ଖଣ୍ଡପଡା, ୧୧।୩ : ଭାପୁର -ରାଜସୁନାଖଳା ରାସ୍ତାର ଗୋଳାପୋଖରୀ ଗାଁ ନିକଟରେ ମର୍ମନ୍ତୁଦ ଦୁର୍ଘଟଣା ଘଟିଛି l ଟିୟୁସନ ସାରି ଫେରୁଥିବା ବେଳେ ଚାପିଦେଲା ମାଲ ବୋଝେଇ ହାଇୱା l ଫଳରେ ଜଣେ ଛାତ୍ରୀଙ୍କ ମୃତ୍ୟୁ ହୋଇଥିବା ବେଳେ ଜଣେ ଛାତ୍ର ଗୁରୁତର ଆହତ ହୋଇଛନ୍ତି l ଏ ନେଇ ଗୋଳାପୋଖରୀ ରାସ୍ତାରେ ଟାୟାର ଜାଳି ରାସ୍ତା ଅବରୋଧ କରିଛନ୍ତି ସ୍ଥାନୀୟ ଲୋକେ l ମୃତକ ଜଣକ ହେଉଛନ୍ତି ଫତେଗଡ଼ ଥାନା ବେଗୁନିଆ ଗାଁର ପୂଜା ପ୍ରଧାନ, ଗୁରୁତର ଆହତ ଛାତ୍ର ଜଣକ ହେଉଛନ୍ତି ଅଭିନାଶ ପ୍ରଧାନ l ଉଭୟ ୮ମ ଶ୍ରେଣୀ ଛାତ୍ରଛାତ୍ରୀ l

 ଗୋଳାପୋଖରୀ ଗାଁରୁ ଟିୟୁସନ ସାରି ସାଇକେଲ ଯୋଗେ ସାଙ୍ଗ ସାଥି ହୋଇ ଫେରୁଥିଲେ କିଛି ଛାତ୍ରଛାତ୍ରୀ l ଏହି ସମୟରେ ବାଲି ବୋଝେଇ ଏକ ହାଇୱା ଧକ୍କା ପୂଜା ଓ ଅଭିନାଙ୍କୁ ଦେଇଥିଲା l ତୁରନ୍ତ ସେମାନଙ୍କୁ ଭାପୁର ମେଡିକାଲରେ ଭର୍ତ୍ତି କରିଥିଲେ l ହେଲେ ଡାକ୍ତର ପୂଜାଙ୍କୁ ମୃତ ଘୋଷଣା କରିଥିଲେ l ଘଟଣା ସ୍ଥଳରେ ଫତେଗଡ ପୋଲିସ ପହଞ୍ଚି ଘଟଣାର ତଦନ୍ତ ଜାରି ରଖିଛି।