ଫୁଲବାଣୀ ୧୫/୯- ବାକିରେ ସ୍କୁଲ ରୂପାନ୍ତରୀକରଣ କାମ କରାଇ ଅସୁବିଧାରେ ପଡିଛି ବ୍ଲକ ପ୍ରଶାସନ। ବିଲ୍ ବାକି ଥିବା ଅଭିଯୋଗ କରି  ସ୍କୁଲରେ ତାଲା ପକାଇ ଦେଇଛନ୍ତି ଠିକାଦାର । ଏଭଳି ଦୃଶ୍ୟ ଦେଖିବାକୁ ମିଳିଛି ଫୁଲବାଣୀ ବ୍ଲକ ଅନ୍ତର୍ଗତ ବିଶିପଡ଼ା ଗ୍ରାମର ଶ୍ରୀଦେବୀ ଉଚ୍ଚ ବିଦ୍ୟାଳୟରେ । ସୂଚନା ଅନୁଯାୟୀ, ୫-ଟି ଅଧୀନରେ ଏହି ବିଦ୍ୟାଳୟ ଗତ ବର୍ଷ ରୂପାନ୍ତରୀକରଣ କରାଯାଇଥିଲା। ତେବେ  ଉଦଘାଟନ ହେବାର ବର୍ଷେରୁ ଉର୍ଦ୍ଧ ସମୟ ବିତିଯାଇଥିଲେ ସୁଦ୍ଧା କାମ କରିଥିବା ଦୁଇ ଜଣ ସ୍ଥାନୀୟ ଠିକାଦାରଙ୍କୁ ୩୫ ଲକ୍ଷରୁ ଉର୍ଦ୍ଧ୍ଵ ଟଙ୍କା ମିଳି ନ ଥିବା ସେମାନେ ଅଭିଯୋଗ କରିଛନ୍ତି। ବାରମ୍ବାର ଏ ନେଇ ବ୍ଲକ ପ୍ରଶାସନକୁ ଜଣାଇବା ପରେ ବି କିଛି ନ ହେବାରୁ  ଆଜି ଦୁଇ ଠିକାଦାର ସ୍କୁଲରେ ତାଲା ପକାଇ ଦେଇଥିଲେ । ସ୍କୁଲର ଶିକ୍ଷକ ଶିକ୍ଷୟତ୍ରୀ ଏବଂ ଛାତ୍ର ଛାତ୍ରୀ ମାନଙ୍କୁ ବାହାର କରିଦେଇ ସେମାନେ ସ୍କୁଲର ମୁଖ୍ୟ ଫାଟକରେ ତାଲା ପକାଇ ଦେଇଥିଲେ । ଫଳରେ ସମସ୍ତେ ସ୍କୁଲ ବାହାରେ ବସି ରହିଥିଲେ। ପ୍ରାୟ ଦୁଇ ଘଣ୍ଟା ପରେ ଏବିଡିଓ ସନ୍ତୋଷ କୁମାର ଦିଗାଲ ପହଞ୍ଚି ଠିକାଦାରଙ୍କ ବକେୟା ଟଙ୍କା ୧୦ ଦିନ ମଧ୍ୟରେ ଦିଆଯିବ ବୋଲି ପ୍ରତିଶୃତି ଦେବା ପରେ ସ୍କୁଲରୁ ତାଲା ଖୋଲିଥିଲା।