଳ କାହାଣୀ ଶୁଣାଇ ଉଲଗ୍ନ ହେବା ପାଇଁ ବାଧ୍ୟ କରୁଥିଲା । କେହି ଯୁବତୀ ଉଲଗ୍ନ ହେବା ପରେ ତା’ର ବହୁ ସ୍କ୍ରିନ୍ସଟ୍ ରଖୁଥିଲା । ପାଖରେ ରଖିଥିବା ଅନ୍ୟ ଏକ ଫୋନ୍ରେ ଉଲଗ୍ନ ବେଳର ଭିଡିଓ ଉତ୍ତୋଳନ କରୁଥିଲା । ଏହି ଭିଡିଓ ଓ ଫଟୋଚିତ୍ରକୁ ଦେଖାଇ ଯୁବତୀମାନଙ୍କଠାରୁ ଲକ୍ଷ ଲକ୍ଷ ଟଙ୍କା ଦାବି କରୁଥିଲା ।
ପୁଲିସ ଏହି ଅଶ୍ଲୀଳ ଭିଡିଓ ଓ ଫଟୋଚିତ୍ରଗୁଡି଼କୁ ତନ୍ନତନ୍ନ କରି ଯାଞ୍ଚ କରିଛି । ଅଶ୍ଳୀଳ ଫଟୋଚିତ୍ରକୁ ସେମାନଙ୍କ ସାମାଜିକ ଗଣମାଧ୍ୟମ ଆକାଉଣ୍ଟ ସହ ମହିଳାମାନଙ୍କ ପରିଚୟ ଓ ଠିକଣା ମେଳ କରାଇଛି । ସେଥିରୁ ପ୍ରାୟ ୧୧ଜଣ ମହିଳାଙ୍କ ତାଲିକା ପ୍ରସ୍ତୁତ କରିଛି । ଯେଉଁମାନେ କି ସତ୍ୟର ପ୍ରେମ ଜାଲରେ ଫସି ସର୍ବସ୍ୱ ହରାଇଛନ୍ତି । ୧୧ଜଣଙ୍କ ମଧ୍ୟରୁ ୬ଜଣ ହେଉଛନ୍ତି ବିଧବା । ୪ଜଣ ଯୁବତୀ ଘରୋଇ ସଂସ୍ଥାରେ ଚାକିରି କରୁଛନ୍ତି । ସତ୍ୟ ପ୍ରଥମେ ଭୁବନେଶ୍ୱରରେ ଚାକିରି କରିବା ବେଳେ ପ୍ରେମରେ ଫସାଇଥିବା ଜଣେ ଯୁବତୀ ମଧ୍ୟ ଏହି ତାଲିକାରେ ଅଛନ୍ତି ।
କ୍ୟାପିଟାଲ ଥାନା ପୁଲିସର ୨ଜଣ ମହିଳା ପୁଲିସ ଅଧିକାରୀ ପୀଡିତାମାନଙ୍କ ସହ ଫୋନ୍ରେ କଥା ହୋଇଛନ୍ତି । ସେମାନେ ସତ୍ୟର ମିଛ ପ୍ରେମକାହାଣୀକୁ ଘଣ୍ଟା ଘଣ୍ଟା ଧରି ଧୈର୍ଯ୍ୟର ସହ ଶୁଣିଛନ୍ତି । ଏମିତିକି ସତ୍ୟର ଧମକରେ ଡରିଯାଇ କିଛି ତା’ ସହ ବାରମ୍ବାର ଶାରୀରିକ ସମ୍ପର୍କ ରଖିବାକୁ ବାଧ୍ୟ ହୋଇଥିଲେ ବୋଲି ପୀଡି଼ତାମାନେ ବଖାଣିଛନ୍ତି । ନାମ ଗୋପନ ରଖିବା ସର୍ତ୍ତରେ ଥାନାରେ ଅଭିଯୋଗ କରିବାକୁ ପୀଡି଼ତାମାନଙ୍କୁ ପୁଲିସ ଅଧିକାରୀ ପରାମର୍ଶ ଦେଇଥିଲେ । କିନ୍ତୁ ଲୋକଲଜ୍ଜା ଭୟରେ କେହି ଅଭିଯୋଗ ପାଇଁ ରାଜି ହୋଇନଥିବା ପୁଲିସ କହିଛି ।
କୋରାପୁଟରୁ ମିଳିଲା ଆଉ ୨ ଦାମୀ କାର
କ୍ୟାପିଟାଲ ଥାନା ପୁଲିସକୁ ସତ୍ୟ ନାଁରେ ଥିବା ଆଉ ୨ଟି ଦାମୀ କାରର ସନ୍ଧାନ ମିଳିଛି । ସେଗୁଡି଼କୁ କୋରାପୁଟରୁ ପୁଲିସ ଜବତ କରିଛି । ସତ୍ୟକୁ ଗିରଫ ବେଳେ ପୁଲିସ ୨ଟି କାର ଜବତ କରିଥିଲା । ଠକେଇ ଟଙ୍କାରେ କାର କିଣି କିଛି ଟ୍ରାଭେଲ୍ସରେ ବ୍ୟବସାୟିକ ସୂତ୍ରରେ ଲଗାଇଥିବା ପୁଲିସ କହିଛି ।
ରିମାଣ୍ଡରେ ଆଣିବ ପୁଲିସ
ରଙ୍ଗିଲା ସତ୍ୟକୁ ରିମାଣ୍ଡରେ ଆଣିବାକୁ ସଜବାଜ ହେଉଛି ପୁଲିସ । ସୋମବାର ଅଦାଲତରେ ୩ ଦିନିଆ ରିମାଣ୍ଡ ଆବେଦନ କରାଯିବ । ରିମାଣ୍ଡ ବେଳେ ତା’ର ଅଛିଣ୍ଡା ମିଥ୍ୟା ପ୍ରେମ କାହାଣୀର ଖିଅ ଯୋଡି଼ବ । ସେ କେଉଁଠୁ ବନ୍ଧୁକ କିଣିଥିଲା? ଚୋରା ବନ୍ଧୁକ ବେପାରରେ ସମ୍ପୃକ୍ତ ଥିଲା କି? ସେ ସମ୍ପର୍କରେ ଅଧିକ ଖୋଳତାଡ଼ କରାଯିବ ବୋଲି ଡିସିପି ପ୍ରତୀକ ସିଂ କହିଛନ୍ତି ।
ବଙ୍ଗୀୟ ସାମ୍ବାଦିକାଙ୍କୁ
ଟାର୍ଗେଟ କରିଥିଲା ପଞ୍ଚିମବଙ୍ଗରେ ରହୁଥିବା ବଙ୍ଗୀୟ ସାମ୍ବାଦିକାଙ୍କୁ ଟାର୍ଗେଟ କରିଥିଲା ସତ୍ୟଜିତ୍ । କିଛିଦିନ ତଳେ ସେ ଏକ ନକଲି ମାଟ୍ରିମୋନି ଆକାଉଣ୍ଟ ଖୋଲି ସାମ୍ବାଦିକାଙ୍କ ସହ ଇନ୍ସପେକ୍ଟର ପରିଚୟରେ କଥା ହୋଇଥିଲା । ଏହାର ଏକ ଅଡିଓ ବାର୍ତ୍ତା ପ୍ରଘଟ ହୋଇଛି । ସେଥିରୁ ଜଣାପଡୁଛି, ସାମ୍ବାଦିକାଙ୍କୁ ପ୍ରେମ ଜାଲରେ ଫସାଇ ଠକିବାକୁ ଯୋଜନା କରିଥିଲା ।
