ପୁରୀ,୨୮/୧୧: ବୁଧବାର ଶ୍ରୀମନ୍ଦିରରେ ମହାପ୍ରଭୁଙ୍କ ବନକଲାଗି  ନୀତି ଅନୁଷ୍ଠିତ ହେବ । ଅପରାହ୍ଣରେ ଏହି ନୀତି ସମ୍ପନ୍ନ ହେବ ବୋଲି ସୂଚନା ରହିଛି । ଏଣୁ ଭକ୍ତମାନେ ଏହି ସମୟରେ ପ୍ରାୟ ୩ ଘଣ୍ଟା  ମହାପ୍ରଭୁଙ୍କ ଦର୍ଶନରୁ ବଞ୍ଚିତ  ହେବେ । ଦତ୍ତମହାପାତ୍ର ସେବକମାନେ  ଶ୍ରୀବିଗ୍ରହଙ୍କ ଏହି ସେବା କରିବେ । 

 ଅପରାହ୍ଣରେ ଦ୍ୱିତୀୟ ଭୋଗମଣ୍ଡପ  ନୀତି ସରିବା ପରେ ମହାପ୍ରଭୁଙ୍କ  ବନକଲାଗି ନୀତି ଆରମ୍ଭ ହେବ ।  ଦତ୍ତମହାପାତ୍ର ସେବକମାନେ ଠାକୁରଙ୍କ ଶ୍ରୀମୁଖ ସିଂହାର କରିବା  ପାଇଁ ଗର୍ଭଗୃହକୁ ପ୍ରବେଶ କରିବେ ।  ବନକଲାଗି ପାଇଁ ହିଙ୍ଗୁଳ, ହରିତାଳ,  ଶଙ୍ଖ, କେଶର, କର୍ପୂର, କଇଥ ଅଠା,  କସ୍ତୁରୀ ଓ କଳା ଇତ୍ୟାଦି ବ୍ୟବହାର  କରାଯାଏ । ବୁଧବାର ଠାକୁରଙ୍କ  ସେବାପୂଜାର ନୀତି ନିର୍ଘଣ୍ଟକୁ ନେଇ  ବନକଲାଗି ସମୟ ଧାର୍ଯ୍ୟ ହେବ ।