ତିରୁଅନନ୍ତପୁରମ,୨୬/୦୮: ମାଲାୟାଲମ ଫିଲ୍ମ ଇଣ୍ଡଷ୍ଟ୍ରିରେ କିଛି ବରିଷ୍ଠ ଅଭିନେତା, ପ୍ରଯୋଜକ ଓ ନିର୍ଦ୍ଦେଶକଙ୍କ ବିରୋଧରେ ଆସିଥିବା ଯୌନ ଶୋଷଣ ଅଭିଯୋଗର ତଦନ୍ତ କରିବ ଏସ୍ଆଇଟି । କେରଳ ସରକାର ଏସ୍ଆଇଟି ଗଠନ କରିବା ଲାଗି ଘୋଷଣା କରିଛନ୍ତି । ପୁଲିସ ଆଇଜି ସ୍ପାରଜନ କୁମାର ଏସ୍ଆଇଟିର ମୁଖ୍ୟ ରହିବା ସହ ଏଥିରେ ଅନ୍ୟ ମହିଳା ଅଫିସରମାନଙ୍କୁ ସାମିଲ କରାଯିବ । ଫିଲ୍ମ ଇଣ୍ଡଷ୍ଟ୍ରିରେ ଅଭିନେତ୍ରୀଙ୍କୁ ଯୌନ ଶୋଷଣ କରାଯିବା ସହ ବିଭିନ୍ନ ପ୍ରକାର ହଇରାଣ, ଦୁର୍ବ୍ୟବହାର, ଅସଦାଚରଣ ଓ ସେମାନଙ୍କ ମାନବିକ ଅଧିକାରକୁ କ୍ଷୂଣ୍ଣ କରାଯାଉଛି ବୋଲି ଜଷ୍ଟିସ୍ କେ. ହେମା କମିଟି ତାଙ୍କ ରିପୋର୍ଟରେ ଦର୍ଶାଇବା ପରେ ତାକୁ ନେଇ ସାରା ରାଜ୍ୟରେ ହଇଚଇ ସୃଷ୍ଟି ହୋଇଥିଲା ।
କଂଗ୍ରେସ ନେତୃତ୍ୱାଧୀନ ୟୁଡିଏଫର ଏକ ଟିମ୍ ଗତକାଲି ମୁଖ୍ୟମନ୍ତ୍ରୀ ପିନରାୟୀ ବିଜୟନଙ୍କୁ ଭେଟି କମିଟିର ରିପୋର୍ଟ ଉପରେ ପୁଙ୍ଖାନୁପୁଙ୍ଖ ତଦନ୍ତ କରିବାକୁ ଦାବି କରିଥିଲେ । ଆଜି ମୁଖ୍ୟମନ୍ତ୍ରୀ ରାଜ୍ୟର ବରିଷ୍ଠ ପୁଲିସ ଅଧିକାରୀଙ୍କୁ ଡାକି ସେମାନଙ୍କ ସହ ଘଟଣା ସମ୍ପର୍କରେ ଆଲୋଚନା କରିଥିଲେ । ଏସ୍ଆଇଟି ଅଭିଯୋଗକାରୀଙ୍କ ଠାରୁ ଅଭିଯୋଗ ଗ୍ରହଣ କରିବା ସହ ସେମାନଙ୍କ ବୟାନ ରେକର୍ଡ କରିବ ଏବଂ ବିଭିନ୍ନ ସୋସିଆଲ ମିଡିଆରେ ଆସିଥିବା ଅଭିଯୋଗକୁ ବିଚାର କରି ଆବଶ୍ୟକ ପଦକ୍ଷେପ ନେବ ।
ଇତିମଧ୍ୟରେ ରବିବାର ପୁରସ୍କାର ବିଜୟୀ ଫିଲ୍ମ ନିର୍ମାତା ରଞ୍ଜିତ କେରଳ ଚଳଚ୍ଚିତ୍ର ଏକାଡେମୀର ଅଧ୍ୟକ୍ଷ ପଦରୁ ଇସ୍ତଫା ଦେଇଛନ୍ତି । ବେଙ୍ଗଲୀ ଅଭିନେତ୍ରୀ ଶ୍ରୀଲେଖା ମିତ୍ର ତାଙ୍କ ବିରୋଧରେ ଅସଦାଚରଣ ଅଭିଯୋଗ ଆଣିଥିଲେ । ଅନ୍ୟପକ୍ଷରେ ରଞ୍ଜିତ ଏଭଳି ଅଭିଯୋଗକୁ ଖଣ୍ଡନ କରିଥିଲେ।
