ଭୁବନେଶ୍ୱର,୦୬/୦୯: ‘ସୁଭଦ୍ରା’ ସମ୍ପର୍କରେ ଜନସାଧାରଣଙ୍କୁ ଅବଗତ କରାଇବାକୁ ଆସନ୍ତା ୭ରୁ ୧୬ ତାରିଖ ପର୍ଯ୍ୟନ୍ତ ବୁଲିବ ସଚେତନତା ରଥ । ଗୁରୁବାର ମୁଖ୍ୟ ଶାସନ ସଚିବ ମନୋଜ ଆହୁଜାଙ୍କ ଅଧ୍ୟକ୍ଷତାରେ ବସିଥିବା ଗୁରୁତ୍ୱପୂର୍ଣ୍ଣ ବୈଠକରେ ଏହି ନିଷ୍ପତ୍ତି ନିଆଯାଇଛି ।
ଆସନ୍ତା ୧୭ ତାରିଖରେ ‘ସୁଭଦ୍ରା’ ଯୋଜନାର ହିତାଧିକାରୀଙ୍କୁ ପ୍ରଥମ କିସ୍ତି ପ୍ରଦାନର ଶୁଭାରମ୍ଭ ହେବ । ତେଣୁ ତା’ର ପ୍ରସ୍ତୁତି ସମ୍ପର୍କରେ ଜିଲ୍ଲାପାଳମାନଙ୍କ ସହିତ ଆଲୋଚନା କରିଛନ୍ତି ଶ୍ରୀ ଆହୁଜା । କିସ୍ତି ପ୍ରଦାନ ଶୁଭାରମ୍ଭର ସିଧା ପ୍ରସାରଣ ସହ ପଞ୍ଚାୟତ, ବ୍ଲକ୍, ଜିଲ୍ଲା, ପୌରାଞ୍ଚଳ, ମହାନଗର ନିଗମ ସ୍ତରରେ ପ୍ରଦର୍ଶନ ନିମନ୍ତେ ପ୍ରସ୍ତୁତି ସମ୍ପର୍କରେ ଆଲୋଚନା କରାଯାଇଥିଲା । ଏଥି ସହ ‘ସୁଭଦ୍ରା’ ସମ୍ପର୍କିତ ସୂଚନା, ଶିକ୍ଷା ଓ ଯୋଗାଯୋଗ(ଆଇଇସି) ଉପରେ ଗୁରୁତ୍ୱ ଦିଆଯାଇଥିଲା ।
ସଚେତନତା ରଥ କେଉଁ ରାସ୍ତାରେ ଯିବ, ତାହାର ନକ୍ସା ଅଞ୍ଚଳର ଜନପ୍ରତିନିଧି ଏବଂ ଅଂଶଗ୍ରହଣକାରୀଙ୍କୁ ଜଣାଯିବ । ପ୍ରତି ରଥ ବା ଭ୍ୟାନ୍ ସହ ଜଣେ ଜଣେ ନୋଡାଲ୍ ଅଧିକାରୀ ଦାୟିତ୍ୱରେ ରହିବେ । ସବୁ କମନ୍ ସର୍ଭିସ୍ ସେଣ୍ଟର ଏବଂ ମୋ ସେବା କେନ୍ଦ୍ରରେ ସୂଚନା ପ୍ରଚାର ପତ୍ର ଉପଲବ୍ଧ ହେବା ସହିତ ପୋଷ୍ଟର, ବ୍ୟାନର ଲଗାଯିବ । ଏଥିପାଇଁ ଜିଲ୍ଲାପାଳଙ୍କୁ ନିଶ୍ଚିତ କରିବାକୁ ନିର୍ଦ୍ଦେଶ ଦିଆଯାଇଛି । ଏଥିସହ ଫର୍ମ ବିତରଣ, ପଞ୍ଜୀକରଣ ଓ ସଂଗ୍ରହ ଏବଂ ପୋର୍ଟାଲ୍ରେ ଅପ୍ଲୋଡ୍ ଉପରେ ସମୀକ୍ଷା କରାଯାଇଥିଲା । ସଂଗୃହୀତ ଫର୍ମ ଗ୍ରାମ ପଞ୍ଚାୟତୱାରୀ ଅଲଗା ଅଲଗା କରାଯାଇ ଶିଶୁ ବିକାଶ ପ୍ରକଳ୍ପ ଅଧିକାରୀଙ୍କ କାର୍ଯ୍ୟାଳୟରେ ଅନ୍ୟାଦେଶ ପର୍ଯ୍ୟନ୍ତ ରହିବ । ଅଦ୍ୟାବଧି ରାଜ୍ୟରେ ପ୍ରାୟ ୪୦ ହଜାର କମନ୍ ସର୍ଭିସ୍ ସେଣ୍ଟର ଏବଂ ମୋ ସେବା କେନ୍ଦ୍ରରେ ଶିବିର କରାଯାଇ ତଦାରଖ ସହ ଫର୍ମ ସଂଗ୍ରହ କରାଯାଉଛି । ସୋସିଆଲ୍ ମିଡିଆରେ କିଛି ନକଲି ୱେବ୍ସାଇଟ୍ କରି ହିତାଧିକାରୀଙ୍କୁ ଭ୍ରମିତ କରୁଥିଲେ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ହୋଇଛି ।
ଏହାଛଡ଼ା "ସ୍ୱଚ୍ଛତା ହିଁ ସେବା' ପକ୍ଷ ଆସନ୍ତା ୧୭ରୁ ଅକ୍ଟୋବର ୧ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବ । ଅକ୍ଟୋବର ୨ରେ "ସ୍ୱଚ୍ଛ ଭାରତ ଦିବସ' ଉପଲକ୍ଷେ ଏହା ‘ସ୍ୱାଭିମାନ ସ୍ୱଚ୍ଛତା- ସଂସ୍କାର ସ୍ୱଚ୍ଛତା' ଥିମ୍ ଉପରେ ପର୍ଯ୍ୟବସିତ ହେବ ବୋଲି ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ସୂଚନା ଦିଆଯାଇଥିଲା ।
ଏସବୁ ସମ୍ପର୍କରେ ରାଜସ୍ୱ ଆୟୁକ୍ତ, ଜିଲ୍ଲାପାଳ ଏବଂ ସମସ୍ତ ମହାନଗର ନିଗମର କମିଶନରଙ୍କ ସହିତ ମୁଖ୍ୟ ଶାସନ ସଚିବ ଆଭାସୀ ବୈଠକ କରିଥିଲେ । ଲୋକସେବା ଭବନରେ ଅନୁଷ୍ଠିତ ଏହି ବୈଠକରେ ଉନ୍ନୟନ କମିଶନର ଅନୁ ଗର୍ଗ, ସମ୍ପୃକ୍ତ ବିଭାଗର କମିଶନର ଓ ସଚିବ, ଅନ୍ୟ ବରିଷ୍ଠ ପ୍ରଶାସନିକ ଅଧିକାରୀ ଉପସ୍ଥିତ ଥିଲେ । ଆଇଟି ସଚିବ ମଧ୍ୟ ଆଭାସୀରେ ଯୋଡ଼ି ହୋଇଥିଲେ ।
