ନୂଆଦିଲ୍ଲୀ: ଅନୁରା କୁମାରା ଦିସାନାୟକ ଶ୍ରୀଲଙ୍କାର ରାଷ୍ଟ୍ରପତି ହେବା ପରେ ଏବେ ନୂତନ ପ୍ରଧାନମନ୍ତ୍ରୀ ମଧ୍ୟ ଶପଥ ଗ୍ରହଣ କରିଛନ୍ତି । ମଙ୍ଗଳବାର ଶ୍ରୀଲଙ୍କାର ନୂତନ ପ୍ରଧାନମନ୍ତ୍ରୀ ଭାବରେ ହରିଣୀ ଅମରସୂର୍ଯ୍ୟା ଶପଥ ଗ୍ରହଣ କରିଛନ୍ତି । ୨୦୦୦ ମସିହାରେ ସିରିମାଭୋ ଭଣ୍ଡାରନାୟକଙ୍କ ପରେ ଅମରସୂର୍ଯ୍ୟା ପ୍ରଧାନମନ୍ତ୍ରୀ ଭାବରେ ଏହି ପଦବୀରେ ଅବସ୍ଥାପିତ ହୋଇଥିବା ଦ୍ୱିତୀୟ ମହିଳା ନେତା। ସୂଚନାଥାଉକି,ଯେ 'ନ୍ୟାସନାଲ ପିପୁଲ୍ସ ପାୱାର'(ଏନପିପି) ର ୫୪ ବର୍ଷିୟ ନେତା ଅମରସୂର୍ଯ୍ୟାଙ୍କୁ ରାଷ୍ଟ୍ରପତି ଅନୁରା କୁମାରା ଦିସାନାୟକେ ଶପଥ ପାଠ କରାଇଛନ୍ତି । 

ଦିସାନାୟକେ ନିଜ ସମେତ ଚାରିଜଣ ସଦସ୍ୟଙ୍କ କ୍ୟାବିନେଟ ନିଯୁକ୍ତ କରିଛନ୍ତି। ଅମରସୂର୍ଯ୍ୟାଙ୍କୁ ନ୍ୟାୟ, ଶିକ୍ଷା, ଶ୍ରମ, ଶିଳ୍ପ, ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା, ସ୍ୱାସ୍ଥ୍ୟ ଏବଂ ବିନିଯୋଗ ମନ୍ତ୍ରଣାଳୟର ଦାୟିତ୍ବ ଦିଆଯାଇଛି । ସେ ପ୍ରଧାନମନ୍ତ୍ରୀ ଦିନେଶ ଗୁଣବର୍ଦ୍ଧନଙ୍କ ସ୍ଥାନ ନେଇଛନ୍ତି, ଯିଏକି ରାଷ୍ଟ୍ରପତି ନିର୍ବାଚନ ପରେ ପଦରୁ ଇସ୍ତଫା ଦେଇଥିଲେ । ଏନପିପି ସାଂସଦ ବିଜିତା ହେରାଥ ଏବଂ ଲକ୍ଷ୍ମଣ ନିପୁରନାଚି କ୍ୟାବିନେଟ ମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି । ସଂସଦ ଭଙ୍ଗ ହେବା ପରେ ସେ ଜଣେ କାର୍ୟ୍ୟବାହକ କ୍ୟାବିନେଟ ମନ୍ତ୍ରୀ ଭାବେ କାର୍ଯ୍ୟ କରିବେ । 

ଶ୍ରୀଲଙ୍କା ନୂତନ ରାଷ୍ଟ୍ରପତି ଏବଂ ପ୍ରଧାନମନ୍ତ୍ରୀ ପାଇବା ପରେ ଆଉ ଏକ ଖୁସି ଖବର ସାମ୍ନାକୁ ଆସିଛି। ଆର୍ଥିକ ସଙ୍କଟ ଦେଇ ଗତି କରୁଥିବା ସମ୍ପର୍କରେ ଆନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମ୍ଏଫ୍) ବର୍ତ୍ତମାନ ଶ୍ରୀଲଙ୍କା ସହ ଆଲୋଚନା କରିବ । ଆଇଏମ୍ଏଫ୍ ମଙ୍ଗଳବାର ଦିନ ରାଷ୍ଟ୍ରପତି ଅନୁରା କୁମାରା ଦିସାନାୟକେଙ୍କ ନେତୃତ୍ୱରେ ଶ୍ରୀଲଙ୍କାର ନୂତନ ସରକାରଙ୍କ ସହ କାମ କରିବାକୁ ଆଗ୍ରହର ସହ ଅପେକ୍ଷା କରିଛି ଏବଂ ଦେଶର ଋଣ କାର୍ଯ୍ୟକ୍ରମର ପରବର୍ତ୍ତୀ ସମୀକ୍ଷା ସମୟ ବିଷୟରେ ଆଲୋଚନା କରିବ ବୋଲି କହିଛି।