ନୂଆଦିଲ୍ଲୀ : ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଘନିଷ୍ଠ ତଥା ପିଏ ବିଭବ କୁମାରଙ୍କୁ ସୁପ୍ରିମକୋର୍ଟରୁ ମିଳିଲା ଆଶ୍ୱସ୍ତି। ଆଜି ସୋମବାର ( ୨ ସେପ୍ଟେମ୍ୱର)ରେ ତାଙ୍କୁ ମିଳିଲା ଜାମିନ। ବିଭବ ରାଜ୍ୟସଭା ସାଂସଦ ସ୍ୱାତୀ ମାଲିୱାଲଙ୍କ ଉପରେ ଆକ୍ରମଣ ଅଭିଯୋଗରେ ଜେଲ୍ରେ ଥିଲେ। ସୁପ୍ରିମକୋର୍ଟ ଆଦେଶ ଦେଇଛନ୍ତି ଯେ, ଯେପର୍ଯ୍ୟନ୍ତ ସବୁ ପ୍ରମୁଖ ସାକ୍ଷୀଙ୍କର ଜେରା ସରି ନାହିଁ, ସେପର୍ଯ୍ୟନ୍ତ ବିଭବ କୁମାର କେଜ୍ରିୱାଲଙ୍କ ଘରୋଇ ସଚିବ ଭାବେ କାମ କରି ପାରିବେ ନାହିଁ କି,ମୁଖ୍ୟମନ୍ତ୍ରୀଙ୍କ ଅଫିସିଆଲି ନିବାସକୁ ଯିବେ ନାହିଁ।
କୋର୍ଟ ସାକ୍ଷୀଙ୍କର ସାକ୍ଷ୍ୟ ପ୍ରମାଣ ନସରିବା ଯାଏ ଏହି ମାମଲା ଉପରେ କହିବାକୁ ମନା କରି ଦେଇଛନ୍ତି। ସୁପ୍ରିମକୋର୍ଟ ସ୍ୱତନ୍ତ୍ର କୋର୍ଟଙ୍କୁ ୩ ସପ୍ତାହ ଭିତରେ ଏହି ମାମଲାକୁ ସାରିବାକୁ କହିଛନ୍ତି। ଏହାସହ ହିଁ ଏହି ସମୟରେ ବିଭବଙ୍କୁ କୌଣସି ବି ପ୍ରକାରର ଅଫିସିଆଲି ପୋଷ୍ଟ ନେବାରେ ରୋକ୍ ଲଗେଇଛନ୍ତି।
କହି ରଖୁଛୁ କି , ୧୮ ମେ’ ରେ ଦିଲ୍ଲୀ ପୁଲିସ୍ ବିଭବ କୁମାରଙ୍କୁ କେଜ୍ରିୱାଲଙ୍କ ଘରୁ ଗିରଫ କରି ଥିଲେ। ତାଙ୍କ ବିରୋଧରେ ରାଜ୍ୟସଭା ସାଂସଦ ସ୍ୱାତୀ ମାଲିୱାଲ କେସ୍ ରୁଜୁ କରାଇ ଥିଲେ। ଏଫଆଇଆରରେ ସ୍ୱାତୀ ଅଭିଯୋଗ କରିଥିଲେ ଯେ, ବିଭବ ତାଙ୍କୁ ବିନା କୌଣସି କାରଣରେ ୭-୮ ଥର ଚାପୁଡ଼ା ମାରିଥିଲେ। ତାଙ୍କ ଛାତି ଓ ଅଣ୍ଟାକୁ ଗୋଇଠା ମାରି ଥିଲେ। ତାଙ୍କ ପୋଷାକ ବି ଟାଣି ଥିଲେ। ଏ ସବୁ ୧୩ ମେ’ରେ ହୋଇଥିଲା, ଯେବେ ସେ ଦିଲ୍ଲୀର ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଭେଟିବାକୁ ତାଙ୍କର ବାସଭବନକୁ ଯାଇଥିଲେ।
