ଭୁବନେଶ୍ୱର,୨୮/୦୯: ନିର୍ବାଚନ ପରଠାରୁ ଧିମେଇ ଯାଇଥିବା ସ୍ୱୟଂ ସହାୟକ ଗୋଷ୍ଠୀ(ଏସ୍ଏଚଜି) ପୁଣି ସକ୍ରିୟ ହେବେ । ବିରୋଧୀ ଦଳ ବାରମ୍ବାର ଏ ପ୍ରସଙ୍ଗରେ ସରକାରଙ୍କୁ ଟାର୍ଗେଟ୍ କରୁଥିଲା । ନୂଆ ସରକାର ‘ସୁଭଦ୍ରା’ ଯୋଜନା ପରେ ଏସ୍ଏଚଜିକୁ ଭୁଲି ଗଲେ ବୋଲି କହୁଥିଲେ । କିନ୍ତୁ ସରକାର ବିରୋଧୀଙ୍କୁ ଚୁପ୍ କରିବାକୁ ବଡ଼ ଯୋଜନା କରିଛନ୍ତି । ଏଚ୍ଏସଜିକୁ ପୁଣି ଫୋକସ୍ କରିବେ ।ଗାଁ ଓ ସହରରେ ମିଶନ ଶକ୍ତି ରିଟେଲ ମାର୍ଟ ଖୋଲିବେ । ପ୍ରଥମ ପର୍ଯ୍ୟାୟରେ ୨୬୫୬ଟି ରିଟେଲ ମାର୍ଟ ଖୋଲିବାକୁ ଯୋଜନା ହୋଇଛି।
ସ୍ୱୟଂ ସହାୟକ ଗୋଷ୍ଠୀର ମହିଳାମାନେ ଏହାକୁ ପରିଚାଳନା କରିବେ । ଏସ୍ଏଚଜି ଫେଡେରେସନକୁ ଏହାର ଦାୟିତ୍ୱ ଦିଆଯିବ । ଅଗଷ୍ଟ ସୁଦ୍ଧା ଏହି ମାର୍ଟ ଖୋଲିବାକୁ ଯୋଜନା ଥିଲା । କିନ୍ତୁ ଏହା ଖୋଲିନଥିବାରୁ ସବୁ ଜିଲ୍ଲା ପରିଷଦର କାର୍ଯ୍ୟନିର୍ବାହୀ ଅଧିକାରୀ ଓ ବିଡିଓଙ୍କୁ ଚିଠି ଲେଖି କଡ଼ା ତାଗିଦ୍ କରିଛନ୍ତି ମିଶନ ଶକ୍ତି ବିଭାଗର ସଚିବ ଶାଲିନୀ ପଣ୍ଡିତ । ତତ୍କାଳ କାମ ଆରମ୍ଭ ପାଇଁ ସେ ନିର୍ଦ୍ଦେଶ ଦେଇଛନ୍ତି । ସ୍ୱୟଂ ସହାୟକ ଗୋଷ୍ଠୀ (ଏସ୍ଏଚଜି)କୁ ଏସ୍ଏମଇ(କ୍ଷୁଦ୍ର ଓ ମଧ୍ୟମ ଶିଳ୍ପ ଉଦ୍ୟୋଗ)ରେ ପରିଣତ ପାଇଁ ନୂଆ ସରକାର ଅଣ୍ଟା ଭିଡ଼ିଛନ୍ତି । ଏଥିପାଇଁ ମିଶନ ମୋଡ୍ରେ କାମ କରିବାକୁ କୁହାଯାଇଛି । ସ୍ୱୟଂ ସହାୟକ ଗୋଷ୍ଠୀର ମହିଳାଙ୍କୁ ଉଦ୍ୟୋଗୀ କରିବାକୁ ଯୋଜନା ହୋଇଛି । ମହିଳାଙ୍କୁ ନିଜ ଅଞ୍ଚଳରେ ରୋଜଗାର ଦେଇ ଆତ୍ମନିର୍ଭରଶୀଳ କରାଯିବ । ଏଥିପାଇଁ ବିସ୍ତୃତ ଏସ୍ଓପି ତିଆରି ହୋଇଛି। ଗାଁ ଓ ସହରରେ ଭିଡ଼ ହେଉଥିବା ସ୍ଥାନରେ ଏହି ମାର୍ଟ ଖୋଲାଯିବ । ଏଠାରେ ଦୈନିକ ଆବଶ୍ୟକ ଥିବା ସାମଗ୍ରୀ, ସ୍ଥାନୀୟ ଅଞ୍ଚଳରେ ଉତ୍ପାଦିତ ସାମଗ୍ରୀ, ଏସ୍ଏଚଜି ଦ୍ୱାରା ପ୍ରସ୍ତୁତ ସାମଗ୍ରୀ, ରାସନ ସାମଗ୍ରୀ ଓ ଖାଦ୍ୟ, କସମେଟିକସ୍, ଥଣ୍ଡା ପାନୀୟ, ଅଫିସ ଉପକରଣ ଓ ଘରୋଇ ଉପକରଣ ବିକ୍ରି ହେବ । ବ୍ୟବହାର ନ ହୋଇ ପଡ଼ି ରହିଥିବା ସରକାରୀ କୋଠା, ଅଫିସ୍ ଓ ମାର୍କେଟ୍ କମ୍ପେ୍ଲକ୍ସରେ ଏହି ମାର୍ଟ ଖୋଲିବ । ଯେଉଁଠି ସ୍ଥାନର ଅଭାବ ଥିବ ସେଠାରେ ପଞ୍ଚାୟତ ଅଫିସ୍ରେ ଏହାକୁ ଖୋଲି ହେବ ।
ତେବେ ରିଟେଲ ମାର୍ଟ ଆବଣ୍ଟନ ପାଇଁ ମଧ୍ୟ ସ୍ୱଚ୍ଛ ପ୍ରକ୍ରିୟା ଆପଣାଯିବ । କାହା ଲବିରେ ବା କାହାକୁ ଅନୁକମ୍ପା ଦେଖାଇ ଏହି ମାର୍ଟ ଆବଣ୍ଟନ କରାଯିବନି । ଏସ୍ଏଚଜି ଫେଡେରେସନ ଏହାକୁ ନେବାକୁ ଚାହିଁଲେ ଏକ୍ସପ୍ରେସନ ଅଫ୍ ଇଣ୍ଟ୍ରେଷ୍ଟ(ଇଓଆଇ) ମଗାଯିବ । ଯୋଗ୍ୟ ଏସ୍ଏଚଜି ଫେଡେରେସନକୁ ବାଛି ରିଟେଲ ମାର୍ଟକୁ ଏହାର ପରିଚାଳନା ଦାୟିତ୍ୱ ଦିଆଯିବ । ସେହିଭଳି ବିଡିଓ ଏବଂ ମ୍ୟୁନିସିପାଲିଟି ନିର୍ବାହୀ ଅଧିକାରୀ(ଇଓ) ଏହି ମାର୍ଟ ପାଇଁ ଜାଗା ଯୋଗାଇବା ସହ ଏହାର ଇଣ୍ଟେରିଅର କାମ କରାଇବାକୁ ନିର୍ଦ୍ଦେଶ ଦିଆଯାଇଛି । ପ୍ରତି ମାର୍ଟର ଇଣ୍ଟେରିଆର ପାଇଁ ପ୍ରାୟ ଦେଢ଼ ଲକ୍ଷ ଟଙ୍କା ଖର୍ଚ୍ଚ ହେବ ।
ଗତ ସରକାର ସମୟରେ ଏହି ମିଶନ ଶକ୍ତି ରିଟେଲ ମାର୍ଟ ଖୋଲିବାକୁ ଯୋଜନା ଥିଲା । କିନ୍ତୁ ଏହି ଯୋଜନା ଆଗକୁ ବଢ଼ି ପାରିନଥିଲା । ଏବେ ଏହାକୁ ତତ୍କାଳ କାର୍ଯ୍ୟକ୍ଷମ ପାଇଁ ନୂଆ ସରକାର ଅଣ୍ଟା ଭିଡ଼ିଛନ୍ତି । ନୂଆ ବର୍ଷ ସୁଦ୍ଧା ଏହି ମାର୍ଟ ଖୋଲିବାକୁ ନିର୍ଦ୍ଦେଶ ଦିଆଯାଇଥିବା ସୂଚନା ମିଳିଛି ।
