ନୂଆଦିଲ୍ଲୀ,୦୭/୦୪: ସାପ ବିଷ ଯୋଗାଣ ମାମଲାରେ ନୋଏଡା ପୁଲିସ ୟୁଟ୍ୟୁବର ଏଲ୍ଭିସ ଯାଦବଙ୍କ ବିରୋଧରେ ୧୨୦୦ ପୃଷ୍ଠାର ଚାର୍ଜସିଟ୍ ଦାଖଲ କରିଛି । ସେଥିରେ ସାପୁଆଙ୍କ ସହ ଏଲ୍ଭିସଙ୍କ ସମ୍ପର୍କ ରହିଥିବା ଉଲ୍ଲେଖ କରାଯିବା ସହ ୨୪ ଜଣ ସାକ୍ଷୀଙ୍କ ବୟାନ ମଧ୍ୟ ସାମିଲ କରାଯାଇଛି । ସେହିଭଳି ଚାର୍ଜସିଟ୍ରେ ଏଲ୍ଭିସଙ୍କ ବିରୋଧରେ ଏନ୍ଡିପିଏସ୍ ଆଇନର ବିଭିନ୍ନ ଦଫା ଲାଗିଥିବା ବେଳେ ମୁମ୍ବାଇସ୍ଥିତ ଡିପାର୍ଟମେଣ୍ଟ ଅଫ୍ ଫୋରେନସିକ ମେଡିସିନ ଟକ୍ସିକୋଲୋଜିର ବିଶେଷଜ୍ଞଙ୍କ ପରାମର୍ଶ ରହିଛି । ଏଲଭିସଙ୍କ ସମେତ ତାଙ୍କର ଅନ୍ୟ ୭ ଜଣ ସହଯୋଗୀଙ୍କ ନାମ ମଧ୍ୟ ଚାର୍ଜସିଟ୍ରେ ରହିଛି ।
ଗତବର୍ଷ ନଭେମ୍ବର ୩ରେ ନୋଏଡା ପୁଲିସ ଏକ ରେଭ ପାର୍ଟିରେ ଚଢ଼ାଉ କରି ସେଠାରୁ ୫ ଜଣଙ୍କୁ ଗିରଫ କରିବା ସହ ୯ଟା ସାପ ଓ ୨୦ ମି.ଲି ସାପ ବିଷ ଜବତ କରିଥିଲା । ସେମାନଙ୍କୁ ପଚରାଉଚୁରା କରିବା ବେଳେ ଏଲ୍ଭିସଙ୍କ ନାମ ସାମ୍ନାକୁ ଆସିଥିଲା । ନୋଏଡାର ସେକ୍ଟର-୨୯ ଥାନାରେ ମାମଲା ରୁଜୁ କରାଯାଇଥିଲା । ଗତ ମାର୍ଚ୍ଚ ୧୭ ତାରିଖରେ ପୁଲିସ ତାଙ୍କୁ ପଚରାଉଚୁରା ଲାଗି ଡାକିଥିଲା । ପଚରାଉଚୁରା କରିବା ପରେ ତାଙ୍କୁ ଗିରଫ କରିଥିଲା । ଦୀର୍ଘ ୫ ଦିନ ଜେଲ୍ରେ ରହିବା ପରେ ସେ ଜାମିନରେ ମୁକୁଳିଥିଲେ । ମାମଲା ରୁଜୁର ୧୫୫ ଦିନରେ ଚାର୍ଜସିଟ୍ ଦାଖଲ ହୋଇଛି।
